ନୂଆଦିଲ୍ଲୀ: ବିଶ୍ୱର ସର୍ବବୃହତ ଗଣତନ୍ତ୍ରିକ ରାଷ୍ଟ୍ର ଭାରତରେ ନିର୍ବାଚନ ପାଇଁ ଘୋଷଣା ହୋଇଛି ତାରିଖ । ୧୭ ତମ ସାଧାରଣ ନିର୍ବାଚନ ପାଇଁ ବିଜ୍ଞପ୍ତି ପ୍ରକାଶ କରିଛନ୍ତି ନିର୍ବାଚନ କମିଶନ୍ । ଏପ୍ରିଲ ୧୧ ତାରିଖରେ ହେବ ପ୍ରଥମ ପର୍ଯ୍ୟାୟ ନିର୍ବାଚନ । ମେ’ ମାସ ୧୯ ତାରିଖରେ ହେବ ସପ୍ତମ ଅର୍ଥାତ ଶେଷ ପର୍ଯ୍ୟାୟ ନିର୍ବାଚନ । ମେ’ ୨୩ ତାରିଖରେ ହେବ ମତଗଣନା । ତେବେ ଚଳିତ ଥର ମୋଟ ୯୦ କୋଟି ଭୋଟର ନିଜର ମତଦାନ ସାବ୍ୟସ୍ତ କରିବାକୁ ଯାଉଥିବା ବେଳେ ମୋଟ ୧୦ ଲକ୍ଷ ବୁଥରେ ହେବ ମତଦାନ । ଆଉ ଏକ ଗୁରୁତ୍ବପୂର୍ଣ୍ଣ କଥା ହେଲା, ଚଳିତ ନିର୍ବାଚନ ହାଇଟେକ୍ .ହେବ।
Sambad is now on WhatsApp
Join and get latest news updates delivered to you via WhatsApp
ବୁଥରେ ଭୋଟଗ୍ରହଣ ଠାରୁ ଆରମ୍ଭ କରି ମତଗଣନା ପର୍ଯ୍ୟନ୍ତ ପ୍ରତ୍ୟେକ କ୍ଷେତ୍ରରେ ନୂଆ ଜ୍ଞାନକୌଶଳ ସହ ନିର୍ବାଚନ ଅନୁଷ୍ଠିତ ହେବାକୁ ଯାଉଛି। ନିର୍ବାଚନକୁ ମୁକ୍ତ ଓ ଅବାଧ ଭାବେ କରିବାକୁ ସୋସିଆଲ ମିଡିଆ ଉପରେ କଡା ନଜର ରଖାଯିବ ବୋଲି କହିଛନ୍ତି ନିର୍ବାଚନ କମିସନର। ପ୍ରତ୍ୟେକ ପ୍ରାର୍ଥୀ ନିଜର ସୋସିଆଲ ମିଡିଆ ଆକାଉଣ୍ଟର ତଥ୍ୟ ନିର୍ବାଚନ କମିସନଙ୍କ ନିକଟରେ ଦାଖଲ କରିବେ । ସବୁଠୁ ଗୁରୁତ୍ୱପୂର୍ଣ୍ଣ କଥା ହେଉଛି, ପ୍ରତି ବୁଥରେ ଭିଭିପାଟର ବ୍ୟବହାର କରାଯିବ । ଏହାସହ ଇଭିଏମରେ ପ୍ରାର୍ଥୀଙ୍କ ଫଟୋ ରହିବା ସହ ମତଦାନ କେନ୍ଦ୍ରରେ ସିସିଟିଭି ଲଗାଯିବ ଏବଂ ପୂରା ନିର୍ବାଚନ ପ୍ରକିୟାର ଭିଡ଼ିଓଗ୍ରାଫି କରାଯିବ ।
ଏସବୁ ବ୍ୟତୀତ ସାଧାରଣ ନିର୍ବାଚନ ପାଇଁ ହେଲ୍ପଲାଇନ ନମ୍ବର ଜାରି କରିଛନ୍ତି ମୁଖ୍ୟ ନିର୍ବାଚନ କମିସନ । ଟୋଲ ଫ୍ରି ନମ୍ବର ୧୯୫୦ରେ କଲ କରି ସମସ୍ତ ତଥ୍ୟ ପାଇପାରିବେ ଭୋଟର । ଏହାସହ ନିର୍ବାଚନକୁ ନେଇ କୌଣସି ଅଭିଯୋଗ ଦାଖଲ କରିବାକୁ ଏକ୍ ଆପ୍ ଲଞ୍ଚ କରାଯାଇଛି । ଯେଉଁଥିରେ କୌଣସି ଭୋଟର ନିର୍ବାଚନକୁ ନେଇ ଅଭିଯୋଗ କଲେ, ଅଭିଯୋଗର ୧୦୦ ମିନିଟ୍ ମଧ୍ୟରେ କାର୍ଯ୍ୟାନୁଷ୍ଠାନ ନିଆଯିବ ବୋଲି କହିଛନ୍ତି ମୁଖ୍ୟ ନିର୍ବାଚନ ଅଧିକାରୀ । ଏହାଛଡା ପୋଲିଂ ଅଫିସରଙ୍କ ଗାଡିରେ ପ୍ରଥମଥର ପାଇଁ ଜିପିଏସ ଲାଗିବ, ନିରପେକ୍ଷ ନିର୍ବାଚନ ପାଇଁ ସମସ୍ତ ପ୍ରକାର ବ୍ୟବସ୍ଥା କରାଯାଇଛି ବୋଲି କହିଛନ୍ତି ସୁନୀଲ ଅରୋରା ।