ପର୍ଥ ଟେଷ୍ଟ : ସଂକଟରେ ଭାରତ, ୫ମ ଦିନରେ ବିଜୟ ପାଇଁ ୧୭୫ ରନ ଆବଶ୍ୟକ, କିନ୍ତୁ ହାତରେ ମାତ୍ର ୫ଟି ଓ୍ଵିକେଟ
ପର୍ଥ : ସ୍ଥାନୀୟ ପର୍ଥ ଷ୍ଟାଡିୟମଠାରେ ଚାଲିଥିବା ଭାରତ-ଅଷ୍ଟ୍ରେଲିଆ ୨ୟ ଟେଷ୍ଟର ୪ର୍ଥ ଦିନ ଖେଳ ଶେଷସୁଦ୍ଧା ଅଷ୍ଟ୍ରେଲିଆ ନିଜ ସ୍ଥିତିକୁ ସୁଦୃଢ କରିଥିବାବେଳେ ଭାରତ ସଂକଟର ସମ୍ମୁଖୀନ ହୋଇଛି । ଭାରତ ନିଜର ୨ୟ ଇନିଂସରେ ୨୮୭ ରନର ବିଜୟ ଲକ୍ଷ୍ୟକୁ ପିଛା କରିବାକୁ ଯାଇ ଆଜି ଖେଳ ସମାପ୍ତି ସୁଦ୍ଧା ୫ ଓ୍ଵିକେଟ ହରାଇ ୧୧୨ ରନ ସଂଗ୍ରହ କରିଛି । ବିଜୟ ପାଇଁ ଭାରତ ଆହୁରି ୧୭୫ରନ ଆବଶ୍ୟକ କରୁଥିବାବେଳେ ହାତରେ ମାତ୍ର ୫ଟି ଓ୍ଵିକେଟ ରହିଛି । ଭାରତ ପକ୍ଷରୁ ଆଜିଙ୍କ୍ୟ ରାହାଣେ ସର୍ବାଧିକ ୩୦ ରନ ସଂଗ୍ରହ କରିଥିବାବେଳେ ଅନ୍ୟ କୌଣସି ବ୍ୟାଟ୍ସମ୍ୟାନ କ୍ରିଜରେ ତିଷ୍ଠିପାରିନଥିଲେ । ଏବେ ହନୁମା ବିହାରୀ ୨୪ ଓ ରିଷଭ ପନ୍ଥ ୯ ରନ କରି ଅପରାଜିତ ଅଛନ୍ତି । ଏହା ପୂର୍ବରୁ ଅଷ୍ଟ୍ରେଲିଆ ନିଜର ୨ୟ ଇନିଂସରେ ୨୪୩ ରନ କରି ଅଲଆଉଟ ହୋଇଯାଇଥିଲା ।
Sambad is now on WhatsApp
Join and get latest news updates delivered to you via WhatsApp
ଅଷ୍ଟ୍ରେଲିଆ ପ୍ରଥମ ଇନିଂସରେ ୩୨୬ ରନ ସଂଗ୍ରହ କରିଥିବାବେଳେ ତାହାର ଜବାବରେ ଭାରତ ନିଜର ପ୍ରଥମ ଇନିଂସରେ ୨୮୩ରେ ଅଲଆଉଟ ହୋଇଯାଇଥିଲା । ପ୍ରଥମ ଇନିଂସରେ ଭାରତୀୟ ଦଳ ବିପର୍ଯ୍ୟୟର ସମ୍ମୁଖୀନ ହୋଇଥଲା । କିନ୍ତୁ ଅଧିନାୟକ ବିରାଟ କୋହଲିଙ୍କ ଶତକ ଦଳକୁ ବିପର୍ଯ୍ୟୟରୁ ରକ୍ଷା କରିଥିଲା । କୋହଲି ୧୨୩ ରନ ଓ ଅଜିଙ୍କ୍ୟ ରାହାଣେ ୫୧ରନ ସଂଗ୍ରହ କରିଥିଲେ ।