ଆଣ୍ଡାମାନରେ କାର୍ଯ୍ୟକ୍ଷମ ହେଲା ତୃତୀୟ ନୌସେନା ଘାଟି ଆଇଏନ୍ଏସ କୋହାସା : ଚୀନର ପ୍ରଭାବ ହ୍ରାସ କରିବାକୁ ପଦକ୍ଷେପ ନେଲା ଭାରତ
ନୂଆଦିଲ୍ଲୀ: ଭାରତ ମହାସାଗରରେ ଲଗାତାର ଚୀନର ପ୍ରାଧାନ୍ୟ ବଢୁଥିବା ବେଳେ ଏହାର ଜବାବ ଦେବାକୁ ଏବେ ଅଣ୍ଟା ଭିଡିଛି ଭାରତ । ଏହିକ୍ରମରେ ଆଣ୍ଡାମାନ-ନିକୋବର ଦ୍ୱୀପରେ ଭାରତ ନିଜର ତୃତୀୟ ନୌସେନା ଘାଟି ଖୋଲିବାକୁ ଯାଉଛି । ଏହି ନୌସେନା ଘାଟିର ନାମକରଣ କରାଯାଇଛି ଆଇଏନଏସ କୋହାସା । ଏଠାରେ ଯୁଦ୍ଧପୋତ ନିୟୋଜିତ କରାଯିବା ସହିତ ବୁଡା ଜାହାଜ ଓ ଯୁଦ୍ଧବିମାନ ମୁତୟନ କରାଯିବ। ଗୁରୁବାର ଉତ୍ତର ଆଣ୍ଡାମାନର ଦିଗଲିପୁରଠାରେ ନୌସେନା ମୁଖ୍ୟ ଆଡମିରାଲ୍ ସୁନିଲ୍ ଲାମ୍ବା ଏହାକୁ ଉଦଘାଟନ କରିଛନ୍ତି।
Sambad is now on WhatsApp
Join and get latest news updates delivered to you via WhatsApp
ଏହାଦ୍ୱାରା ଭାରତ ମହାସାଗରରେ ଚୀନର ପ୍ରତିଟି ଗତିବିଧି ଉପରେ ନଜର ରଖିପାରିବ ଭାରତ । ନୌସେନା ଅଧିକାରୀଙ୍କ ମୁତାବକ, କୋହାସା ନୌସେନା ଘାଟିରେ ୧୦୦୦ ମିଟର ଦୀର୍ଘ ଏକ ରନୱେ ରହିବ । ପରେ ଏହାକୁ ୩ ହଜାର ମିଟର ପର୍ଯ୍ୟନ୍ତ ବୃଦ୍ଧି କରାଯିବ । ଯାହାଦ୍ୱାରା ଯୁଦ୍ଧ ବିମାନଗୁଡିକ ବେଶ ସହଜରେ ଏଠାରେ ଅବତରଣ କରିପାରିବ ।
କୋହାସା ଘାଟି ଆଣ୍ଡାମାନ-ନିକୋବର ଦ୍ୱୀପପୁଞ୍ଜର ରାଜଧାନୀ ପୋର୍ଟ ବ୍ଲେୟାରଠାରୁ ପାଖାପାଖି ୩୦୦ କିଲୋମିଟର ଦୂର ମଲକ୍କାର ପ୍ରବେଶ ମାର୍ଗରେ ଅବସ୍ଥିତ । ଏହା ଅଞ୍ଚଳ ଦେଇ ପ୍ରତିବର୍ଷ ୭୦ ହଜାର ଜାହାଜ ଯାତାୟତ କରିଥାଏ । ପୂର୍ବ ନୌସେନା ଅଧିକାରୀ ଅନିଲ ଜୟ କହିଛନ୍ତି, ହିନ୍ଦ ମହାସାଗରରେ ଚୀନ ଯେଉଁ ବଡଭାଇପଣିଆ ଦେଖାଉଛି ତାହାର ଜବାବ ଦେବାକୁ ଭାରତକୁ ଏବେଠୁ ପ୍ରସ୍ତୁତ ହେବା ଆବଶ୍ୟକ । ଏହି କାରଣରୁ ଭାରତ ଏଠାରେ ନୌସେନା ଘାଟି ନିର୍ମାଣ କରିଛି, ଯାହାଦ୍ୱାରା ହିନ୍ଦ ମହାସାଗର ଅଞ୍ଚଳ ଉପରେ ନଜର ରଖିପାରିବ ଭାରତ ।
କେନ୍ଦ୍ରରେ ମୋଦି ସରକାର ଆସିବା ପରେ ଚୀନର ପ୍ରତିଟି ଗତିବିଧି ଉପରେ ସର୍ତକ ଦୃଷ୍ଟି ରଖିଛି ଭାରତ । କାରଣ ୨୦୧୪ରେ ଚୀନର ବୁଡାଜାହାଜ ଶ୍ରୀଲଙ୍କାର କଲମ୍ବୋ ବିମାନବନ୍ଦରରେ ଦେଖିବାକୁ ମିଳିଥିଲା । ଏହି ଘଟଣା ସାମ୍ନାକୁ ଆସିବା ପରେ ମୋଦି ସରକାର ଶ୍ରୀଲଙ୍କା ସରକାରଙ୍କୁ ଏ ବାବଦରେ ଅବଗତ କରାଇଥିଲେ ।