ନୂଆଦିଲ୍ଲୀ : ଲଦାଖ ପ୍ରସଙ୍ଗରେ ଭାରତକୁ ସମର୍ଥନ କରିଛି ଜାପାନ । ଚୀନ ମନଇଚ୍ଛା ଏଲଏସିର ସ୍ଥିତାବସ୍ଥା ବଦଳାଇବାକୁ ଚେଷ୍ଟା କରୁଛି ବୋଲି ଜାପାନ କହିଛି । ଏହା ସହିତ ଭାରତ ସହ ଗୁଇନ୍ଦା ସୂଚନା ଆଦାନପ୍ରଦାନ ପାଇଁ ଜାପାନ ରାଜି ହୋଇଛି ।
Sambad is now on WhatsApp
Join and get latest news updates delivered to you via WhatsApp
ଭାରତରେ ଅବସ୍ଥାପିତ ଜାପାନ ରାଷ୍ଟ୍ରଦୂତ ସାତୋସୀ ସୁଜୁକୀ କହିଛନ୍ତି ଯେ ଏହି ପ୍ରସଙ୍ଗରେ ସେ ଆଜି ଭାରତର ବୈଦେଶିକ ସଚିବ ହର୍ଷ ସିଙ୍ଗଲାଙ୍କ ସହିତ କଥା ହୋଇଛନ୍ତି । ଚୀନ ସହ ବିବାଦକୁ ଭାରତ ଶାନ୍ତିପୂର୍ଣ୍ଣ ଉପାୟରେ ସମାଧାନ କରିବାକୁ ଭାରତର ଉଦ୍ୟମକୁ ସେ ସମର୍ଥନ କରିଛନ୍ତି । ସେ କହିଛନ୍ତି ଯେ ଶାନ୍ତିପୂର୍ଣ୍ଣ ଆଲୋଚନା ମଧ୍ୟମରେ ବିବାଦର ସମାଧାନକୁ ଜାପାନ ସମର୍ଥନ କରେ ମାତ୍ର ଏକପାଖିଆ ଭାବେ ସ୍ଥିତାବସ୍ଥା ବଦଳାଇବା ଉଦ୍ୟମକୁ ଜାପାନ ବିରୋଧ କରେ ।
ଉଭୟ ଜାପାନ ଓ ଭାରତ ଚୀନର ବିସ୍ତାରବାଦୀ ନୀତି ଦ୍ବାରା ପ୍ରଭାବିତ ହୋଇଥିବାରୁ ଦୁଇଦେଶ ମଧ୍ୟରେ ପ୍ରତିରକ୍ଷା ସହଯୋଗ ବିଗତ କିଛିବର୍ଷ ମଧ୍ୟରେ ବଢିଛି । ଜାପାନ ନିକଟରେ ନିଜର ଏକ ଆଇନରେ ସଂଶୋଧନ ଆଣି ଭାରତକୁ ଗୁଇନ୍ଦା ସୂଚନା ପ୍ରଦାନ ଲାଗି ପଥ ଉନ୍ମୁକ୍ତ କରିଛି । ପୂର୍ବରୁ କେବଳ ଆମେରିକାକୁ ଜାପାନ ଗୁଇନ୍ଦା ସୂଚନା ପ୍ରଦାନ କରୁଥିଲା । କିନ୍ତୁ ଏବେ ଭାରତ, ଅଷ୍ଟ୍ରେଲିଆ ଓ ବ୍ରିଟେନକୁ ଗୁଇନ୍ଦା ସୂଚନା ପ୍ରଦାନ କରିପାରିବ ।
ଏକ ଦ୍ବୀପର ମାଲିକାନା ପାଇଁ ଜାପାନ ଓ ଚୀନ ମଧ୍ୟରେ ବିବାଦ ବଢିଯାଇଛି । ଏଥିଲାଗି ଜାପାନ ସୀମାରେ ମିସାଇଲ ମୁତୟନ କରିଛି ।