ସୁଧୁରିଯାଅ, ନଚେତ୍ ମଝିରୁ ଫାଡ଼ି ଦେବି; କୋଲକାତା ଦୁଷ୍କର୍ମ ଘଟଣାକୁ ନେଇ ପୁରୁଷଙ୍କୁ ଚେତାବନୀ ଦେଲେ ଜନ୍

ମୁମ୍ବାଇ: କୋଲକାତାରେ ଜଣେ ମହିଳା ଡାକ୍ତରଙ୍କୁ ଦୁଷ୍କର୍ମ ଓ ହତ୍ୟା ଘଟଣା ସମଗ୍ର ଦେଶକୁ ଥରାଇ ଦେଇଛି। ସାଧାରଣ ଲୋକଙ୍କ ସହ ଚଳଚ୍ଚିତ୍ର ତାରକାମାନେ ମଧ୍ୟ ଏହି ନୃଶଂସ ଘଟଣାକୁ ନେଇ ନିଜର ପ୍ରତିକ୍ରିୟା ଦେଉଛନ୍ତି। କେତେକ ଅଭିଯୁକ୍ତଙ୍କୁ ଫାଶୀ ଦେବାକୁ ଦାବି କରୁଛନ୍ତି। ବର୍ତ୍ତମାନ ଜନ୍ ଅବ୍ରହାମଙ୍କ ନାମ ମଧ୍ୟ ଏହି ତାଲିକାରେ ଅନ୍ତର୍ଭୁକ୍ତ ହୋଇଛି। ସେ ନିଜର କ୍ରୋଧ ପ୍ରକାଶ କରି ପୁରୁଷମାନଙ୍କୁ କଡ଼ା ଚେତାବନୀ ଦେଇଛନ୍ତି।

ସେ କହିଛନ୍ତି ଯେ, ଏହି ଘଟଣା ପରେ ସେ ମହିଳାମାନଙ୍କୁ କୌଣସି ପରାମର୍ଶ ଦେବାକୁ ଚାହୁଁନାହାଁନ୍ତି। ସେ ବିଶ୍ୱାସ କରନ୍ତି ଯେ ଏଥିରେ ମହିଳାମାନଙ୍କର କୌଣସି ଦୋଷ ନାହିଁ। କିନ୍ତୁ ସେ ନିଶ୍ଚିତ ଭାବରେ ପୁରୁଷମାନଙ୍କୁ ଚେତାବନୀ ଦେବାକୁ ଚାହାନ୍ତି ବୋଲି ଜଣାଇଛନ୍ତି।

ରେଡିଓ ସିଟିକୁ ଦେଇଥିବା ଏକ ସାକ୍ଷାତକାରରେ ଜନ୍, ମହିଳା ଡାକ୍ତରଙ୍କୁ ଦୁଷ୍କର୍ମ ଓ ହତ୍ୟା ଘଟଣା ବିଷୟରେ ନିଜର ମତ ରଖୁଥିବା ବେଳେ କହିଥିଲେ ଯେ, 'କେବଳ ପୁରୁଷମାନଙ୍କୁ ଠିକ୍ ଆଚରଣ କରିବାକୁ କହିବି, ନଚେତ୍ ମୁଁ ସେମାନଙ୍କୁ ଫାଡି ଦେବି। ମୁଁ କେବଳ ଚାହୁଁଛି ଯେ ପୁଅମାନଙ୍କୁ ଭଲ ସଂସ୍କାର ଦିଆଯାଉ । ଝିଅମାନଙ୍କୁ ମୁଁ କିଛି କହିବି ନାହିଁ କାରଣ ଏଥିରେ ସେମାନଙ୍କର କିଛି ଦୋଷ ନାହିଁ। ମୁଁ ସମସ୍ତ ପିତାମାତାଙ୍କୁ ଅନୁରୋଧ କରୁଛି ଯେ ସେମାନେ ସେମାନଙ୍କ ପୁଅମାନଙ୍କୁ ଭଲ ସଂସ୍କାର ଏବଂ ଜୀବନର ମୂଲ୍ୟବୋଧ ଶିଖାନ୍ତୁ ଏବଂ ଝିଅମାନଙ୍କୁ ଅଧିକ ଶକ୍ତିଶାଳୀ କରନ୍ତୁ।