କେଜ୍ରିୱାଲଙ୍କ ଅପେକ୍ଷା ଅତିଶି ଭଲ: ଉପରାଜ୍ୟପାଳ

ନୂଆଦିଲ୍ଲୀ: ପୂର୍ବତନ ମୁଖ୍ୟମନ୍ତ୍ରୀ ଅରବିନ୍ଦ କେଜ୍ରିୱାଲଙ୍କ ସହ ଦିଲ୍ଲୀର ଉପରାଜ୍ୟପାଳ ବିନୟ କୁମାର ସାକ୍ସେନାଙ୍କ ସମ୍ପର୍କ କିଏ ବା ନ ଜାଣେ | ଅରବିନ୍ଦ କେଜ୍ରିୱାଲ ଉପରାଜ୍ୟପାଳଙ୍କ କାର୍ଯ୍ୟକୁ ନେଇ ଅନେକ ସମୟରେ ପ୍ରଶ୍ନ ଉଠାଉଥିବାବେଳେ ଏବଂ ଉପରାଜ୍ୟପାଳ ବି ଅନେକ ସମୟରେ କେଜ୍ରିୱାଲଙ୍କ କାର୍ଯ୍ୟଶୈଳୀକୁ ନେଇ କଡା ସମାଲୋଚନା କରିଛନ୍ତି |  ଅନେକ ଥର ସେ ତାଙ୍କ ନାମ ନ ନେଇ ଅରବିନ୍ଦ କେଜ୍ରିୱାଲଙ୍କୁ ଟାର୍ଗେଟ କରିଛନ୍ତି। ତେବେ ଦିଲ୍ଲୀ ଉପରାଜ୍ୟପାଳ ବିନୟ ସାକ୍ସେନା ଆଜି ଦିଲ୍ଲୀର ଇନ୍ଦିରା ଗାନ୍ଧୀ ବୈଷୟିକ ବିଶ୍ୱବିଦ୍ୟାଳୟର ସପ୍ତମ ସମାବର୍ତ୍ତନ ସମାରୋହରେ ଯୋଗ ଦେଇ କହିଛନ୍ତି, "ମୁଁ ବହୁତ ଖୁସି ଯେ ଦିଲ୍ଲୀର ମୁଖ୍ୟମନ୍ତ୍ରୀ ଜଣେ ମହିଳା।

 ମୁଁ ବିଶ୍ୱାସର ସହ କହିପାରିବି ଯେ ସେ ପୂର୍ବ ମୁଖ୍ୟମନ୍ତ୍ରୀଙ୍କ ତୁଳନାରେ ଏକ ହଜାର ଗୁଣ ଭଲ। " ଆପଣଙ୍କୁ କହିରଖୁଛୁ ଯେ ଚଳିତ ବର୍ଷ ସେପ୍ଟେମ୍ବରରେ ଅତିଶି ଦିଲ୍ଲୀର ମୁଖ୍ୟମନ୍ତ୍ରୀ ଭାବରେ ଶପଥ ନେଇଥିଲେ। ପ୍ରକୃତରେ ଦିଲ୍ଲୀର ମଦ ଦୁର୍ନୀତି ମାମଲାରେ ଅରବିନ୍ଦ କେଜ୍ରିୱାଲଙ୍କୁ ସୁପ୍ରିମକୋର୍ଟ ଜାମିନ ପ୍ରଦାନ କରିଥିଲେ। କିନ୍ତୁ ଜାମିନ ସମୟରେ କେଜ୍ରିୱାଲଙ୍କ ଉପରେ ମଧ୍ୟ ଅନେକ ପ୍ରତିବନ୍ଧକ ଲଗାଯାଇଥିଲା।

ଜାମିନ ପ୍ରଦାନ ବେଳେ ସୁପ୍ରିମକୋର୍ଟ କହିଥିଲେ ଯେ ଅରବିନ୍ଦ କେଜ୍ରିୱାଲ ମୁଖ୍ୟମନ୍ତ୍ରୀଙ୍କ କାର୍ଯ୍ୟାଳୟକୁ ଯାଇପାରିବେ ନାହିଁ, କୌଣସି ଫାଇଲରେ ଦସ୍ତଖତ କରିପାରିବେ ନାହିଁ, ଏହି ମାମଲା ସହ ଜଡିତ ସାକ୍ଷୀଙ୍କୁ ପ୍ରଭାବିତ କରିପାରିବେ ନାହିଁ | ଏହାପରେ କେଜ୍ରିୱାଲ ଇସ୍ତଫା ଦେବା ପରେ ଅତିଶିଙ୍କୁ ମୁଖ୍ୟମନ୍ତ୍ରୀ କରାଯାଇଥିଲା | ବର୍ତ୍ତମାନ ଉପରାଜ୍ୟପାଳ ବିନୟ ସକ୍ସେନା ଦିଲ୍ଲୀର ମୁଖ୍ୟମନ୍ତ୍ରୀ ଭାବରେ ଅତିଶିଙ୍କୁ କେଜ୍ରିୱାଲଙ୍କ ଅପେକ୍ଷା ଭଲ ବୋଲି ବର୍ଣ୍ଣନା କରିଛନ୍ତି।