ନିଜ ଭାଇଙ୍କ ରେକର୍ଡ ସହ ସମକକ୍ଷ ହେଲେ ମିଚେଲ ମାର୍ଶ

ନୂଆଦିଲ୍ଲୀ: ମିଚେଲ ମାର୍ଶ ଗତକାଲି ଗୁଜରାଟ ଜାଏଣ୍ଟ୍ସ ବିପକ୍ଷ ମ୍ୟାଚ୍‌ରେ ୧୧୭ ରନ୍‌ର ଏକ ଚମତ୍କାର ଇନିଂସ ଖେଳି ତାଙ୍କ ଆଇପିଏଲ୍ କ୍ୟାରିୟରର ପ୍ରଥମ ଶତକ ହାସଲ କରିଥିଲେ। ଏହା ସହିତ ସେ ତାଙ୍କ ଭାଇଙ୍କ ୧୮ ବର୍ଷ ପୁରୁଣା ରେକର୍ଡର ସମକକ୍ଷ ହୋଇଛନ୍ତି। ମିଚେଲ ମାର୍ଶ ଏବଂ ଶନ୍ ମାର୍ଶ ଏବେ ଆଇପିଏଲ୍‌ରେ ଶତକ ହାସଲ କରିଥିବା ଭାଇମାନଙ୍କ ପ୍ରଥମ ଯୋଡ଼ି ହୋଇଯାଇଛନ୍ତି। ମିଚେଲ ମାର୍ଶ ୫୬ ବଲ୍‌ରେ ତାଙ୍କର ଶତକ ପୂରଣ କରିଥିଲେ |

ବାସ୍ତବରେ ଇଣ୍ଡିଆନ୍ ପ୍ରିମିୟର ଲିଗ୍ ୨୦୦୮ରେ ଆରମ୍ଭ ହୋଇଥିଲା, ଯେତେବେଳେ ଶନ୍ ମାର୍ଶ ପଞ୍ଜାବ କିଙ୍ଗ୍ସ (ପୂର୍ବରୁ କିଙ୍ଗସ୍ ଇଲେଭେନ୍ ପଞ୍ଜାବ) ପାଇଁ ଖେଳି ଏକ ଶତକ ଏବଂ ୫ ଅର୍ଦ୍ଧଶତକ କରିଥିଲେ। ଏବେ ମିଚେଲ ମାର୍ଶ ଆଇପିଏଲ୍ ୨୦୨୫ରେ ସମାନ କୃତିତ୍ୱ ହାସଲ କରିଛନ୍ତି। ମିଚେଲ ଚଳିତ ସିଜିନ୍‌ରେ ୧ ଶତକ ଏବଂ ୫ ଅର୍ଦ୍ଧଶତକ ହାସଲ କରିଛନ୍ତି। ଶନ୍ ମାର୍ଶ ଆଇପିଏଲ୍ ୨୦୦୮ରେ ରାଜସ୍ଥାନ ରୟାଲ୍ସ ବିପକ୍ଷ ମ୍ୟାଚ୍‌ରେ ୬୯ ବଲ୍‌ରେ ୧୧୫ ରନ୍ କରିଥିଲେ। ଏବେ ଆଇପିଏଲ୍ ୨୦୨୫ରେ ମିଚେଲ ମାର୍ଶ ୬୪ ବଲ୍‌ରେ ୧୧୭ ରନ୍ କରିଛନ୍ତି।

ଶନ୍ ମାର୍ଶ ତାଙ୍କ ୭୧ ମ୍ୟାଚ୍ ବିଶିଷ୍ଟ ଆଇପିଏଲ କ୍ୟାରିୟରରେ ୨,୪୭୭ ରନ୍ କରିଥିଲେ। ଅନ୍ୟପକ୍ଷରେ, ମିଚେଲ୍ ମାର୍ଶ ଏପର୍ଯ୍ୟନ୍ତ ୫୪ ମ୍ୟାଚ୍ ରେ ୧,୨୨୬ ରନ୍ କରିଛନ୍ତି ଏବଂ ୩୭ ୱିକେଟ୍ ମଧ୍ୟ ନେଇଛନ୍ତି। 

ମିଚେଲ୍ ମାର୍ଶଙ୍କ ବ୍ୟାଟ୍ ଆଇପିଏଲ ୨୦୨୫ରେ ବହୁତ ରନ୍ ବର୍ଷା କରିଛି। ଏପର୍ଯ୍ୟନ୍ତ ସେ ଲକ୍ଷ୍ନୌ ସୁପର ଜାଏଣ୍ଟ୍ସ ପାଇଁ ୧୨ ମ୍ୟାଚ୍ ରେ ୪୬.୬୭ ହାରରେ ୫୬୦ ରନ୍ କରିଛନ୍ତି। ଏହା ଆଇପିଏଲ ଇତିହାସରେ ପ୍ରଥମ ଥର ଯେ ମିଚେଲ୍ ମାର୍ଶ ଗୋଟିଏ ସିଜିନରେ ୫୦୦ ରୁ ଅଧିକ ରନ୍ କରିଛନ୍ତି। ଏହି ସିଜିନରେ ତାଙ୍କର ପ୍ରଦର୍ଶନ ମଧ୍ୟ ସ୍ୱତନ୍ତ୍ର କାରଣ ଏହା ପୂର୍ବରୁ ଏକ ସିଜିନରେ ତାଙ୍କର ସର୍ବାଧିକ ସ୍କୋର ୨୫୧ ରନ୍ ଥିଲା।