ମହାରାଷ୍ଟ୍ରରେ ୭୬୦୦ କୋଟି ଟଙ୍କାର ପ୍ରକଳ୍ପର ଶିଳାନ୍ୟାସ କଲେ ମୋଦୀ

ମୁମ୍ବାଇ: ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ଆଜି ମହାରାଷ୍ଟ୍ରରେ ଭିଡିଓ କନଫରେନ୍ସିଂ ମାଧ୍ୟମରେ ୭୬୦୦ କୋଟି ଟଙ୍କାର ବିଭିନ୍ନ ବିକାଶମୂଳକ ପ୍ରକଳ୍ପର ଶିଳାନ୍ୟାସ କରିଛନ୍ତି । ପ୍ରଧାନମନ୍ତ୍ରୀ ନାଗପୁରସ୍ଥିତ ଡ. ବାବାସାହେବ ଆମ୍ବେଦକର ଆନ୍ତର୍ଜାତିକ ବିମାନବନ୍ଦରର ଉନ୍ନତିକରଣ ପାଇଁ ମଧ୍ୟ ଶିଳାନ୍ୟାସ କରିଛନ୍ତି । ୭୦୦୦ କୋଟି ଟଙ୍କାରେ ଏହି ବିକାଶ କରାଯାଉଛି । ନାଗପୁର ସହର ଏବଂ ବିଦର୍ଭ ଅଞ୍ଚଳରେ ନିର୍ମାଣ କ୍ଷେତ୍ର, ବିମାନ ଚଳାଚଳ, ପର୍ଯ୍ୟଟନ, ଲଜିଷ୍ଟିକ୍ସ, ସ୍ୱାସ୍ଥ୍ୟସେବା ଆଦି ବହୁମୁଖୀ ବିକାଶ ଦିଗରେ ଏହି ପ୍ରକଳ୍ପ ସହାୟକ ହୋଇପାରିବ । ସେହିପରି ଶିରିଡ଼ି ବିମାନବନ୍ଦରରେ ୬୪୫ କୋଟି ଟଙ୍କା ବ୍ୟୟରେ ହେବାକୁ ଥିବା ନୂତନ ସମନ୍ୱିତ ଟର୍ମିନଲ ବିଲ୍ଡିଂର ଶିଳାନ୍ୟାସ କରିଛନ୍ତି ପ୍ରଧାନମନ୍ତ୍ରୀ ।

 ଶିରିଡ଼ି ଆସୁଥିବା ଧାର୍ମିକ ପର୍ଯ୍ୟଟକମାନଙ୍କୁ ଏହା ବିଶ୍ୱସ୍ତରୀୟ ସୁବିଧା ପ୍ରଦାନ କରିବ । ସାଇବାବାଙ୍କ ଆଧ୍ୟାତ୍ମିକ ନିମ୍ବ ଗଛ ଥିମ୍ ଆଧାରରେ ଏହି ବିଲ୍‌ଡିଂ ନିର୍ମାଣ କରାଯିବ । ସମସ୍ତଙ୍କୁ ସ୍ୱାସ୍ଥ୍ୟସେବା ପ୍ରଦାନ ପାଇଁ ତାଙ୍କ ପ୍ରତିବଦ୍ଧତା ସ୍ୱରୂପ ମହାରାଷ୍ଟ୍ରରେ ୧୦ଟି ମେଡିକାଲ କଲେଜକୁ କାର୍ଯ୍ୟକ୍ଷମ କରାଇଛନ୍ତି ପ୍ରଧାନମନ୍ତ୍ରୀ । ମୁମ୍ବାଇ, ନାସିକ, ଜଲନା, ଅମରାବତୀ, ଗଡ଼ଚିରୋଲି, ବୁଲଧାନା, ୱାସିମ, ଭଣ୍ଡାରା, ହିଙ୍ଗୋଲି ଏବଂ ଅମ୍ବରନାଥ (ଥାନେ)ରେ ଏସବୁ ମେଡିକାଲ କଲେଜ ନିର୍ମାଣ କରାଯାଇଛି । ଏସବୁ କଲେଜରେ ସ୍ନାତକ ଓ ସ୍ନାତକୋତ୍ତର ସିଟ୍ ରହିବା ସହ ଜନସାଧାରଣଙ୍କୁ ବିଶେଷ ତୃତୀୟକ ସ୍ୱାସ୍ଥ୍ୟସେବା ମଧ୍ୟ ପ୍ରଦାନ କରିବ ।

ଭାରତକୁ ‘ସ୍କିଲ କ୍ୟାପିଟାଲ ଅଫ ଦ ୱାର୍ଲ୍ଡ’ ଭାବେ ପରିଚୟ ଦେବାକୁ ଥିବା ଦୃଷ୍ଟିକୋଣକୁ ସଫଳ କରିବା ଲକ୍ଷ୍ୟରେ ପ୍ରଧାନମନ୍ତ୍ରୀ ମୁମ୍ବାଇରେ ଇଣ୍ଡିଆନ ଇନଷ୍ଟିଚ୍ୟୁଟ ଅଫ ସ୍କିଲ୍ସ (ଆଇଆଇଏସ୍‌)କୁ ଉଦଘାଟନ କରିଛନ୍ତି  । ଏହା ଉଦ୍ୟୋଗ କ୍ଷେତ୍ର ପାଇଁ ଅଗ୍ରଣୀ ପ୍ରଯୁକ୍ତି ବିଦ୍ୟାରେ ପାରଙ୍ଗମ ଥିବା ଶ୍ରମ ଶକ୍ତି ପ୍ରସ୍ତୁତ କରିବ । ପବ୍ଲିକ-ପ୍ରାଇଭେଟ ପାର୍ଟନରସିପ୍ ମଡେଲରେ ଏହା ଟାଟା ଏଜୁକେସନ ଆଣ୍ଡ ଡେଭଲପମେଣ୍ଟ ଟ୍ରଷ୍ଟ ଏବଂ ଭାରତ ସରକାରଙ୍କ ସହଭାଗିତାରେ ପ୍ରତିଷ୍ଠା କରାଯାଇଛି । ମେକାଟ୍ରୋନିକ୍ସ, ଆର୍ଟିଫିସିଆଲ ଇଣ୍ଟେଲିଜେନ୍ସ, ଡାଟା ଆନାଲିଟିକ୍ସ, ଇଣ୍ଡଷ୍ଟ୍ରିଆଲ ଅଟୋମେସନ ଏବଂ ରୋବୋଟିକ୍ସ ଆଦି କ୍ଷେତ୍ରରେ ଏହି ଇନଷ୍ଟିଚ୍ୟୁଟ ପ୍ରଶିକ୍ଷଣ ପ୍ରଦାନ କରିବ ।