୧୫ରେ ମୋଦୀଙ୍କ ରାଉରକେଲା ଗସ୍ତ, କଲ୍ୟାଣକାରୀ ଯୋଜନାର କରିବେ ଶୁଭାରମ୍ଭ

ରାଉରକେଲା: ଆସନ୍ତା ନଭେମ୍ବର ୧୫ରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ଦିନିକିଆ ରାଉରକେଲା ଗସ୍ତରେ ଆସୁଛନ୍ତି। ବିଭିନ୍ନ ଜନକଲ୍ୟାଣକାରୀ ଯୋଜନାର ଶୁଭାରମ୍ଭ, ଏକାଧିକ ପ୍ରକଳ୍ପର ଶିଳାନ୍ୟାସ ଓ ଲୋକାର୍ପଣ କରିବାର କାର୍ଯ୍ୟକ୍ରମ ରହିଛି। ଏଥିସହ ବିର୍ସା ମୁଣ୍ଡା ଆଥଲେଟିକ୍‌ ଷ୍ଟାଡିୟମରେ ଆୟୋଜିତ ବିରାଟ ଜନସଭାକୁ ସମ୍ବୋଧିତ କରିବେ। ଆଜି କେନ୍ଦ୍ରଆଦିବାସୀ ମନ୍ତ୍ରୀ ତଥା ସୁନ୍ଦରଗଡ଼ ସାଂସଦ ଜୁଏଲ ଓରାମ ଏହି ସୂଚନା ଦେଇଛନ୍ତି। ସ୍ବତନ୍ତ୍ର ବିମାନରେ ଦିଲ୍ଲୀରୁ ବାହାରି ପୂର୍ବାହ୍ନ ୧୧ଟାରେ ଝାରସୁଗୁଡା ବିମାନବନ୍ଦରରେ ପହଞ୍ଚିବେ। ପୂର୍ବାହ୍ନ ୧୧ଟା ୧୦ ମିନିଟ୍‌ରେ ଝାରସୁଗୁଡାରୁ ସ୍ବତନ୍ତ୍ର ହେଲିକପ୍‌ଟର ବାହାରି ସାଢ଼େ ୧୧ଟାରେ ବିର୍ସା ମୁଣ୍ଡା ଆଥଲେଟିକ୍‌ ଷ୍ଟାଡିୟମରେ ପହଞ୍ଚିବେ। ସହିଦ ମାଧୋ ସିଂହ ହାତଖର୍ଚ୍ଚ ବୃତ୍ତି ଯୋଜନାର ଶୁଭାରମ୍ଭ କରିବେ। ପ୍ରାୟ ୧ ଲକ୍ଷ ଏସ୍‌ଟି ଛାତ୍ରଛାତ୍ରୀଙ୍କ ଆକାଉଣ୍ଟକୁ ଆର୍ଥିକ ସହାୟତା ପଠାଯିବ। ଏଫ୍‌ଆର୍‌ଏ ପୋର୍ଟାଲର ଶୁଭାରମ୍ଭ କରିବେ। ୪୫୦ ଶଯ୍ୟାବିଶିଷ୍ଟ ପ୍ରାଥମିକ ବିଦ୍ୟାଳୟର ଶିଳାନ୍ୟାସ ସହ ୨୯ଟି ଆଶ୍ରମ ବିଦ୍ୟାଳୟର ଉନ୍ନତୀକରଣ କାର୍ଯ୍ୟର ଶୁଭାରମ୍ଭ କରିବେ। ଭୁବନେଶ୍ବରରେ ନିର୍ମାଣ ହେବାକୁ ଥିବା ଜନଜାତି ଭାଷା ଓ ସଂସ୍କୃତିକ ପ୍ରତିଷ୍ଠାନ, ଓଡ଼ିଆ ଅସ୍ମିତା କେନ୍ଦ୍ର, ରାଜ୍ୟ ଆଦିବାସୀ ମ୍ୟୁଜିୟମ୍‌ରେ ସ୍ମରଣିକା ଦୋକାନର ଶିଳାନ୍ୟାସ କରିବେ।

କଟକ ଏସ୍‌ଇବି, ସମ୍ବଲପୁର ବୁର୍ଲାର ଭିମ୍‌ସାର, ବାରିପଦାରେ ଏମ୍‌ସିଏଚ୍‌ରେ ତିନୋଟି ଉତ୍କର୍ଷ କେନ୍ଦ୍ରକୁ ଲୋକାର୍ପଣ କରିବେ। ସୁନ୍ଦରଗଡ଼ ଜିଲ୍ଲାରେ ପ୍ରସ୍ତାବିତ ବିର୍ସା ମୁଣ୍ଡାଙ୍କ ସ୍ମାରକୀ ଶିଳାନ୍ୟାସ କରିବେ। ଶେଷରେ ଜିଲ୍ଲାରେ ୫ ଆଦିବାସୀ ପ୍ରତିଭାଙ୍କୁ ସମ୍ବର୍ଦ୍ଧିତ କରିବା ସହ ୮ଜଣ ଆଦିବାସୀ ଜନଜାତିଙ୍କୁ  ଭୂମିପ୍ରମାଣପତ୍ର ବଣ୍ଟନ କରିବାର କାର୍ଯ୍ୟକ୍ରମ ରହିଛି। ମଧ୍ୟାହ୍ନ ୧୨ଟାରୁ ସାଢ଼େ ୧୨ଟା ପର୍ଯ୍ୟନ୍ତ ବିରାଟ ଜନସଭାକୁ ସମ୍ବୋଧିତ କରିବେ। ଅପରାହ୍ନ ୧୨ଟା ୩୩ ମିନିଟ୍‌ରେ ଝାରସୁଗୁଡା ଦେଇ ଦିଲ୍ଲୀ ଅଭିମୁଖେ ‌ଫେରିଯିବା କାର୍ଯ୍ୟକ୍ରମ ରହିଛି। କାର୍ଯ୍ୟକ୍ରମରେ ମୁଖ୍ୟମନ୍ତ୍ରୀ ମ‌ୋହନଚରଣ ମାଝି, କେନ୍ଦ୍ରଆଦିବାସୀ ମନ୍ତ୍ରୀ ଜୁଏଲ ଓରାମ, ରାଜ୍ୟ ଆଦିବାସୀ ଜନଜାତି ଓ ସଂଖ୍ୟାଲଘୁ ମନ୍ତ୍ରୀ ନିତ୍ୟାନନ୍ଦ ଗଣ୍ଡ, ମୁଖ୍ୟ ଶାସନ ସଚିବ ମନୋଜ ଆହୁଜା ଉପସ୍ଥିତ ରହିବେ।

ପ୍ରଧାନମନ୍ତ୍ରୀଙ୍କ ଗସ୍ତ କାର୍ଯ୍ୟକ୍ରମକୁ ନେଇ ଜିଲ୍ଲା ପ୍ରଶାସନ ଓ ରାଉରକେଲା ଜିଲ୍ଳା ପୁଲିସ ପକ୍ଷରୁ ପ୍ରସ୍ତୁତି ଆରମ୍ଭ ‌ହୋଇଛି। ସୂଚନାଯୋଗ୍ୟ, ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ଗତ ସେପ୍ଟେମ୍ବର ୧୭ରେ ଓଡ଼ିଶା ଗସ୍ତରେ ଆସିଥିଲେ। ସେହିଦିନ ସେ ନିଜ ଜନ୍ମଦିନ ଅବସରରେ ରାଜ୍ୟ ସରକାରଙ୍କ ବହୁ ପ୍ରତିକ୍ଷୀତ ସୁଭଦ୍ରା ଯୋଜନାର ଶୁଭାରମ୍ଭ କରିଥିଲେ। ଏହା ପୂର୍ବରୁ ସେ ଗତ ଜୁନ୍‌ ରେ ଓଡ଼ିଶା ଆସିଥିଲେ। ମୋହନ ମାଝୀ ଓ ତାଙ୍କର କ୍ୟାବିନେଟ ପାଇଁ ଭୁବନେଶ୍ବରରେ ଆୟୋଜିତ ଶପଥ ଗ୍ରହଣ ଉତ୍ସବରେ ଶ୍ରୀ ମୋଦୀ ଯୋଗଦେଇଥିଲେ। ଉଭୟ କାର୍ଯ୍ୟକ୍ରମ ସ୍ଥାନୀୟ ଜନତା ମଇଦାନରେ ଅନୁଷ୍ଠିତ ହୋଇଥିଲା।