ଶିବାଜୀଙ୍କ ମୂର୍ତ୍ତି ଭୁଶୁଡିବା ଘଟଣାରେ ମୁମ୍ବାଇରେ ଶକ୍ତି ପ୍ରଦର୍ଶନ କଲା ଏମଭିଏ

ମୁମ୍ବାଇ: ପୂର୍ବ ଘୋଷଣା ମୁତାବକ ମହାରାଷ୍ଟ୍ରର କୋଲହାପୁରରେ ଛତ୍ରପତି ଶିବାଜୀ ମହାରାଜଙ୍କ ପ୍ରତିମୂର୍ତ୍ତି ଭୁଶୁଡିବା ଘଟଣାକୁ ନେଇ ରାଜନୀତି ତୀବ୍ର ହୋଇଛି। ମହାବିକାଶ ଅଘାଡିର ନେତାମାନେ ମୁମ୍ବାଇରେ ମିଳିତ ହୋଇ ସରକାରଙ୍କ ବିରୋଧରେ ତୀବ୍ର ବିରୋଧ କରିଥିଲେ। ଏହାର ନାମ ଜୋତା ମାର ଆନ୍ଦୋଳନ ରଖାଯାଇଥିଲା | ମହାବିକାଶ ଅଘାଡିର ନେତାମାନେ ଦକ୍ଷିଣ ମୁମ୍ବାଇର ହୁତତମା ଛକଠାରୁ ଗେଟୱେ ଅଫ ଇଣ୍ଡିଆ ଯାଏଁ ଏକ ପଦଯାତ୍ରା କରିଥିଲେ। ଏଥିରେ ଶିବସେନା ୟୁବିଟି ମୁଖ୍ୟ ଉଦ୍ଧବ ଠାକରେ, ଆଦିତ୍ୟ ଠାକରେ, ଏନସିପି (ଏସପି) ମୁଖ୍ୟ ଶରଦ ପାୱାର, ସୁପ୍ରିୟା ସୁଲେ, କଂଗ୍ରେସ ନେତା ନାନା ପାଟୋଲଙ୍କ ସମେତ ବହୁ ଦଳର ପ୍ରମୁଖ ନେତା ଅଂଶଗ୍ରହଣ କରିଥିଲେ।

ଏହି ପଦଯାତ୍ରା ସମୟରେ ଶିବସେନା (ୟୁବିଟି) ମୁଖ୍ୟ ଉଦ୍ଧବ ଠାକରେଙ୍କ ସମେତ ବହୁ ମହାବିକାଶ ଅଘାଡିର ନେତା ମୁଖ୍ୟମନ୍ତ୍ରୀ ଏକନାଥ ସିନ୍ଦେ, ଉପମୁଖ୍ୟମନ୍ତ୍ରୀ ଦେବେନ୍ଦ୍ର ଫଡନାଭିସ୍ ଏବଂ ଅଜିତ ପାୱାରଙ୍କ ପୋଷ୍ଟରରେ ଚପଲ ଏବଂ ଜୋତା ମାଡ କରିଥିଲେ। ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କ କ୍ଷମା ପ୍ରାର୍ଥନା ସମ୍ପର୍କରେ ନେତାମାନେ ଅଭିଯୋଗ କରିଛନ୍ତି ଯେ ତାଙ୍କ କ୍ଷମା ପ୍ରାର୍ଥନା ଗର୍ବରେ ପରିପୂର୍ଣ୍ଣ। ଏହି ସମୟରେ ଶରଦ ପାୱାର କହିଛନ୍ତି ଯେ ମୂର୍ତ୍ତି ଭୁଶୁଡିବା ହେଉଛି ଦୁର୍ନୀତିର ଏକ ଉଦାହରଣ। ରିପୋର୍ଟ ଅନୁଯାୟୀ, ଏନସିପି (ଏସପି) ମୁଖ୍ୟ ଶରଦ ପାୱାର ମଧ୍ୟ ଏନଡିଏ ବିରୋଧରେ ବିକ୍ଷୋଭ ପ୍ରଦର୍ଶନ କରି ମୁମ୍ବାଇର ଗେଟୱେ ଅଫ୍ ଇଣ୍ଡିଆକୁ ପଦଯାତ୍ରାରେ ଯାଇଥିଲେ। ମହାରାଷ୍ଟ୍ର କଂଗ୍ରେସ ସଭାପତି ନାନା ପାଟୋଲ କହିଛନ୍ତି ଯେ ତାଙ୍କ ଅବସ୍ଥା ଭଲ ନାହିଁ, ତଥାପି ଏହି ପଦଯାତ୍ରାରେ ଯୋଗ ଦେଇଛନ୍ତି।

ଶରଦ ପାୱାରଙ୍କ ଦଳର ନେତା ରାଜେଶ ଟୋପେ କହିଛନ୍ତି, ଛତ୍ରପତି ଶିବାଜୀ ମହାରାଜ ହେଉଛି ମହାରାଷ୍ଟ୍ରର ଗର୍ବ ଏବଂ ଆତ୍ମା। ଏହି ଘଟଣା ଆମକୁ ଆଘାତ ଦେଇଛି | ସାମୁଦ୍ରିକ ପ୍ରତିରକ୍ଷା ଏବଂ ନିରାପତ୍ତା ଦିଗରେ ମରାଠା ନୌସେନା ଏବଂ ଛତ୍ରପତି ଶିବାଜୀ ମହାରାଜଙ୍କ ପରମ୍ପରା ଏବଂ ଆଧୁନିକ ଭାରତୀୟ ନୌସେନା ସହିତ ଏହାର ଐତିହାସିକ ସମ୍ପର୍କକୁ ସମ୍ମାନ ଦେବା ଉଦ୍ଦେଶ୍ୟରେ ସିନ୍ଧୁଦୁର୍ଗରେ ଆୟୋଜିତ ନୌସେନା ଦିବସ ସମାରୋହର ଏକ ଅଂଶ ଭାବରେ ଡିସେମ୍ବର ୪ ରେ ଏହି ପ୍ରତିମୂର୍ତ୍ତି ଉନ୍ମୋଚନ କରାଯାଇଥିଲା । ତେବେ ଏହା କିଛିଦିନ ତଳେ ଭୁଶୁଡି ପଡିଥିଲା | ଏହି ଘଟଣାକୁ ବିରୋଧ କରିବା ପାଇଁ ସେପ୍ଟେମ୍ବର ୧ରେ ମହା ବିକାଶ ଅଘାଡି ମୁମ୍ବାଇରେ ଏକ ରାଲି ଆୟୋଜନ କରିବ ବୋଲି ଉଦ୍ଧବ ଠାକରେ ଘୋଷଣା କରିଥିଲେ ।