ବୈତରଣୀର ସୁନାମୁହିଁ ଘାଟରେ ବୁଡି ବାଳକ ମୃତ

ଠାକୁରମୁଣ୍ଡା: ମୟୁରଭଞ୍ଜ ଜିଲ୍ଲା ଠାକୁରମୁଣ୍ଡା ନିକଟବର୍ତ୍ତୀ କେନ୍ଦୁଝର ଜିଲ୍ଲା ଅନ୍ତର୍ଗତ ମନହରପୁର ଗ୍ରାମ ପଞ୍ଚାୟତର ସୁନାମୁହିଁଠାରେ ବୈତରଣୀ ନଦୀରେ ବୁଡ଼ିଯାଇ ଏମ. ମନୋଜ(୧୫) ନାମକ ଜଣେ ବାଳକଙ୍କର ମୃତ୍ୟୁ ହୋଇଯାଇଛି | ଅଗ୍ନିଶମ ବିଭାଗ ଘଟଣାସ୍ଥଳରେ ପହଞ୍ଚି ନଦୀ ଭିତରୁ ବାଳକକୁ ଉଦ୍ଧାର କରି ଠାକୁରମୁଣ୍ଡା ଗୋଷ୍ଠୀ ସ୍ୱାସ୍ଥ୍ୟ କେନ୍ଦ୍ରକୁ ଆଣି ଚିକିତ୍ସା ପାଇଁ ହସ୍ତାନ୍ତର କରିଛି l ବାଳକର ମୃତ୍ୟୁ ଘଟଣାରେ ଶୋକାକୁଳ ପରିବେଶ ସୃଷ୍ଟି ହୋଇଛି l କରଞ୍ଜିଆର କରଡ଼ିଆଠାରେ ମୁଢି ଫ୍ୟାକ୍ଟ୍ରି କରିଥିବା ଏମ. ରବିଙ୍କ ପୁଅ ଏମ. ମନୋଜ ବୋଲି ଜଣାପଡିଛି l ଏମ. ମନୋଜ ଏବଂ ଏମ. ଆଦିତ୍ୟ ଦୁଇ ଯାଆଁଳା ଭାଇ l

ସକାଳ ୯ଟା ସମୟରେ ଉଭୟ ସାଙ୍ଗ ସାଥୀଙ୍କ ସହ ମିଶି ବୈତରଣୀ ନଦୀର ସୁନାମୁହିଁ ନିକଟକୁ ବୁଲିବାକୁ ଯାଇଥିଲେ l ନଦୀରେ ଗାଧୋଇବା ବେଳେ ଏମ. ମନୋଜ ବୁଡିଯିବାରୁ ଠାକୁରମୁଣ୍ଡା ଅଗ୍ନିଶମ ବାହିନୀକୁ ଭାଇ ଏମ. ଆଦିତ୍ୟ ଫୋନ କରିବା ପରେ ଟିମ ପହଞ୍ଚି ଉଦ୍ଧାର କାର୍ଯ୍ୟରେ ଲାଗିଥିଲେ l ଅଗ୍ନିଶମ ବାହିନୀ ବହୁ ଖୋଜାଖୋଜି ପଥର ଖୋଲରେ ଲାଗି ଥିବା ଏମ୍. ମନୋଜକୁ ୨ ଟା ସମୟରେ ଉଦ୍ଧାର କରି ଡାକ୍ତରଖାନାକୁ ଆଣିଥିଲେ l ସେଠାରେ ଡାକ୍ତର ମୃତ ଘୋଷଣା କରିଥିଲେ l ଠାକୁରମୁଣ୍ଡା ଥାନାରେ ଅପମୃତ୍ୟ କେଶ ନଂ ୨୦ ବଳରେ ପୁଲିସ ତଦନ୍ତ ଜାରି ରହିଛି l