୭ ବର୍ଷ ପରେ ନିଜ ବାପା-ମାଙ୍କ ନିକଟକୁ ଫେରିଲା ଝାଡ଼ଖଣ୍ଡର ସାଲୁକା
ଖୋର୍ଦ୍ଧା: ୭ ବର୍ଷ ପୂର୍ବେ ଭୁବନେଶ୍ୱର ରେଳଷ୍ଟେସନରୁ ଉଦ୍ଧାର ହୋଇଥିବା ସାଲୁକା ସାମ୍ବରୀକୁ ଆଜି ୨୧ ବର୍ଷ । ଦୀର୍ଘ ୭ ବର୍ଷ ପରେ ଜିଲ୍ଲା ଶିଶୁ ସୁରକ୍ଷା ୟୁନିଟ୍ ପ୍ରଚେଷ୍ଟାରେ ଆଜି ସାଲୁକା ତା’ର ବାପା-ମା ନିକଟକୁ ଫେରିଯାଇଛି ।
Sambad is now on WhatsApp
Join and get latest news updates delivered to you via WhatsApp
ଜିଲ୍ଲା ଶିଶୁ ସୁରକ୍ଷା ୟୁନିଟ୍ ପକ୍ଷରୁ ମିଳିଥିବା ସୂଚନାନୁସାରେ, ୨୦୧୪ରେ ସାଲୁକା ସମ୍ବାରୀକୁ କୌଣସି କାରଣରୁ ଘର ଠାରୁ ଦୂରେଇ ଯାଇଥିଲା । ଏହାପରେ ସେ ଟ୍ରେନରେ ପ୍ରଥମେ କୋଲକାତା ଓ ପରେ ଭୁବନେଶ୍ୱରରେ ଆସି ପହଂଚିଲା । ଜିଲ୍ଲା ଶିଶୁ ସୁରକ୍ଷା ୟୁନିଟ୍ର ଅପରେସନ୍ ସ୍ମାଇଲ୍ ଅଭିଯାନରେ ସାଲୁକାକୁ ଭୁବନେଶ୍ୱର ରେଳ ଷ୍ଟେସନରୁ ଉଦ୍ଧାର କରାଯାଇଥିଲା । ଏହି ସମୟରେ ସାଲୁକା ନିଜର ଠିକଣା କହିପାରୁନଥିଲା । ଏହା ପରେ ତାଙ୍କୁ ଖୋର୍ଦ୍ଧା ଅତିରିକ୍ତ ଶିଶୁ ମଙ୍ଗଳ ସମିତି ନିକଟରେ ହାଜର କରାଯାଇଥିଲା । ଏହାପରେ ସମିତିଙ୍କ ନିଦେ୍ର୍ଦଶାନୁସାରେ ସାଲୁକାଙ୍କୁ ଭୁବନେଶ୍ୱର ଗାଢ଼କଣର ଆଦୃତା ଶିଶୁ ଯତ୍ନ ଅନୁଷ୍ଠାନରେ ରଖାଯାଇଥିଲା । ପ୍ରଶାସନ ପକ୍ଷରୁ ତା’ର ରକ୍ଷଣାବେକ୍ଷଣ ଓ ପାଠପଢ଼ାର ବ୍ୟବସ୍ଥା କରାଯାଇଥିଲା । ଇତି ମଧ୍ୟରେ ସାଲୁକା ୮ମ ଶ୍ରେଣୀ ପାସ୍ କରିଛନ୍ତି ।
ସରକାରଙ୍କ ନିଦେ୍ର୍ଦଶାନୁସାରେ, ସାଲୁକାର ଆଧାର କାର୍ଡ ପ୍ରସ୍ତୁତ କରିବା ପ୍ରକ୍ରିୟା ଆରମ୍ଭ ହୋଇଥିଲା । ଆଧାରକାର୍ଡ଼ ପ୍ରସ୍ତୁତ କରିବା ସମୟରେ ତାଙ୍କ ଘର ଝାଡ଼ଖଣ୍ଡ ବୋଲି ଜଣାପଡ଼ିଲା । ଏହାପରେ ସାଲୁକାଙ୍କ ଠିକଣା ନେଇ ଅନୁସନ୍ଧାନ କରାଯାଇଥିଲା । ଠିକଣା ଜଣାପଡ଼ିବା ପରେ ଆଦୃତା ଶିଶୁ ଯତ୍ନ ଅନୁଷ୍ଠାନର ଅଧିକ୍ଷକ ମାନସ ରଥ ସାଲୁକାଙ୍କ ପୈତୃକ ଗାଁ ଲୋଟାପାହାଡ଼ର ପୋଷ୍ଟମାଷ୍ଟରଙ୍କ ସହ ଯୋଗାଯୋଗ କରିଥିଲେ । ପୋଷ୍ଟମାଷ୍ଟରଙ୍କ ସହାୟତାରେ ସାଲୁକାଙ୍କ ବାପା ସୌମ୍ୟ ସାମ୍ବରୀ ଓ ମା’ ପାଲୋ ସାମ୍ବରୀ ସହ ସାଲୁକାଙ୍କ ଭାର୍ଚୁଏଲ୍ ସାକ୍ଷାତ କରାଯାଇଥିଲା । ଅନେକ ବର୍ଷ ପରେ ନିଜ ପୁଅକୁ ଦେଖି ସେମାନେ ଭାବ ବିହ୍ୱଳ ହୋଇଯାଇଥିଲେ । ଏହାପରେ ଶିଶୁ ମଙ୍ଗଳ ସମିତିର ନିଦେ୍ର୍ଦଶାନୁସାରେ, ସାଲୁକାଙ୍କ ପିତାମାତା ଖୋର୍ଦ୍ଧାରେ ପହଂଚିଥିଲେ । ସେଠାରେ ତାଙ୍କୁ ସାଲୁକାଙ୍କୁ ହସ୍ତାନ୍ତର କରାଯାଇଛି ।
ସାଲୁକାଙ୍କ ସହ ତାଙ୍କ ପରିବାରର ସାକ୍ଷାତ ଏକ ଦୀର୍ଘ ପ୍ରଚେଷ୍ଟା । ସକୁଶଳେ ତାଙ୍କ ଘରକୁ ଫେରିଥିବାରୁ ସେ ଜିଲ୍ଲା ଶିଶୁ ସୁରକ୍ଷା ୟୁନିଟ୍ର କାଉନ୍ସିଲର ମନସ୍ୱିନୀ ମହାପାତ୍ର, ୟୁନିଟ୍ର ଅଧିକାରୀ ବାଣିଶ୍ରୀ ପଟ୍ଟନାୟକ ଓ ସୁରକ୍ଷା ଅଧିକାରୀ ରବୀନ୍ଦ୍ରନାଥ ସାହୁଙ୍କୁ ସାଲୁକା ଓ ତାଙ୍କ ବାପା-ମା କୃତଜ୍ଞତା ଜଣାଇଛନ୍ତି ।