ଆଜିର ଦିନରେ ଆରବ ସାଗରରେ ବୁଡିଯାଇଥିଲା ସମ୍ରାଟ ଅଶୋକ

ନୂଆଦିଲ୍ଲୀ: ନୂଆବର୍ଷକୁ ନେଇ ଆଜି ସବୁଠି ଉତ୍ସବର ମାହୋଲ ଅଛି, ସମସ୍ତେ ସମସ୍ତଙ୍କୁ ଅଭିନନ୍ଦନ ଜଣାଉଛନ୍ତି | କିନ୍ତୁ ଇତିହାସର ପୃଷ୍ଠାରେ ଆଜି ଭାରତର ବେସାମରିକ ବିମାନ ଉଡାଣ ପାଇଁ ଏକ କଳାଦିନ ଭାବେ ମଧ୍ୟ ଲିପିବଦ୍ଧ ହୋଇଛି | ୧୯୭୮ ମସିହାରେ ଏହି ଦିନ, ଏକ ଏୟାର ଇଣ୍ଡିଆ ବିମାନ ୨୧୩ ଯାତ୍ରୀଙ୍କ ସହ ସମୁଦ୍ରରେ ବୁଡ଼ି ଯାଇଥିଲା। ବମ୍ବେ (ବର୍ତ୍ତମାନ ମୁମ୍ବାଇ) ଅନ୍ତର୍ଜାତୀୟ ବିମାନ ବନ୍ଦରରୁ ଉଡ଼ାଣର କିଛି ସମୟ ପରେ କିଛି ଯାନ୍ତ୍ରିକ ବିଫଳତା ହେତୁ ସମ୍ରାଟ ଅଶୋକ ନାମକ ଏହି ବୋଇଙ୍ଗ ୭୪୭ ଦୁର୍ଘଟଣାଗ୍ରସ୍ତ ହୋଇଥିଲା। ଦୁର୍ଘଟଣାଗ୍ରସ୍ତ ଏୟାର ଇଣ୍ଡିଆ ବୋଇଙ୍ଗ ୭୪୭ ବିମାନରେ ୧୯୦ ଜଣ ଯାତ୍ରୀ ଏବଂ ୨୩ ଜଣ କ୍ରୁ ସଦସ୍ୟ ଥିଲେ। ଏହା ଭାରତ ଇତିହାସରେ ସବୁଠାରୁ ବଡ ବିମାନ ଦୁର୍ଘଟଣା |

ଘଟଣା ପରେ ଏହା ଏକ ଷଡଯନ୍ତ୍ରର ଅଂଶ ହୋଇପାରେ ବୋଲି ସନ୍ଦେହ କରାଯାଉଥିଲା, କିନ୍ତୁ ସମୁଦ୍ରରେ ମିଳିଥିବା ବିମାନ ଆବର୍ଜନାଗୁଡ଼ିକର ଅନୁସନ୍ଧାନ ଏହା ଏକ ଦୁର୍ଘଟଣା ବୋଲି ପ୍ରମାଣିତ ହୋଇଥିଲା। ଜାନୁଆରୀ ୧, ୧୯୭୮ରେ, ଏୟାର ଇଣ୍ଡିଆର ବିମାନ ବୋଇଙ୍ଗ ୭୪୭ ମୁମ୍ବାଇର ସାଣ୍ଟା କ୍ରୁଜ ବିମାନବନ୍ଦରରୁ (ବର୍ତ୍ତମାନ ଛତ୍ରପତି ଶିବାଜୀ ମହାରାଜ ଅନ୍ତର୍ଜାତୀୟ ବିମାନବନ୍ଦର) ଦୁବାଇ ଅନ୍ତର୍ଜାତୀୟ ବିମାନବନ୍ଦର ଅଭିମୁଖେ ଯାତ୍ରା କରିଥିଲା।

ବିମାନଟି ଉଡାଣ କରିବାର କିଛି ସମୟ ପରେ ଦ୍ରୁତ ଗତିରେ ଖସିବା ଆରମ୍ଭ କରିଥିଲା | ବିମାନଟି ଉଡ଼ାଣର ମାତ୍ର ୧୦୧ ସେକେଣ୍ଡ ପରେ ଆରବ ସାଗରରେ ଖସିପଡିଥିଲା। ବିମାନରେ ୧୯୦ ଜଣ ଯାତ୍ରୀ ଏବଂ ୨୩ ଜଣ କ୍ରୁ ସଦସ୍ୟ ଥିଲେ ଏବଂ ସମସ୍ତଙ୍କର ମୃତ୍ୟୁ ହୋଇଥିଲା। ଏୟାର ଇଣ୍ଡିଆ ଫ୍ଲାଇଟ୍ ୮୫୫ ଏକ ବୋଇଙ୍ଗ ୭୪୭-୨୩୭ବି ଥିଲା, ଯାହା ୧୯୭୧ ରେ ନିର୍ମିତ ହୋଇଥିଲା ଏବଂ ଏହାର ନାମ ସମ୍ରାଟ ଅଶୋକ ରଖାଯାଇଥିଲା | 

ଏହି ବିମାନର ଅଧିନାୟକ ମଦନ ଲାଲ କୁକର ଥିଲେ, ଯିଏ ସେହି ସମୟରେ ୫୧ ବର୍ଷ ବୟସର ଥିଲେ ଏବଂ ୧୯୫୬ ମସିହାରେ ଏୟାର ଇଣ୍ଡିଆରେ ଯୋଗ ଦେଇଥିଲେ। ୪୩ ବର୍ଷୀୟ ଇନ୍ଦୁ କୁମାରୀ ସେହି ସମୟରେ ବିମାନର ପ୍ରଥମ ଅଧିକାରୀ ଥିଲେ | ପରେ ଅନୁସନ୍ଧାନ କରାଯିବା ପରେ ବିମାନରେ କୌଣସି ପ୍ରକାରର ବିସ୍ଫୋରଣର ପ୍ରମାଣ ମିଳି ନଥିଲା।