ପ୍ରତୀକଙ୍କୁ ଜନ୍ମଦେବାର ୧୫ ଦିନ ପରେ ଚାଲିଯାଇଥିଲେ ସ୍ମିତା

ନୂଆଦିଲ୍ଲୀ: ବଲିଉଡର ଦିବଂଗତ ଅଭିନେତ୍ରୀ ସ୍ମିତା ପାଟିଲ ଇଣ୍ଡଷ୍ଟ୍ରିର ଜଣେ ପ୍ରତିଭାଶାଳୀ ଅଭିନେତ୍ରୀ ଥିଲେ। କିନ୍ତୁ ସେ ବହୁତ କମ୍ ବୟସରେ ଏହି ଦୁନିଆ ଛାଡି ଚାଲିଯାଇଥିଲେ । ସ୍ମିତା ତାଙ୍କ ଶେଷ ଦିନଗୁଡ଼ିକରେ ବହୁତ କଷ୍ଟ ପାଇଥିଲେ। ତାଙ୍କର ଅବସ୍ଥା ଭଲ ନଥିଲା। ସ୍ମିତା ୧୩ ଡିସେମ୍ବର ୧୯୮୬ରେ ୩୧ ବର୍ଷ ବୟସରେ ମୃତ୍ୟୁବରଣ କରିଥିଲେ। ୧୫ ଦିନ ପୂର୍ବେ ସେ ପୁଅ ପ୍ରତୀକକୁ ଜନ୍ମ ଦେଇଥିଲେ। କିନ୍ତୁ ପୁଅ ଜନ୍ମ ସମୟରେ ଅନେକ ଜଟିଳତା ଦେଖାଦେଲା। ଡିସେମ୍ବର ୧୨ ତାରିଖରେ ସ୍ମିତାଙ୍କ ଅବସ୍ଥା ଆହୁରି ଖରାପ ହୋଇଯାଇଥିଲା ବୋଲି ରିପୋର୍ଟ ଆସିଥିଲା। ତାଙ୍କ ମୁହଁ ହଳଦିଆ ପଡ଼ିଯାଇଥିଲା ଏବଂ ସେ ବାନ୍ତି କରୁଥିଲେ। ଏହା ପରେ ତାଙ୍କୁ ଡାକ୍ତରଖାନା ନିଆଯାଇଥିଲା ଏବଂ ସେ କୋମାକୁ ଚାଲିଯାଇଥିଲେ। ତାଙ୍କର ୧୩ ଡିସେମ୍ବରରେ ମୃତ୍ୟୁ ହୋଇଥିଲା।

ସ୍ମିତାଙ୍କ ଶେଷ ଇଚ୍ଛା ଥିଲା ତାଙ୍କ ଅନ୍ତିମ ସଂସ୍କାର ଏକ ବଧୂ ପରି କରାଯାଉ। ତାଙ୍କ ମୃତ୍ୟୁ ପରେ, ତାଙ୍କର ଇଚ୍ଛା ପୂରଣ ହୋଇଥିଲା ଏବଂ ତାଙ୍କୁ ବଧୂ ପରି ସଜାଯାଇଥିଲା। ଉଲ୍ଲେଖ ଥାଉ କି ଯେ ସ୍ମିତା ଏବଂ ରାଜଙ୍କ ପ୍ରେମ କାହାଣୀ ବହୁତ ଚର୍ଚ୍ଚାରେ ଥିଲା। ସ୍ମିତା ପାଟିଲ ୧୯୮୫ ମସିହାରେ ରାଜ ବବରଙ୍କୁ ବିବାହ କରିଥିଲେ। ରାଜ ପୂର୍ବରୁ ବିବାହିତ ଥିଲେ ଏବଂ ଦୁଇଟି ସନ୍ତାନର ପିତା ଥିଲେ। ରାଜ ସ୍ମିତାଙ୍କ ପାଇଁ ତାଙ୍କ ପ୍ରଥମ ସ୍ତ୍ରୀ ନାଦିରାଙ୍କୁ ଛାଡି ଦେଇଥିଲେ।  ତଥାପି, ସେମାନଙ୍କର ଛାଡପତ୍ର ହୋଇନଥିଲା। ସ୍ମିତାଙ୍କ ବାପାମାଆ ମଧ୍ୟ ଏହି ସମ୍ପର୍କରେ ଖୁସି ନଥିଲେ। କିନ୍ତୁ ସ୍ମିତାଙ୍କ ମୃତ୍ୟୁ ପରେ, ରାଜ ବବର ତାଙ୍କ ସ୍ତ୍ରୀ ନାଦିରାଙ୍କ ପାଖକୁ ଫେରି ଆସିଥିଲେ ।

ରାଜ ବବର ଏବଂ ସ୍ମିତା ପାଟିଲଙ୍କ ପୁଅର ନାମ ପ୍ରତୀକ ବବର। ପ୍ରତୀକ ଏବେ ବଲିଉଡ ଇଣ୍ଡଷ୍ଟ୍ରିରେ ସକ୍ରିୟ ଅଛନ୍ତି। ସେ କିଛି ଦିନ ପୂର୍ବରୁ ପ୍ରିୟା ବାନାର୍ଜୀଙ୍କୁ ବିବାହ କରିଥିଲେ। ରାଜ ବବର ଏହି ବିବାହରେ ଯୋଗ ଦେଇ ନଥିଲେ। ଆଉ ଏହାପରେ ପ୍ରତୀକ ତାଙ୍କ ସାଙ୍ଗିଆକୁ ପ୍ରତୀକ ସ୍ମିତା ପାଟିଲ କରିଛନ୍ତି।