ପାର୍ବଣ ଋତୁ ପାଇଁ ଅଣ୍ଟା ଭିଡିଲା ରେଳବାଇ, ଚାଲିବ ୬ ହଜାର ସ୍ପେଶାଲ ଟ୍ରେନ

ନୂଆଦିଲ୍ଲୀ: ଭାରତୀୟ ରେଳ ପାଇଁ ବର୍ଷର ସବୁଠାରୁ ବଡ ଆହ୍ୱାନ ହେଉଛି ପାର୍ବଣର ଋତୁ | ଏହି ସମୟ ମଧ୍ୟରେ ଲୋକମାନେ ଏକ ସହରରୁ ଅନ୍ୟ ସହରକୁ ବିଭିନ୍ନ ପର୍ବ ପାଳନ କରିବାକୁ ଯାଆନ୍ତି | ଏଥିପାଇଁ ସେମାନଙ୍କ ପାଇଁ ସବୁଠାରୁ ଶସ୍ତା, ସବୁଠାରୁ ଆରାମଦାୟକ ଏବଂ ନିରାପଦ ଯାତ୍ରା ହେଉଛି ଟ୍ରେନ୍ | ଏଭଳି ପରିସ୍ଥିତିରେ ପର୍ବପର୍ବାଣିରେ କୋଟି କୋଟି ଲୋକଙ୍କୁ ନିଜ ଗନ୍ତବ୍ୟସ୍ଥଳରେ ପହଂଚାଇବା ପାଇଁ ରେଳବାଇ ସମ୍ମୁଖରେ ଏକ ବଡ଼ ଆହ୍ୱାନ ସୃଷ୍ଟି ହୁଏ ।

ଚଳିତ ବର୍ଷ ପାର୍ବଣ ଋତୁ ସମୟରେ ଲୋକଙ୍କ ଭିଡ଼କୁ ନିୟନ୍ତ୍ରଣ କରିବା ପାଇଁ ରେଳବାଇ ୬୦୦୦ଟି ସ୍ୱତନ୍ତ୍ର ଟ୍ରେନ୍ ଚଳାଇବାକୁ ନିଷ୍ପତ୍ତି ନେଇଛି | ଏହା ବ୍ୟତୀତ ପ୍ରାୟ ସମସ୍ତ ଟ୍ରେନରେ ସାଧାରଣ କୋଚ୍ ମଧ୍ୟ ବୃଦ୍ଧି କରାଯିବ | ଦୁର୍ଗା ପୂଜା, ଦୀପାବଳି ଏବଂ ଛଠ ସମୟରେ ଅନେକ ରେଳ ମାର୍ଗରେ ପ୍ରବଳ ଭିଡ଼ ଜମିଥାଏ, ବିଶେଷକରି ବିହାର, ଉତ୍ତରପ୍ରଦେଶ ଏବଂ ପଶ୍ଚିମବଙ୍ଗକୁ ଅଧିକ ଯାତ୍ରୀ ଯାଇଥାନ୍ତି  |

 ରେଳମନ୍ତ୍ରୀ ଅଶ୍ୱିନୀ ବୈଷ୍ଣବ ଶୁକ୍ରବାର ଦିନ କହିଛନ୍ତି ଯେ ଚଳିତ ବର୍ଷ ଉତ୍ସବ ପାଇଁ ରେଳବାଇ ପ୍ରସ୍ତୁତ ହୋଇଛି। ଅଦ୍ୟାବଧି ସମୁଦାୟ ୫୯୭୫ଟି ସ୍ୱତନ୍ତ୍ର ଟ୍ରେନ୍ ଚଳାଇବାକୁ ଘୋଷଣା କରାଯାଇଛି। ଗତ ବର୍ଷ ଏହି ସଂଖ୍ୟା ଥିଲା ୪୪୨୯ | ପୂଜା ସମୟରେ ଏହା ଏକ କୋଟିରୁ ଅଧିକ ଯାତ୍ରୀଙ୍କୁ ଘରକୁ ନେବା ଆଣିବାରେ ସାହାଯ୍ୟ କରିବ ବୋଲି ସେ କହିଛନ୍ତି। ରେଳ ମନ୍ତ୍ରୀ କହିଛନ୍ତି ଯେ ପାର୍ବଣ ଋତୁରେ ପ୍ରବଳ ଭିଡ଼କୁ ଦୃଷ୍ଟିରେ ରଖି ୧୦୮ ଟ୍ରେନରେ ଅତିରିକ୍ତ ସାଧାରଣ ଶ୍ରେଣୀ କୋଚ୍ ଯୋଡିବା ପାଇଁ ମଧ୍ୟ ବ୍ୟବସ୍ଥା କରାଯାଇଛି |