ବିହାର ଶିଶୁ ମୃତ୍ୟୁ ମାମଲାରେ କେନ୍ଦ୍ର ଓ ରାଜ୍ୟ ସରକାରଙ୍କୁ ସୁପ୍ରିମକୋର୍ଟଙ୍କ ଜବାବ ତଲବ: ୧୦ ଦିନ ଭିତରେ ରିପୋର୍ଟ ଦାଖଲ ପାଇଁ ନିର୍ଦ୍ଦେଶ
ନୂଆଦିଲ୍ଲୀ: ବିହାର ଶିଶୁ ମୃତ୍ୟୁ ମାମଲାରେ ଉଭୟ କେନ୍ଦ୍ର ସରକାର ଓ ରାଜ୍ୟ ସରକାରଙ୍କୁ ଜବାବ ମାଗିଲେ ସୁପ୍ରିମକୋର୍ଟ । ଏହା ଉପରେ ଆଜି ଶୁଣାଣି କରି ଆସନ୍ତା ୧୦ ଦିନ ଭିତରେ ଜବାବ ରଖିବାକୁ ଉଭୟ କେନ୍ଦ୍ର ଓ ରାଜ୍ୟ ସରକାରଙ୍କୁ ନିର୍ଦ୍ଦେଶ ଦେଇଛନ୍ତି ସର୍ବୋଚ୍ଚ ଅଦାଲତ । ସ୍ବାସ୍ଥ୍ୟସେବା, ପୁଷ୍ଟିକର ଖାଦ୍ୟ ଓ ପରିଚ୍ଛନ୍ନତାରସ୍ତର କିଭଳି ରହିଛି ସେ ସଂପର୍କରେ ସତ୍ୟପାଠ ଦାଖଲ କରିବାକୁ କୁହାଯାଇଛି । ଏହି ୩ଟି ସୁବିଧା ଉପଲବ୍ଧ ହେବା ମୌଳିକ ଅଧିକାର । ଏଣୁ ଏହା ମିଳିବା ଆବଶ୍ୟକ ବୋଲି କୋର୍ଟ କହିଛନ୍ତି ।
Sambad is now on WhatsApp
Join and get latest news updates delivered to you via WhatsApp
ଏହି ମୌଳିକ ଅଧିକାର ଉପଲବ୍ଧ କରାଇବା ଲାଗି କୌଣସି ଯୋଜନା ଲାଗୁ ହୋଇଛି କି ବୋଲି କୋର୍ଟ ସରକାରଙ୍କୁ ପ୍ରଶ୍ନ କରିଛନ୍ତି । ବିହାରରେ ମସ୍ତିଷ୍କ ଜ୍ବରରେ ଶିଶୁ ମୃତ୍ୟୁ ଥମିବାର ନା ନେଉନାହିଁ । ଏ ପର୍ଯ୍ୟନ୍ତ ମୃତ୍ୟୁ ସଂଖ୍ୟା ୧୪୦ ଟପିଲାଣି । ତେଣୁ ଏହା ଉପରେ କିଭଳି ନିୟନ୍ତ୍ରଣ କରାଯାଇପାରିବ ସେ ନେଇ ବିଚାର କରିବାକୁ କୋର୍ଟରେ ଆବେଦନ କରାଯାଇଥିଲା । ବିହାର ସରକାରଙ୍କୁ ସ୍ବାସ୍ଥ୍ୟସେବା ସୁବିଧା ସୁଯୋଗ ବୃଦ୍ଧି ନିମନ୍ତେ ନିର୍ଦ୍ଦେଶ ଦେବାକୁ ଆବେଦନରେ ଦର୍ଶାଯାଇଥିଲା । ତା’ସହ କେନ୍ଦ୍ର ସରକାରଙ୍କୁ ମଧ୍ୟ ଏ ଦିଗରେ ପଦକ୍ଷେପ ନେବା ପାଇଁ କୁହାଯାଇଥିଲା। ଗତ ବୁଧବାର ଏହା ଉପରେ ଆବେଦନ ହୋଇଥିଲା ଏବଂ କୋର୍ଟ ଆଜି ଶୁଣାଣି କରିବାକୁ ସ୍ଥିର କରିଥିଲେ ।