ରାସ୍ତା ପାର ହେବାବେଳେ ଧକ୍କା ଦେଲା ଗାଡି: କାରର ପଛ କ୍ୟାମେରାରେ କଏଦ ହେଲା ଭିଡିଓ

ନୂଆଦିଲ୍ଲୀ: ରାସ୍ତା ପାର ହେଉଥିବାବେଳେ ଧକ୍କା ଦେଲା ଦ୍ରୁତ ଗତିରେ ଯାଉଥିବା ଗାଡି | ଆଉ ଏହି ଧକ୍କାରେ ଜଣେ ବ୍ୟକ୍ତି ଉପରକୁ ଉଠିଯାଇ ତଳେ କଚାଡି ହୋଇପଡିଥିଲେ | ଦୁର୍ଘଟଣା ଏତେ ଭୟଙ୍କର ଥିଲା ଯେ ଘଟଣାସ୍ଥଳରେ ହିଁ ତାଙ୍କ ପ୍ରାଣବାୟୁ ଉଡିଯାଇଛି | ରାଜସ୍ଥାନର ସିକର ଜିଲ୍ଲାର ନୀମକଥାନା ଅଞ୍ଚଳର ସଦର ଥାନା ଅଞ୍ଚଳର ଚୌକଡି ରାସ୍ତାରେ ୩ ଦିନ ପୂର୍ବେ ଘଟିଥିବା ଏକ ସଡ଼କ ଦୁର୍ଘଟଣାର ଏକ ଭିଡିଓ ସାମ୍ନାକୁ ଆସିଛି। ପାଦରେ ଚାଲି ଯାଉଥିବା ଜଣେ ବ୍ୟକ୍ତିଙ୍କୁ ଏକ ଅଜଣା ଗାଡ଼ି ଧକ୍କା ଦେବାରୁ ତାଙ୍କର ମୃତ୍ୟୁ ହୋଇଯାଇଛି | ଘଟଣାର ହୃଦୟ ବିଦାରକ ଭିଡିଓ ଏବେ ସାମ୍ନାକୁ ଆସିଛି।

ଭିଡିଓ ଦେଖିବା ପରେ ସମସ୍ତେ ଆଶ୍ଚର୍ଯ୍ୟ ହୋଇଯାଇଛନ୍ତି। ଭିଡିଓରେ ସ୍ପଷ୍ଟ ଭାବରେ ଦେଖାଯାଉଛି ଯେ ଅଜଣା ଗାଡ଼ିର ଧକ୍କା ଏତେ ଜୋରରେ ଥିଲା ଯେ ରାସ୍ତା ପାର ହେଉଥିବା ବ୍ୟକ୍ତି ଉପରକୁ ଉଠିଯାଇ ପ୍ରାୟ ୨୦ ଫୁଟ ଦୂରରେ ପଡ଼ିଯାଇଥିଲେ। ପାଖରେ ଥିବା ଲୋକମାନେ ଗୁରୁତର ଅବସ୍ଥାରେ ବ୍ୟକ୍ତିଙ୍କୁ ଜିଲ୍ଲା ହସ୍ପିଟାଲକୁ ନେଇଯାଇଥିଲେ ଯେଉଁଠାରେ ଡାକ୍ତର ତାଙ୍କୁ ମୃତ ଘୋଷଣା କରିଥିଲେ। ଘଟଣାର ଭିଡିଓ ଅଜଣା ଗାଡ଼ି ଆଗରେ ଯାଉଥିବା କାରର ପଛ କ୍ୟାମେରାରେ କଏଦ ହୋଇଥିଲା।

ସୋସିଆଲ ମିଡିଆରେ ମିଳିଥିବା ସୂଚନା ଅନୁଯାୟୀ, ଚାଲାର ବାସିନ୍ଦା ସୁଭାଷ ଯୋଶୀ ଚୌକଡି ରାସ୍ତାରେ ଥିବା ତାଙ୍କ ଇଟା ଭାଟିରୁ ଘରକୁ ଚାଲିଯାଉଥିଲେ। ରାସ୍ତା ପାର ହେଉଥିବା ସମୟରେ ପଛରୁ ଆସୁଥିବା ଏକ ଅଜଣା ଗାଡ଼ି ତାଙ୍କୁ ଧକ୍କା ଦେଇଥିଲା। ଧକ୍କା ଏତେ ଜୋରଦାର ଥିଲା ଯେ ବ୍ୟକ୍ତି ଜଣକ ପ୍ରାୟ ୨୦ ଫୁଟ ଦୂରରେ ପଡ଼ିଯାଇଥିଲେ । ଘଟଣା ପରେ ଡ୍ରାଇଭର ଗାଡ଼ି ନେଇ ଫେରାର ହୋଇଯାଇଥିଲା । ଲୋକମାନେ ଆହତଙ୍କୁ ଏକ ଘରୋଇ ଗାଡ଼ିରେ ନୀମକଥାନା ହସ୍ପିଟାଲକୁ ପଠାଇଥିଲେ, ଯେଉଁଠାରେ ଡାକ୍ତର ତାଙ୍କୁ ମୃତ ଘୋଷଣା କରିଥିଲେ।