କାମାକ୍ଷାନଗର: ବଜାର ମଧ୍ୟ ଦେଇ ଦୈନିକ ଶତାଧିକ କୋଇଲା ଟ୍ରକ ଯାତାୟତକୁ ବିରୋଧ ଅଭିଯୋଗରେ ଗ୍ରାମବାସୀମାନେ  ରାସ୍ତାରୋକ କରିଛନ୍ତି l କାମାକ୍ଷାନଗର -ଅନଗୁଳ ୫୩ ନମ୍ବର ଜାତୀୟ ରାଜପଥ ର ପରଜଙ୍ଗ ପେଟ୍ରୋଲ ପମ୍ପ ନିକଟରେ  ରାସ୍ତାରୋକ କରିଛନ୍ତି ପରଜଙ୍ଗ ଗ୍ରାମବାସୀ l

Advertisment

ସୂଚନା ଅନୁସାରେ ପରଜଙ୍ଗ ରେଲୱେ ଷ୍ଟେସନ ନିକଟରେ ଥିବା କୋଇଲା ଡିପୋକୁ ପରଜଙ୍ଗ ବଜାର ଅଞ୍ଚଳ ଦେଇ ଦୈନିକ ଶତାଧିକ ଟ୍ରକ ଯିବାଆସିବା କରୁଛନ୍ତି l ଫଳରେ ଗ୍ରାମବାସୀମାନେ ରାସ୍ତାରେ ଯିବାଆସିବାରେ ଅସୁବିଧା ଭୋଗ କରୁଥିବା ବେଳେ ଧୂଳି, ଧୂଆଁ ଓ କୋଇଲା ଗୁଣ୍ଡ ଯୋଗୁଁ ହଇରାଣ ହରକତ ହେଉଛନ୍ତି l ବିଭିନ୍ନ ଆବଶ୍ୟକ କାମରେ ବଜାର, କଲେଜ, ବ୍ଲକ କାର୍ଯ୍ୟାଳୟ କୁ ଆସୁଥିବା ଲୋକମାନେ ହଇରାଣ ହେଉଛନ୍ତି l ତେଣୁ କୋଇଲା ଟ୍ରକ ଗୁଡ଼ିକ କିପରି ବଜାର ରାସ୍ତାରେ ଯିବାଆସିବା ବନ୍ଦ କରାଯିବ ସେନେଇ ଗ୍ରାମବାସୀ ପେଟ୍ରୋଲ ପମ୍ପ ଛକରେ ଜାତୀୟ ରାଜପଥ  କରିଛନ୍ତି l

ଏ ସମ୍ପର୍କରେ ବାରମ୍ବାର ବିଭାଗୀୟ ଅଧିକାରୀ ତଥା  ଜିଲ୍ଲାପାଳ, ଉପଜିଲ୍ଲାପାଳଙ୍କୁ ଜଣାଇବା ପରେ ବି କୌଣସି ପ୍ରତିକାର ବ୍ୟବସ୍ଥା ନହେବାରୁ ଗ୍ରାମର ଶତାଧିକ ଲୋକ ରାସ୍ତାରୋକରେ ସାମିଲ ହୋଇଛନ୍ତି l ରାସ୍ତାରୋକ ଫଳରେ ରାସ୍ତାର ଉଭୟ ପାର୍ଶ୍ଵରେ ଶତାଧିକ ଯାନବାହାନ ଅଟକି ରହିଥିବା ବେଳେ କାମାକ୍ଷାନଗର ଓ ଅନଗୁଳ ମଧ୍ୟରେ ଯାତାୟତ ଠପ ରହିଛି l ତୁରନ୍ତ ସମସ୍ୟାର ସମାଧାନ ନ ହେଲେ ଆଗକୁ ତୀବ୍ର ଆନ୍ଦୋଳନ ହେବାନେଇ ଗ୍ରାମବାସୀମାନେ କହିଛନ୍ତି l