ପାକିସ୍ତାନର ଏହି ଦଳ ପାଇଁ ଖେଳୁଥିବାର ନଜର ଆସିବେ ୱାର୍ଣ୍ଣର

ନୂଆଦିଲ୍ଲୀ: ଅଷ୍ଟ୍ରେଲିଆର କିମ୍ବଦନ୍ତୀ ବ୍ୟାଟ୍ସମ୍ୟାନ ଡେଭିଡ୍ ୱାର୍ଣ୍ଣର ୨୦୨୫ରେ ପାକିସ୍ତାନ ସୁପର ଲିଗ୍ ଖେଳିବେ | କରାଚୀ କିଙ୍ଗସ୍ ୱାର୍ଣ୍ଣରଙ୍କୁ ଦଳରେ ସାମିଲ କରିଛି। ପିଏସଏଲ ଡ୍ରାଫ୍ଟ ସମୟରେ ୱାର୍ଣ୍ଣରଙ୍କୁ ଚୟନ କରାଯାଇଥିଲା। ସେ ପ୍ଲାଟିନମ୍ ବର୍ଗର ଖେଳାଳି ହୋଇଛନ୍ତି। ୱାର୍ଣ୍ଣର ପୂର୍ବରୁ ଆଇପିଏଲ ୨୦୨୫ର ମେଗା ନିଲାମରେ ମଧ୍ୟ ଅଂଶଗ୍ରହଣ କରିଥିଲେ। କିନ୍ତୁ ତାଙ୍କୁ ଆଇପିଏଲରେ କୌଣସି ଦଳ କିଣି ନଥିଲା। କିନ୍ତୁ ଏବେ ସେ ନିଶ୍ଚିତ ଭାବରେ ପିଏସଏଲରେ ଖେଳିବେ।

ଆଇପିଏଲ ୨୦୨୫ ମେଗା ନିଲାମରେ ୱାର୍ଣ୍ଣରଙ୍କ ମୂଳ ମୂଲ୍ୟ ୨ କୋଟି ଟଙ୍କା ଥିଲା। ହେଲେ ତାଙ୍କୁ କେହି କିଣିନଥିଲେ | ଆଉ ଏବେ ତାଙ୍କୁ ପାକିସ୍ତାନ ସୁପର ଲିଗ୍ ପାଇଁ ମନୋନୀତ କରାଯାଇଛି। ୱାର୍ଣ୍ଣର ଏହି ସିଜନରେ କରାଚୀ କିଙ୍ଗସର ଡ୍ରାଫ୍ଟରେ ସାମିଲ ହୋଇଥିବା ପ୍ରଥମ ଖେଳାଳି ହୋଇଛନ୍ତି। ୱାର୍ଣ୍ଣର ତାଙ୍କର ବିସ୍ଫୋରକ ବ୍ୟାଟିଂ ପାଇଁ ଜଣାଶୁଣା। ସେ ଆଇପିଏଲରେ ଅନେକ ଥର ଭଲ ପ୍ରଦର୍ଶନ କରିଛନ୍ତି। ୱାର୍ଣ୍ଣର ଦିଲ୍ଲୀ କ୍ୟାପିଟାଲ୍ସ ଏବଂ ସନରାଇଜର୍ସ ହାଇଦ୍ରାବାଦ ପାଇଁ ଖେଳିଛନ୍ତି। ଏବେ ସେ ପିଏସଏଲରେ କରାଚୀ କିଙ୍ଗସ ପାଇଁ ଖେଳିବେ । ଯଦି ଆମେ ୱାର୍ଣ୍ଣରଙ୍କ ଏପର୍ଯ୍ୟନ୍ତର ରେକର୍ଡ ବାବଦରେ କହିବା ତେବେ ସେ ଏପର୍ଯ୍ୟନ୍ତ ୧୮୪ଟି ଆଇପିଏଲ ମ୍ୟାଚ୍ ଖେଳି ୬୫୬୫ ରନ୍ କରିଛନ୍ତି। ଏହି ସମୟ ମଧ୍ୟରେ ସେ ୪ଟି ଶତକ ଏବଂ ୬୨ଟି ଅର୍ଦ୍ଧଶତକ ହାସଲ କରିଥିଲେ । ସେ ବିଗ୍ ବ୍ୟାସ୍ ଲିଗ୍‌ରେ ୧୯ଟି ମ୍ୟାଚ୍ ଖେଳିଥିଲେ । ଏହି ସମୟ ମଧ୍ୟରେ ସେ ୬୨୫ ରନ କରିଥିଲେ । ୱାର୍ଣ୍ଣର ବାଂଲାଦେଶ ପ୍ରିମିୟର ଲିଗ୍ ଏବଂ କାରିବିଆନ ପ୍ରିମିୟର ଲିଗ୍ ମଧ୍ୟ ଖେଳିଛନ୍ତି।

ୱାର୍ଣ୍ଣରଙ୍କ ସହିତ କରାଚୀ କିଙ୍ଗସ୍ ଆଡାମ ମିଲନେଙ୍କୁ ମଧ୍ୟ ଦଳରେ ସାମିଲ କରିଛି। ସେ ତାଙ୍କର ଘାତକ ବୋଲିଂ ପାଇଁ ଜଣାଶୁଣା। କରାଚୀ କିଙ୍ଗସ୍ ଆବାସ ଆଫ୍ରିଦିଙ୍କୁ ମଧ୍ୟ ଦଳରେ ସାମିଲ କରିଛି। ସେ ପାକିସ୍ତାନ ପାଇଁ ଟି-୨୦ ଅନ୍ତର୍ଜାତୀୟ ମ୍ୟାଚ୍ ଖେଳିଛନ୍ତି। ଏହି ଉଭୟ ଖେଳାଳି ପ୍ଲାଟିନମ୍ ବର୍ଗରେ ମଧ୍ୟ ଅଛନ୍ତି।