ଚର୍ଚ୍ଚରେ ଜୟ ଶ୍ରୀରାମ ସ୍ଲୋଗାନ ଦେଇ ଅଡୁଆରେ ୟୁଟ୍ୟୁବର

ନୂଆଦିଲ୍ଲୀ: ମେଘାଳୟର ପୂର୍ବ ଖାସି ପାହାଡ ଜିଲ୍ଲାର ଏକ ଚର୍ଚ୍ଚରେ ଜବରଦସ୍ତ ପ୍ରବେଶ କରି 'ଜୟ ଶ୍ରୀ ରାମ'ର ସ୍ଲୋଗାନ ଦେଇ ଲୋକଙ୍କ ଧାର୍ମିକ ଭାବନାକୁ ଆଘାତ ଦେଇଥିବାରୁ ମେଘାଳୟ ପୁଲିସ ଏକ ମାମଲା ରୁଜୁ କରିଛି। ଜଣେ ଅଧିକାରୀ ଶୁକ୍ରବାର ଦିନ ଏହି ସୂଚନା ଦେଇଛନ୍ତି। ଅଧିକାରୀ କହିଛନ୍ତି ଯେ ବ୍ୟକ୍ତି ଜଣକ ଗୁରୁବାର ଦିନ ମୋଉଲିନଙ୍ଗ ଗାଁର ଚର୍ଚ୍ଚରେ ପ୍ରବେଶ କରିଥିଲେ ଏବଂ 'ଜୟ ଶ୍ରୀ ରାମ' ନାରା ଦେଉଥିବା ବେଳେ ସୋସିଆଲ ମିଡିଆରେ ଭିଡିଓ ପୋଷ୍ଟ କରିଥିଲେ। ଏହି ଘଟଣା ବାବଦରେ ଜଣାପଡିବା ପରେ ପୁଲିସ ଉକ୍ତ ଯୁବକଙ୍କ ବିରୋଧରେ ମାମଲା ରୁଜୁ କରିଛି | ମୁଖ୍ୟମନ୍ତ୍ରୀ କହିଛନ୍ତି, “ଏହି କାର୍ଯ୍ୟ ସୁଚିନ୍ତିତ ଭାବେ କରାଯାଇଥିବା ଜଣାପଡିଛି। ଆଇନଗତ କାର୍ଯ୍ୟାନୁଷ୍ଠାନ ନିଆଯିବ | ସେହିପରି ପୁଲିସ ପକ୍ଷରୁ କୁହାଯାଇଛି ଯେ ଏ ସମ୍ପର୍କରେ ଅଭିଯୋଗ ପାଇବା ପରେ ଆମେ ଇନଷ୍ଟାଗ୍ରାମରେ ଆକାଶ ସାଗର ନାମକ ଜଣେ ବ୍ୟକ୍ତିଙ୍କ ବିରୋଧରେ ମାମଲା ରୁଜୁ କରିଛୁ ଏବଂ ତଦନ୍ତ ଚାଲିଛି ଦୋଷୀକୁ ଧରିବା ପାଇଁ ଉଦ୍ୟମ କରାଯାଉଛି।

ସେ କହିଛନ୍ତି, “ସାଗର ଜାଣିଶୁଣି ଏବଂ ପୂର୍ବ ଯୋଜନା ଅନୁଯାୟୀ ଅଣ-ଖ୍ରୀଷ୍ଟିଆନ ଗୀତ ଗାଇ ସ୍ଲୋଗାନ ଦେଇଥିଲେ। ଏହି କାର୍ଯ୍ୟ ସୁଚିନ୍ତିତ ଭାବରେ କରାଯାଇଥିଲା | ସାମ୍ପ୍ରଦାୟିକ ବିଭ୍ରାଟ ସୃଷ୍ଟି କରିବା, ସଂଖ୍ୟାଲଘୁ ସଂସ୍କୃତିକୁ ଅପମାନିତ କରିବା ସହିତ ଧାର୍ମିକ ସ୍ୱାଧୀନତାର ସମସ୍ତ ସାମ୍ବିଧାନିକ ଅଧିକାରକୁ ଉଲ୍ଲଂଘନ କରିବା ଉଦ୍ଦେଶ୍ୟରେ ଏହା କରାଯାଇଛି | 

ଅନ୍ୟପଟେ ସିପିସି ସଭାପତି ନବ ଭଟ୍ଟାଚାର୍ଯ୍ୟ କହିଛନ୍ତି, “ସୋସିଆଲ ମିଡିଆରେ ଏକ ଭିଡିଓକୁ ଦେଖି ଆମେ ଦୁଃଖିତ | ଏହି ଘଟଣା ଶାନ୍ତି ପ୍ରେମୀ ରାଜ୍ୟର ସମସ୍ତଙ୍କର ଧାର୍ମିକ ଭାବନାକୁ ଆଘାତ ଦେଇଛି | ଆମେ ଅଭିଯୁକ୍ତଙ୍କ କାର୍ଯ୍ୟକଳାପକୁ ନିନ୍ଦା କରୁଛୁ ଏବଂ ଆଇନ ଅନୁଯାୟୀ ଅଭିଯୁକ୍ତଙ୍କ ବିରୋଧରେ କଠୋର କାର୍ଯ୍ୟାନୁଷ୍ଠାନ ଗ୍ରହଣ କରିବାକୁ ପୁଲିସକୁ ଅନୁରୋଧ କରୁଛୁ।