ବିଗ୍ ବସ୍ ହାଉସରେ ଭାଇଜାନ୍‌ଙ୍କୁ ଭାଗବତ ଗୀତା ଉପହାର ଦେଲେ ଅନିରୁଦ୍ଧ ଆଚାର୍ଯ୍ୟ ମହାରାଜ

ମୁମ୍ବାଇ: ବିଗ୍ ବସ୍ ପ୍ରଶଂସକଙ୍କ ପାଇଁ ଆଜି ହେଉଛି ଏକ ବିଶେଷ ଦିନ। ଆଜି (ରବିବାର) ସୋ’ର ୧୮ତମ ସିଜନର ପ୍ରିମିୟର୍ ହେବାକୁ ଯାଉଛି। ସୋ’କୁ ନେଇ ଏବେ ଅନେକ ଗୁଜବ ଶୁଣିବାକୁ ମିଳୁଛି। ଅନେକ ପ୍ରୋମୋ ମଧ୍ୟ ରିଲିଜ୍ ହୋଇଛି ଓ ପ୍ରତିଯୋଗୀଙ୍କ ନାମକୁ ନେଇ ଏବେ ଖୁବ ଆଲୋଚନା ଆରମ୍ଭ ହୋଇଛି। ସଲମାନ ଖାନ ଏଥର ସୋ' ହୋଷ୍ଟ କରୁଛନ୍ତି। ନିକଟରେ ବିଗ୍ ବସ୍ ସୋ’ର ସେଟରୁ ସଲମାନ ଖାନଙ୍କ ଏକ ଫଟୋ ଭାଇରାଲ ହେବାରେ ଲାଗିଛି।

ବିଗ୍ ବସ୍ ଫ୍ୟାନ ପେଜରେ ନିକଟରେ ଏକ ଫଟୋ ସେୟାର କରାଯାଇଛି। ଏହି ଫଟୋରେ ସଲମାନ ଖାନ ଏବଂ ଅନିରୁଦ୍ଧ ଆଚାର୍ଯ୍ୟଙ୍କୁ ଏକାଠି ଦେଖିବାକୁ ମିଳିଛି। ଅନିରୁଦ୍ଧ ଆଚାର୍ଯ୍ୟ ମହାରାଜ ସଲମାନ ଖାନଙ୍କୁ ଏକ ଭଗବତ ଗୀତା ଉପହାର ଦେଉଥିବାର ନଜର ଆସିଛନ୍ତି। ଏହି ଫଟୋର କ୍ୟାପସନରେ ଲେଖାଯାଇଛି - ସୋ’ ଏବଂ ପ୍ରତିଯୋଗୀମାନଙ୍କୁ ଆଶୀର୍ବାଦ ଦେବା ପାଇଁ ଶ୍ରୀ ଅନିରୁଦ୍ଧ ଆଚାର୍ଯ୍ୟ ମହାରାଜ ବିଗ୍ ବସ୍ ୧୮ର ସେଟ୍‌ରେ ପହଞ୍ଚିଥିଲେ। ମହାରାଜ ଜୀ ସଲମାନ ଖାନଙ୍କୁ ଭାଗବତ ଗୀତା ଉପହାର ଦେଇଛନ୍ତି।

ବିଗ୍ ବସ୍ ୧୮ର ଗ୍ରାଣ୍ଡ୍ ପ୍ରିମିୟର୍ ଆଜି ରାତି ୯ଟାରୁ ଆରମ୍ଭ ହେବାକୁ ଯାଉଛି। ଏହି ସୋ’କୁ କଲର୍ସ ଚ୍ୟାନେଲ ଓ ଜିଓ ସିନେମା ଆପରେ ଦେଖିହେବ। ଏଥର ସୋ’ରେ ସମୟର ତାଣ୍ଡବ ଦେଖିବାକୁ ମିଳିବ। ସୋ’ର ପ୍ରୋମୋ ଅନୁଯାୟୀ ବିଗ୍ ବସ୍ ଏଥର ସମୟ ସହିତ ଖେଳିବାକୁ ଯାଉଛନ୍ତି। ସେମାନେ ପ୍ରତିଯୋଗୀମାନଙ୍କର ଅତୀତ, ବର୍ତ୍ତମାନ ଓ ଭବିଷ୍ୟତକୁ ଦେଖିବେ।

ସୋ’ର ଅନେକ ପ୍ରୋମୋ ରିଲିଜ୍ ହୋଇଛି। ଏହି ପ୍ରୋମୋରୁ ପ୍ରଶଂସକମାନେ ଅନୁମାନ କରିଛନ୍ତି ଯେ, ଏଥର ଆଲିସ୍ କୌଶିକ, ଭିଭିଆନ୍ ଡିସେନା, ଶେହଜାଡା ଧାମି, ଶିଳ୍ପା ଶିରୋଦକର, ଚାହତ ପାଣ୍ଡେ ଓ ଇଶା ସିଂଙ୍କ ଭଳି ଅନେକ ତାରକାମାନଙ୍କୁ ଏହି ସୋ’ରେ ଦେଖିବାକୁ ମିଳିବ।