ଜବରଦଖଲରେ ୟୁଜିଆଇଇର ୨ ଏକର ଜମି: ଦୁଇବର୍ଷ ହେଲା ଚାଲିଛି ମିକ୍ସର ପ୍ଲାଣ୍ଟ

ରାଉରକେଲା: ସ୍ମାର୍ଟସିଟିରେ ଜମି ଜବରଦଖଲ ନୂଆ ନୁହେଁ। ଯିଏ ଯେଉଁଠି ସୁଯୋଗ ପାଇଲା, ସେଠାକାର ଜମି ଜବରଦଖଲକୁ ନେଇ ଘର ତିଆରାକଲା। ବସ୍ତିଠାରୁ ଆରମ୍ଭକରି ଅନ୍ୟ ସମସ୍ତ ପ୍ରମୁଖ ଅଞ୍ଚଳରେ ଏଭଳି ଜବରଦଖଲ ନିତିଦିନିଆ ହେଲାଣି। ଏବେ ଯାନ୍ତ୍ରିକ ଶିକ୍ଷାନୁଷ୍ଠାନର ବହୁମୂଲ୍ୟ ଜମିକୁ ଅକ୍ତିଆରକରି କାରଖାନା ସ୍ଥାପନ କରିବା ଘଟଣା ଲୋକଲୋଚନକୁ ଆସିଛି। ତେବେ ଏହି ଜବରଦଖଲ କୌଣସି ଉପାନ୍ତ ଅଞ୍ଚଳର ଶିକ୍ଷାନୁଷ୍ଠାନରେ ହୋଇନି, ବରଂ ସହରର କେନ୍ଦ୍ରସ୍ଥଳଭାବେ ପରିଚିତ ଜେଲ୍‌ ରୋଡ୍‌ରେଥିବା ଉତ୍କଳମଣି ଗୋପବନ୍ଧୁ ଇନ୍‌ଷ୍ଟିଚ୍ୟୁଟ୍‌ ଅଫ୍‌ ଇଞ୍ଜିନିଅରିଂ(ୟୁଜିଆଇଇ)ରେ ଏହା ପରିଲକ୍ଷିତ ହୁଏ। କଲେଜ କର୍ତ୍ତୃପକ୍ଷ ବାରମ୍ବାର ସ୍ଥାନୀୟ ତହସିଲ କାର୍ଯ୍ୟାଳୟ, ଅତିରିକ୍ତ ଜିଲ୍ଲାପାଳ, ଜିଲ୍ଲାପାଳଙ୍କ ଦ୍ବାରସ୍ଥ ହୋଇଥିଲେ ମଧ୍ୟ କିଛି ସୁଫଳ ମିଳୁନି।