ଚୋରି ମାମଲାରେ ୮ ଗିରଫ; ନଗଦ ସମେତ ସୁନା ଅଳଙ୍କାର ଜବତ

ବାରିପଦା: ମୟୂରଭଞ୍ଜ ଜିଲ୍ଲାର ବିଭିନ୍ନ ସ୍ଥାନରୁ ଚୋରି ଅଭିଯୋଗରେ ପୁଲିସ ୮ ଜଣ ଅଭିଯୁକ୍ତଙ୍କୁ ଗିରଫ କରିଛି। ଅଭିଯୁକ୍ତମାନେ ହେଲେ ରାଜା ଓରଫ ରାଜକିଶୋର ବାରିକ (୨୦),  ରାହୁଲ ଡିଗର (୨୦), ଭୁଣ୍ଡୁର ଓରଫ ମନୋଜ କୁମାର ବେହେରା (୨୦), ଅସ୍ମିତ ପାତ୍ର (୨୦), ଶରତ ଚନ୍ଦ୍ର ପାତ୍ର (୫୦), ଲାଦେନ ଓରଫ ସୋମନାଥ ପାଲ, ବାବୁଲୁ ଅଧିକାରୀ ଓ ଶିବ ବେହେରା (୨୫)। ଏମାନେ ଭଞ୍ଜପୁର, ବାରିପଦା ସଦର ଏବଂ ବାରିପଦା ଟାଉନ୍ ଅଞ୍ଚଳରେ ବିଭିନ୍ନ ଘରେ ଚୋରି କରିଥିଲେ।

ଭଂଜପୁର ଥାନା ଅଧୀନ ରଘୁନାଥପୁରର ୨୨ ନମ୍ବର ୱାର୍ଡ ନିବାସୀ କୈଳାଶ ପାତ୍ରଙ୍କ ପୁଅ ଅଭିଯୋଗକାରୀ ବିକାଶ ପାତ୍ର (୩୪) ଚୋରି ଘଟଣା ନେଇ ଗତ ୧୩ ତାରିଖ ରାତି ୯ଟାରେ ଏକ ଅଭିଯୋଗ କରିଥିଲେ। ଅଭିଯୋଗ ଆଧାରରେ ପୁଲିସ ଥାନାରେ ମାମଲା ରୁଜୁ କରି ଘଟରାର ତଦନ୍ତ ଆରମ୍ଭ କରିଥିଲା। ତଦନ୍ତ ସମୟରେ ଘଟଣାସ୍ଥଳର ସିସିଟିଭି ଫୁଟେଜ୍ ଏବଂ ପି.ଏସ୍. ମାମଲା ନମ୍ବର-୩୩୭/୨୪ର ଘରଗୁଡିକର ପରୀକ୍ଷା କରାଯାଇଥିଲା ଏବଂ ଦୁଇଜଣ ସନ୍ଦେହୀ ବ୍ୟକ୍ତିଙ୍କୁ ଚିହ୍ନଟ କରାଯାଇଥିଲା, ଯେଉଁମାନେ ହେଉଛନ୍ତି ରାଜା ଏବଂ ଭୁଣ୍ଡୁର। ସେମାନଙ୍କୁ ଗିରଫ କରାଯାଇଥିଲା ଏବଂ ପଚରାଉଚରା ବେଳେ  ଅନ୍ୟ ସହଯୋଗୀମାନଙ୍କ ବିଷୟରେ ଜଣାପଡ଼ିଥିଲା। 

ପୁଲିସ କହିଛି ଅଭିଯୁକ୍ତମାନେ ଭଞ୍ଜପୁର, ବାରିପଦା ସଦର ଏବଂ ବାରିପଦା ଟାଉନ ଥାନା ଅଞ୍ଚଳରୁ ଚୋରି କରିଥିଲେ ଏବଂ ସମସ୍ତ ଚୋରି ଜିନିଷ ସେମାନଙ୍କ ମଧ୍ୟରେ ବାଣ୍ଟିଥିଲେ।  

ଜବତ ଜିନିଷ ଗୁଡ଼ିକ ହେଲା ଏକ ବାଇକ୍‌, ଏକ ବୁଲେଟ୍‌, ନଗଦ ୪୦,୦୦୦ ଟଙ୍କା, ୧୦ ଆଭାସ୍ ଲ୍ୟାପ୍ଟପ୍, ୨ଟି ଟିଭି, ଡେଲ୍ କମ୍ପ୍ୟୁଟର୍ ସହିତ ସିପିୟୁ,  ରୁପା ବ୍ରେସଲେଟ୍, ରୁପା ଆଙ୍ଗୁଠି, ଜୋଡ଼ା ରୁପା ଗୋଡ଼ ଆଙ୍ଗୁଠି, ରୁପା କମରପଟି, ଜୋଡ଼ା ରୁପା ଗୋଡ଼ପଟି (ପିଲାଙ୍କ ପାଇଁ), ରୁପା ବଲ୍, ଜୋଡା ରୁପା ବାଙ୍ଗଲ୍, ୩ଟି ମୋବାଇଲ୍‌ ଫୋନ୍‌ ଓ ୧୦୦ ଗ୍ରାମରୁ ଅଧିକ ସୁନା ଅଳଙ୍କାର ଜବତ ହୋଇଛି। ପୁଲିସ୍ ଅଧିକାରୀମାନେ ଅଧିକ ତଥ୍ୟ ପାଇଁ ତଦନ୍ତ ଜାରି ରଖିଛନ୍ତି ଏବଂ ଅଭିଯୁକ୍ତମାନଙ୍କୁ ନ୍ୟାୟାଳୟରେ ଉପସ୍ଥାପନ କରିବାକୁ ପ୍ରସ୍ତୁତି ଚାଲିଛନ୍ତି।