ନୂଆଦିଲ୍ଲୀ: ମନୋରଂଜନ ଜଗତରୁ ଏକ ଦୁଃଖଦ ଖବର ଆସୁଛି। ପ୍ରସିଦ୍ଧ ଚଳଚ୍ଚିତ୍ର ତଥା ଟିଭି ଅଭିନେତା ମୁକୁଲ ଦେବଙ୍କର ଦେହାନ୍ତ ହୋଇଛି। କିଛି ଦିନ ହେବ ଅସୁସ୍ଥ ଥିଲେ ମୁକୁଲ। ତେବେ ଗତକାଲି ବିଳମ୍ବିତ ରାତିରେ ଶେଷ ନିଶ୍ୱାସ ତ୍ୟାଗ କରିଛନ୍ତି। ତାଙ୍କୁ ମୃତ୍ୟୁ ବେଳକୁ ୫୪ ବର୍ଷ ବୟସ ହୋଇଥିଲା। ଅଭିନେତାଙ୍କ ମୃତ୍ୟୁରେ ପୁରା ବଲିଉଡ୍ ଇଣ୍ଡଷ୍ଟ୍ରିରେ ଶୋକର ଛାୟା ଖେଳିଯାଇଛି। କିନ୍ତୁ ପରିବାର ପକ୍ଷରୁ ଏପର୍ଯ୍ୟନ୍ତ କୌଣସି ବୟାନ ଦିଆଯାଇ ନାହିଁ, ଯାହା ତାଙ୍କ ମୃତ୍ୟୁକୁ ନେଇ ଅନେକ ପ୍ରଶ୍ନ ଉଠାଇଛି।

Advertisment

ଅଭିନେତା ମୁକୁଲଙ୍କ ବିଷୟରେ କହିବାକୁ ଗଲେ, ସେ ୧୭ ସେପ୍ଟେମ୍ବର ୧୯୭୦ରେ ଦିଲ୍ଲୀର ଏକ ପଞ୍ଜାବୀ ପରିବାରରେ ଜନ୍ମଗ୍ରହଣ କରିଥିଲେ। ତାଙ୍କ ବାପା ହରି ଦେବ ଦିଲ୍ଲୀ ପୁଲିସରେ ଜଣେ ଆସିଷ୍ଟାଣ୍ଟ କମିଶନର ଥିଲେ ଏବଂ ତାଙ୍କ ଭାଇ ରାହୁଲ ଦେବ ମଧ୍ୟ ଫିଲ୍ମ ଇଣ୍ଡଷ୍ଟ୍ରିର ଜଣେ ଜଣାଶୁଣା ଚେହେରା। ମୁକୁଲ ସ୍କୁଲରେ ଦୂରଦର୍ଶନର ଏକ କାର୍ଯ୍ୟକ୍ରମରେ ନୃତ୍ୟ ପ୍ରଦର୍ଶନ କରିବାର ପ୍ରଥମେ ସୁଯୋଗ ପାଇଥିଲେ। ସେ ମାଇକେଲ ଜ୍ୟାକସନଙ୍କୁ ଶ୍ରଦ୍ଧାଞ୍ଜଳି ସ୍ୱରୂପ ନୃତ୍ୟ କରିଥିଲେ। ଏହିଠାରେ ତାଙ୍କ ଭିତରେ ଥିବା କଳାକାରର ମୂଳଦୁଆ ସ୍ଥାପନ ହୋଇଥିଲା। 

୧୯୯୬ ମସିହାରେ, ଅଭିନେତା ମୁକୁଲ ଟିଭି ଶୋ' 'ମୁମକିନ୍'ରେ କାମକରି ଅଭିନୟ ଜଗତରେ ପ୍ରବେଶ କରିଥିଲେ। ସେଠାରୁ ତାଙ୍କୁ ପରିଚୟ ମିଳିଥିଲା। ସେ 'କାହାନି ଘର ଘର କି', 'ଲଭ୍ ୟୁ ଜିନ୍ଦେଗି' ଏବଂ 'ସିଆଇଡି' ଭଳି ଲୋକପ୍ରିୟ ଟିଭି ଶୋ’ରେ ମଧ୍ୟ କାମ କରିଥିଲେ। ବର୍ଷ ବର୍ଷ ଧରି ଟିଭିରେ କାମ କରିବା ପରେ, ମୁକୁଲ ଚଳଚ୍ଚିତ୍ର ଆଡକୁ ମୁହାଁଇଥିଲେ। 

ଅଭିନେତା ମୁକୁଲ ଦେବ ଇନ୍ଦିରା ଗାନ୍ଧୀ ଜାତୀୟ ଉଡ଼ନ୍ତା ଏକାଡେମୀର ଜଣେ ତାଲିମପ୍ରାପ୍ତ ପାଇଲଟ୍ ଥିଲେ। ତାଙ୍କର ଶେଷ ଇନଷ୍ଟାଗ୍ରାମ ପୋଷ୍ଟରେ, ସେ ନିଜକୁ ଏକ ବିମାନ ଉଡ଼ାଉଥିବାର ଦେଖାଇଥିଲେ। 

 

ସେ କେବଳ ହିନ୍ଦୀ ଚଳଚ୍ଚିତ୍ରରେ ନୁହେଁ ବରଂ ତାମିଲ, ତେଲୁଗୁ, ପଞ୍ଜାବୀ ଏବଂ ବଙ୍ଗାଳୀ ଚଳଚ୍ଚିତ୍ରରେ ମଧ୍ୟ ଗୁରୁତ୍ୱପୂର୍ଣ୍ଣ ଭୂମିକା ଗ୍ରହଣ କରିଥିଲେ। ୱାଜୁଦ୍,ଏକ ଖିଲାଡି ଏକ୍ ହସିନା, ୟମଲା ପଗଲା ଦିୱାନା, ମେରଥିଆ ଗ୍ୟାଙ୍ଗଷ୍ଟର୍ ଓ ଜୋରାୱାର୍ ଭଳି ଚଳଚ୍ଚିତ୍ରରେ ଅଭିନୟ କରିଥିଲେ। ତାଙ୍କର ଅଭିନୟ ଏବଂ ଗମ୍ଭୀର ଭୂମିକା ଯୋଗୁଁ ସେ ଦର୍ଶକଙ୍କ ହୃଦୟରେ ଏକ ସ୍ୱତନ୍ତ୍ର ସ୍ଥାନ ସୃଷ୍ଟି କରିଥିଲେ। 

Entertainment