ଘଣ୍ଟା ପିଛା ୧୦କିମି ବେଗରେ ଅଗ୍ରସର ହେଉଛି ବାତ୍ୟା, ତାଣ୍ଡବ ରଚିବା ଆଶଙ୍କା

ଭୁବନେଶ୍ବର: ସାମୁଦ୍ରିକ ଝଡ଼ ବାତ୍ୟା ‘ଦାନା’ ପ୍ରଭାବରେ ଉପକୂଳବର୍ତ୍ତୀ ଜିଲ୍ଲାଗୁଡ଼ିକରେ ଗତକାଲି ଠାରୁ ତୁହାକୁତୁହା ବର୍ଷା ହେଉଛି। ଆଜି ବର୍ଷାର ପରିମାଣ ବଢ଼ିଛି। କିଛିସ୍ଥାନରେ ମଧ୍ୟମରୁ ପ୍ରବଳ ବର୍ଷା ହୋଇଛି। ପବନର ବେଗ ମଧ୍ୟ ବଢ଼ିବାରେ ଲାଗିଛି। ଏହାରି ମଧ୍ୟରେ ଭୁବନେଶ୍ବର ଆଞ୍ଚଳିକ ପାଣିପାଗ ବିଜ୍ଞାନ କେନ୍ଦ୍ର ନିର୍ଦ୍ଦେଶିକା ମନୋରମା ମହାନ୍ତି ଗଣମାଧ୍ୟମକୁ କହିଛନ୍ତି, ବାତ୍ୟା ‘ଦାନା’ ପାରାଦୀପ ଠାରୁ ୧୫୦କିମି ଦୂରରେ ରହିଛି। ବିଗତ ୬ ଘଣ୍ଟାରେ ଏହା ଘଣ୍ଟା ପିଛା ୧୦କିମି ବେଗରେ ଏହା ଉତ୍ତର-ଉତ୍ତର-ପଶ୍ଚିମ ଦିଗରେ ଗତି କରୁଛି।

ବାତ୍ୟାର ଗତି ଏହି ହିସାବରେ ହେଲେ, ତାହେଲେ ସ୍ଥଳଭାଗରେ ଲ୍ୟାଣ୍ଡଫଲ ବେଳକୁ ସକାଳ ୬ଟା ପରବର୍ତ୍ତୀ ସମୟ ହେବ। ଅନ୍ୟପଟରେ ଯଦି ବାତ୍ୟାର ଘଣ୍ଟା ପ୍ରତି ବେଗ ୧୦କିମିରୁ ଅଧିକ ହୁଏ, ତା’ହେଲେ ଲ୍ୟାଣ୍ଡଫଲ ମଧ୍ୟ ରାତ୍ରୀରେ ହୋଇପାରେ। ‌ତେବେ ବାତ୍ୟାର ଗତି ମନ୍ଥର ହେଲେ ସ୍ଥଳଭାଗରେ ତାଣ୍ଡବ ରଚିବାର ଆଶଙ୍କା ରହୁଛି। 

ଶ୍ରୀମତୀ ମହାନ୍ତି କହିଛନ୍ତି ଯେ, ବାଲେଶ୍ବର, ଭଦ୍ରକ, କେନ୍ଦ୍ରାପଡ଼ା ଓ ଜଗତସିଂହପୁରରେ ପବନର ବେଗ ଘଣ୍ଟା ପିଛା ୧୦୦ରୁ ୧୧୦କିମି ରହିବ। ସର୍ବାଧିକ ୧୨୦କିମି ହେବ। ମୟୂରଭଂଜ, ଯାଜପୁର, କଟକରେ ଏହା ୬୦ରୁ ୮୦ ଓ ସର୍ବାଧିକ ୯୦କିମି ହୋଇପାରେ। ପୁରୀ, ଖୋର୍ଦ୍ଧା, ଢେଙ୍କାନାଳ, କେନ୍ଦୁଝରରେ ପବନର ବେଗ ଘଣ୍ଟା ପିଛା ୬୦ରୁ ୭୦ ରହିବାକୁ ଥିବା ବେଳେ ସର୍ବାଧିକ ୮୦କିମି ରହିପାରେ। ସେହିପରି ସୁନ୍ଦରଗଡ଼ରେ ପବନର ବେଗ ଘଣ୍ଟା ପିଛା ୫୦ରୁ ୬୦କିମି ହୋଇପାରେ। ସମ୍ବଲପୁର, ଦେବଗଡ଼, ଅନୁଗୁଳ, ବୌଦ୍ଧ, ନୟାଗଡ଼ ଓ ଗଂଜାମରେ ପବନର ଘଣ୍ଟା ପିଛା ବେଗ ୪୦ରୁ ୫୦କିମି ଆକଳନ କରାଯାଇଛି। 

ପାଣିପାଗ ବିଭାଗ ପକ୍ଷରୁ କୁହାଯାଇଛି ଯେ, ଅକ୍ଟୋବର ୨୫ରେ ବର୍ଷା ନେଇ ଅନୁଗୁଳ, କେନ୍ଦ୍ରାପଡ଼ା, ଜଗତସିଂହପୁର, କଟକ, ଯାଜପୁର, ଭଦ୍ରକ, ଢେଙ୍କାନାଳ ଓ ପୁରୀ ଜିଲ୍ଲାକୁ ରେଡ ୱାର୍ଣ୍ଣିଂ ଜାରି କରାଯାଇଛି। ସେହିପରି କେନ୍ଦୁଝର, ମୟୂରଭଂଜ, ବାଲେଶ୍ବର, ନୟାଗଡ଼, ବୌଦ୍ଧ ଓ ସୋନପୁରକୁ ଅରେଞ୍ଜ ୱାର୍ଣ୍ଣିଂ ଜାରି ହୋଇଛି। ବିଗତ ୨୪ ଘଣ୍ଟା ମଧ୍ୟରେ ପାରାଦୀପରେ ୨୫.୮ମିମି ଓ ଚାନ୍ଦବାଲିରେ ୨୪.୭ମିମି ବର୍ଷା ରେକର୍ଡ କରାଯାଇଛି।