ଖଡ଼ିଆଳ ଆର୍ ଆଣ୍ଡ ବିର କନିଷ୍ଠ ଯନ୍ତ୍ରୀ ସୁଶାନ୍ତ ସେଠୀ ଭିଜିଲାନ୍ସ ଦ୍ବାରା ଗିରଫ

ନୂଆପଡ଼ା: ନୂଆପଡ଼ା ଜିଲ୍ଲା ଖଡ଼ିଆଳର ଆର୍ ଆଣ୍ଡ ବିର କନିଷ୍ଠ ଯନ୍ତ୍ରୀ ସୁଶାନ୍ତ ସେଠୀଙ୍କୁ ଭିଜିଲାନ୍ସ ଗିରଫ କରିଛି। ଆୟବହିର୍ଭୂତ ସଂପତ୍ତି ଠୁଳ ଅଭିଯୋଗରେ ଭୁବନେଶ୍ବର, ପିପିଲି ଓ ନୂଆପଡ଼ା ସମେତ ସୁଶାନ୍ତ ସେଠୀଙ୍କ ୮ଟି ଠିକଣାରେ ଗତକାଲି ଏକକାଳୀନ ଚଢ଼ଉ କରିଥିଲା ଭିଜିଲାନ୍ସ। ତାଙ୍କର ସଂପତ୍ତି ଆକଳନ କରିବା ପରେ କନିଷ୍ଠ ଯନ୍ତ୍ରୀ ସୁଶାନ୍ତ ସେଠୀଙ୍କୁ ଗିରଫ କରାଯାଇଥିବାର ସୂଚନା ରହିଛି।

ସୂଚନାଯୋଗ୍ୟ, ସ୍ୱତନ୍ତ୍ର ବିଚାରପତି, ଭିଜିଲାନ୍ସ, ଭୁବନେଶ୍ୱରଙ୍କ ଦ୍ୱାରା ଜାରି କରାଯାଇଥିବା ସର୍ଚ୍ଚ ୱାରେଣ୍ଟ ବଳରେ ଓଡ଼ିଶା ଭିଜିଲାନ୍ସ ଦ୍ୱାରା ୭ ଜଣ ଡିଏସଏସପି, ୩ ଜଣ ଇନ୍ସପେକ୍ଟର, ୧୦ ଜଣ ଏଏସଆଇ ଏବଂ ଅନ୍ୟାନ୍ୟ ସହାୟକ କର୍ମଚାରୀଙ୍କ ନେତୃତ୍ୱରେ ଭୁବନେଶ୍ୱର, ପିପିଲି (ପୁରୀ), ଲିଙ୍ଗିପୁର, ଭୁବନେଶ୍ୱରର ନିମ୍ନଲିଖିତ ୮ଟି ସ୍ଥାନରେ ଏକକାଳୀନ ଘର ଚଢ଼ଉ କରାଯାଇଥିଲା।

୧) ପ୍ଲଟ୍ ନମ୍ବର ୧୦, ଗଙ୍ଗୋତ୍ରୀ ନଗର, ଲିଙ୍ଗିପୁର, ଭୁବନେଶ୍ୱରରେ ଅବସ୍ଥିତ ତିନି ମହଲା କୋଠା।

୨) ଗଙ୍ଗୋତ୍ରୀ ନଗର, ଲିଙ୍ଗିପୁର, ଭୁବନେଶ୍ୱରରେ ପ୍ଲଟ୍ ନମ୍ବର ୧୦/୩୯୨୦ ଉପରେ ନିର୍ମାଣାଧୀନ ଘର।

୩) ପ୍ଲଟ୍ ନମ୍ବର ୭୪୯, ବିଲିପଡା, ପିପିଲି(ପୁରୀ)ରେ ଥିବା ଫାର୍ମହାଉସ୍।

୪) ଭୁବନେଶ୍ୱରର ବ୍ରିଟ୍ କଲୋନିର ବ୍ରହ୍ମେଶ୍ୱରପାଟଣାରେ ତାଙ୍କ ସମ୍ପର୍କୀୟଙ୍କ ଘର।

୫) ନୂଆପଡ଼ାର ଆର୍ ଆଣ୍ଡ୍ ବି ସବ-ଡିଭିଜନରେ ଅବସ୍ଥିତ ଶ୍ରୀ ସେଠୀଙ୍କ ଅଫିସ ଚାମ୍ବର।

୬) ନୂଆପଡ଼ାରେ ଅବସ୍ଥିତ ଶ୍ରୀ ସେଠୀଙ୍କ ସରକାରୀ କ୍ୱାର୍ଟର।

୭) ଭୁବନେଶ୍ୱରର କେଦାର ଲେନ୍‌ର ପ୍ଲଟ୍ ନମ୍ବର ୬୨୩/ବିରେ ଥିବା ତାଙ୍କ ସହଯୋଗୀଙ୍କ ଘର।

୮) ଭୁବନେଶ୍ୱରର ପୁରୁଣା ସହର, ପ୍ଲଟ୍ ନମ୍ବର ୮୬୬ ଗ୍ୟାରେଜ୍ ଛକ ଉପରେ ତାଙ୍କ ଅନ୍ୟ ଜଣେ ସହଯୋଗୀଙ୍କ ଘର।