ଛତିଶଗଡ଼ରେ ଅପରେସନ: ଓଡ଼ିଶା ମୁହାଁ ମାଓବାଦୀ

ମାଲକାନଗିରି: ସୀମାନ୍ତ ଛତିଶଗଡ଼ରେ ନକ୍ସଲ ଅପରେସନ ଜୋରଦାର ହେଉଥିବା ବେଳେ ନକ୍ସଲ ଏବେ ଜୀବନ ବଞ୍ଚାଇବାକୁ ସୁରକ୍ଷିତ ସ୍ଥାନ ଖୋଜୁଛନ୍ତି। ଗତ ୨୦୨୪ ମସିହାରେ ଛତିଶଗଡରେ ୫ ଶହରୁ ଊର୍ଦ୍ଧ୍ବ ନକ୍ସଲ ମୃତ୍ୟୁବରଣ କରିଥିବା ବେଳେ ୭ ଶହରୁ ଉର୍ଦ୍ଧ୍ବ ନକ୍ସଲ ଆତ୍ମସମର୍ପଣ କରିଥିଲେ। ଚଳିତ ବର୍ଷ ସେହିପରି ୪୫୦ରୁ ଊର୍ଦ୍ଧ୍ବ ନକ୍ସଲ ମୃତ୍ୟୁବରଣ କରିଥିବା ବେଳେ ୫୫୦ରୁ ଊର୍ଦ୍ଧ୍ବ ନକ୍ସଲ ଆତ୍ମସମର୍ପଣ କରିସାରିଲେଣି। ଯେତେବେଳେ ବି ପୁଲିସ ଗୁଇନ୍ଦା ସୂଚନା ପାଇଁ ନକ୍ସଲ ଅପରେସନ କରୁଛି ସଫଳତା ପାଇବାରେ ଲାଗିଛି।

ପ୍ରତି ଅପରେସନରୁ ନକ୍ସଲ ଏନକାଉଣ୍ଟରରେ ମୃତ୍ୟୁବରଣ କରୁଛନ୍ତି। ଏପରିକି ଚଳିତ ବର୍ଷ ଚାରି ଚାରି ଜଣ ସେଣ୍ଟ୍ରାଲ କମିଟିର କ୍ୟାଡର ନକ୍ସଲ ମୃତ୍ୟୁବରଣ କରିସାରିଲେଣି। ଯାହାକୁ ନେଇ ନକ୍ସଲ ସଂଗଠନରେ ବିରାଟ ଶୂନ୍ୟସ୍ଥାନ ହୋଇଛି। ନକ୍ସଲ ପୁଲିସ ଭୟରେ ଏକତ୍ର ହୋଇପାରୁନାହନ୍ତି। ବାରମ୍ବାର ଛତିଶଗଡ ପୁଲିସ ଏବଂ ସରକାରଙ୍କୁ ଶାନ୍ତିବାର୍ତ୍ତା ପାଇଁ ଅନୁରୋଧ କରିଚାଲିଛନ୍ତି।

ନକ୍ସଲ ସଂଗଠନ ପକ୍ଷରୁ ଆସନ୍ତା ୬ ମାସ ଅସ୍ତ୍ର ବିରତି କରିବା ନେଇ ଚୁକ୍ତି କରୁଥିବା ବେଳେ ସରକାର କିନ୍ତୁ ନକ୍ସଲ ଆତ୍ମସମର୍ପଣ ନକରିବା ପର୍ଯ୍ୟନ୍ତ କୌଣସି ଆଲୋଚନା ହେବ ନାହିଁ ବୋଲି ସଫା ସଫା ମନା କରିଦେଇଛନ୍ତି। ଏବେ ନକ୍ସଲ ନିଜର ଜୀବନ ବଞ୍ଚାଇବାକୁ ଓଡିଶା ମୁହାଁ ହେଲେଣି। ଚଳିତ ମାସରେ ମାଲକାନଗିରି ପୁଲିସ ଦୁଇ ଜଣକୁ ଗିରଫ କରିଥିବା ବେଳେ କୋରାପୁଟଜିଲ୍ଲା ପୁଲିସ ଜଣକୁ ଗିରଫ କରିଛି। 

ତେବେ ମାଲକାନଗିରି ଜିଲ୍ଲା ପୁଲିସ ଚଳିତ ବର୍ଷ ୬ ଜଣ ନକ୍ସଲ ଗିରଫ ଓ ଆତ୍ମସମର୍ପଣ କରାଇଲାଣି। ଏବେ ବି ମାଲକାନଗିରିର ବିଭିନ୍ନ ଦୁର୍ଗମ ଜଂଗଲରେ ଛତିଶଗଡ ନକ୍ସଲ ଲୁଚି ଛପି ରହିଛନ୍ତି। ଗୁଇନ୍ଦାର ସୂଚନା ସହ ମାଲକାନଗିରି ପୁଲିସ ଏନେଇ ଅପରେସନକୁ ଜୋରଦାର କରୁଛନ୍ତି। ଏବେ ମାଲକାନଗିରି ପୁଲିସର ଟାର୍ଗେଟ ହେଲା ଅପରେସନ ଉଦୟ। ଉଦୟ ନିଜର ହାତଗଣତି ସାଥୀକୁ ନେଇ ଓଡିଶା,ଆନ୍ଧ୍ର ଓ ତେଲେଙ୍ଗାନା ସୀମାରେ ଘୁରି ବୁଲୁଛି।

ଆତ୍ମସମର୍ପଣ ନକଲେ ନିଶ୍ଚିତ ମୃତ୍ୟୁ ବୋଲି ପୁଲିସ କହିଛି। ଉଦୟକୁ ମୃତ କିମ୍ବା ଜୀବିତ ଧରିବାକୁ ଗୁଇନ୍ଦା ମଧ୍ୟ ରାତିଦିନ ଏକ କରିଦେଇଛି। ବିଶେଷ କରି ଜିଲ୍ଲାର ମାଥିଲି,କାଲିମେଳା,ପଡିଆ ଏବଂ ଚିତ୍ରକୋଣ୍ଡା ବ୍ଲକର ଦୁର୍ଗମ ପାହାଡ ଅଂଚଳରେ ନକ୍ସଲ ଲୁଚିବାକୁ ଚେଷ୍ଟା କରୁଛନ୍ତି। ଅନ୍ୟଦିଗରେ କିନ୍ତୁ ମାଲକାନଗିରି ପୁଲିସ କିନ୍ତୁ ଏମାନଙ୍କୁ ଧରିବା କିମ୍ବା ଏନକାଉଣ୍ଟରରେ ମାରିବା ପାଇଁ ଜୋରଦାର ଅପରେସନ କରୁଛି। କୌଣସି ସୁଯୋଗକୁ ହାତଛଡା କରିବାକୁ ଚାହୁଁ ନାହିଁ ପୁଲିସ। ତେଣୁ ନକ୍ସଲଙ୍କ ଗତିବିଧି ଉପରେ ତିକ୍ଷଣ ନଜର ରଖାଯାଉଥିବା ଏସପି ବିନୋଦ ପାଟିଲ ଏଚ ପ୍ରକାଶ କରିଛନ୍ତି।

 maoists | Chhattisgarh | Malkangiri