ବିଷପିଇ ଜୀବନ ହାରିଲେ ବିବାହିତା ମହିଳା

ସୋର: ପାରିବାରିକ ସମସ୍ୟାକୁ ନେଇ ଜଣେ ମହିଳା ବିଷପିଇ ଜୀବନ ହାରିଥିବା ଜଣାପଡ଼ିଛି। ମୃତ ମହିଳା ହେଲେ ବାଲେଶ୍ବର ଜିଲ୍ଲା ସୋର ଥାନା ଅଧୀନ ଦହିସଡ଼ା ପଞ୍ଚାୟତର ଜଗନ୍ନାଥପୁର ଗ୍ରାମର ସଂଜୁଲତା ବେହେରା (୨୬)। 

ମିଳିଥିବା ସୂଚନା ଅନୁସାରେ ସୋର ଥାନା ଦହିସଡା ପଂଚାୟତ ଜଗନ୍ନାଥପୁର ଗ୍ରାମର କୁପାସିନ୍ଧୁ ବେହେରାଙ୍କ ଝିଅ ସଂଜୁଲତା ବେହେରା କିଛି ବର୍ଷ ପୂର୍ବରୁ ବିବାହ କରିଥିଲେ। ପାରିବାରିକ ଆର୍ଥିକ ସ୍ଥିତି ସ୍ବଚ୍ଛଳ ନଥିବାରୁ ତାଙ୍କର ସ୍ବାମୀ ବାହାର ରାଜ୍ୟରେ କାମ କରୁଥିଲେ। ଶାଶୂ ଘରେ  ଅନ୍ୟମାନେ ଅଣଦେଖା କରୁଥିବାରୁ ସଂଜୁଲତା ନିଜ ବାପ ଘରେ ରହୁଥିଲେ। ତାଙ୍କ ସ୍ୱାମୀ ପ୍ରଦୀପ ସାହୁ ବାହାର ରାଜ୍ୟରେ ରହି କାମ କରୁଥିବା ବେଳେ ଆଜି ସନ୍ଧ୍ୟାରେ କୌଣସି କାରଣରୁ ସଂଯୁଲତା ବିଷ ପିଇ ଗୁରୁତର ହୋଇ ପଡିଥିଲେ।

ପରିବାର ଲୋକେ ତାଙ୍କୁ ଉଦ୍ଧାର କରି ସୋର ଡାକ୍ତରଖାନାକୁ ଆଣିଥିବା ବେଳେ ସେଠାରେ ଡାକ୍ତର ତାଙ୍କୁ ମୃତ ଘୋଷଣା କରିଥିଲେ। ଖବର ପାଇ ସୋର ପୁଲିସ ଡାକ୍ତରଖାନାରେ ପହଂଚି ଶବ ଜବତ କରି ବ୍ୟବଛେଦ ପାଇଁ ରଖିବା ସହିତ ଘଟଣାର ଅଧିକ ତଦନ୍ତ ଆରମ୍ଭ କରିଥିବା ଜଣାପଡିଛି।