ରାଉରକେଲା ବିମାନବନ୍ଦରରେ ଓଏଲ୍‌ଏସ୍‌ ସର୍ଭେ ଆରମ୍ଭ: ବେଗଧରିଛି ପ୍ରକ୍ରିୟା

ରାଉରକେଲା: ପୂର୍ଣ୍ଣକ୍ଷମ ରାଉରକେଲା ବିମାନବନ୍ଦର ସ୍ବପ୍ନ, ବାସ୍ତବତାର ରୂପ ନେଉଛି। କାରଣ, ଏଠାରେ ବଡ଼ ବିମାନ ଚଳାଚଳ, ୪ସି ମାନ୍ୟତା, ରନ୍‌ୱେ ସଂପ୍ରସାରଣ ଓ ଉନ୍ନତୀକରଣ ପାଇଁ ପ୍ରକ୍ରିୟା ବେଗ ଧରିଛି। ବୁଧବାରଠାରୁ ଭାରତୀୟ ବିମାନବନ୍ଦର ପ୍ରାଧିକରଣ(ଏଏଆଇ)ର ତିନିଜଣିଆ ପ୍ରତିନିଧି ଓଏଲ୍‌ଏସ୍‌ ସର୍ଭେ ଆରମ୍ଭ କରିଛନ୍ତି। ପ୍ରତିନିଧି ଦଳରେ ଏଏଆଇର ଆସୋସିଏଟ୍‌ କନ୍‌ସଲ୍‌ଟାଣ୍ଟ୍‌ କେ. ଆରିଭୋଲି, ବରିଷ୍ଠ ଜିଆଇଏସ୍‌ ଆନାଲିଷ୍ଟ୍‌ ଯୋଗେନ୍ଦ୍ର କୁମାର ଓ ନିଜବୁଲ ହୋଡା ଶେଖ୍‌ ସାମିଲ ଅଛନ୍ତି।

ପ୍ରତିନିଧି ଦଳ ବୁଧବାର ଦିନ ପ୍ରଥମେ ବିମାନବନ୍ଦର ରନୱେ ସ୍ଥିତି ପରଖିଥିଲେ। ରନ୍‌ୱେ ସଂପ୍ରସାରଣ, ଆଇଏଲ୍‌ଏସ୍‌/ଏନ୍‌ଏଲ୍‌ଏସ୍‌ ବ୍ୟବସ୍ଥା ଓ ଅନ୍ୟାନ୍ୟ ଭିତ୍ତିଭୂମି ବିକାଶ ପାଇଁ ଆବଶ୍ୟକ ଜମି, ସୁବିଧାସୁଯୋଗ ଆଦି ବୁଲି ଦେଖିଥିଲେ। ଏତଦ୍‌ବ୍ୟତୀତ ସେକ୍ଟର-୧୪ ଡିପିଏସ୍‌ ସ୍କୁଲ ଛାତ ଉପରୁ ବିମାନବନ୍ଦର ଓ ଏହାର ୧୫ କିଲୋମିଟର ବ୍ୟାସାର୍ଦ୍ଧ ଅଞ୍ଚଳର ସ୍ଥିତି ସମୀକ୍ଷା କରିଥିଲେ। ଏହି ଦଳ ଗୁରୁବାର ବିପିୟୁଟି ଓ ରାଉରକେଲା ଇସ୍ପାତ କାରଖାନାକୁ ଗସ୍ତକରିବାର କାର୍ଯ୍ୟକ୍ରମ ରହିଥିବା ଜଣାପଡ଼ିଛି। ଆସନ୍ତା ୨୨ ତାରିଖଯାଏ ଏହି ସର୍ଭେ ଜାରି ରହିବ। ବିସ୍ତୃତ ପ୍ରକଳ୍ପ ରିପୋର୍ଟ ଏଏଆଇ କର୍ତ୍ତୃପକ୍ଷଙ୍କ ନିକଟରେ ଦାଖଲ ହେବାପରେ ଆଗାମୀ ଦିନରେ ସଂପ୍ରସାରଣ ଓ ଭିତ୍ତିଭୂମି ନିର୍ମାଣ ପ୍ରକ୍ରିୟା ଆରମ୍ଭ ହେବ।