‘ଏକ୍ସ’ରେ ଟ୍ରେଣ୍ଡ କରୁଛି ପାକିସ୍ତାନ ସେନାରେ ବି‌ଦ୍ରୋହ ଖବର, ସେନାମୁଖ୍ୟ ଅଟକ!

ନୂଆଦିଲ୍ଲୀ: ଜମ୍ମୁ କଶ୍ମୀରର ପହଲଗାମରେ ଗତମାସ ୨୨ ତାରିଖ ଦିନ ହୋଇଥିବା ଆତଙ୍କବାଦୀ ଆକ୍ରମଣ ଘଟଣାକୁ ନେଇ ଭାରତ ଓ ପାକିସ୍ତାନ ମଧ୍ୟରେ ଉତ୍ତେଜନା ସୃଷ୍ଟି ହୋଇଛି। ପହଲଗାମରେ ୨୬ ଜଣ ଲୋକଙ୍କର ମୃତ୍ୟୁର ପ୍ରତିଶୋଧ ନେବା ପାଇ ଭାରତ ମଙ୍ଗଳବାର-ବୁଧବାର ରାତିଠାରୁ ‘ଅପରେସନ୍‌ ସିନ୍ଦୂର’ ଆରମ୍ଭ କରିଦେଇଛି। ଗୁରୁବାର ସ୍ଥିତି ଗୁରୁତର ରହିଛି। କାରଣ ପାକିସ୍ତାନର ତରଫରୁ ରାଜସ୍ଥାନ, ପଂଜାବ ଓ ଜମ୍ମୁ କଶ୍ମୀରର ପ୍ରାୟ ୧୫ଟି ସହରକୁ ଟାର୍ଗେଟ କରାଯାଇଥିବା ‌ବେଳେ ଭାରତ ଏହାର କଡ଼ା ଜାବବ ଦେଇଛି। ଭାରତର ଏହି ଅପରେସନ୍‌ ଯୋଗୁଁ ପାକିସ୍ତାନ ବିଚଳିତ ହୋଇପଡ଼ିଛି। ଏହାରି ମଧ୍ୟରେ ପାକିସ୍ତାନ ସେନାରେ ବିଦ୍ରୋହ ଖବର ଆସୁଛି, ଯାହାକି ସୋସିଆଲ ମିଡିଆରେ ଟ୍ରେଣ୍ଡ୍‌ କରୁଛି। 

ବରିଷ୍ଠ ସାମ୍ବାଦିକ ଭୂପିନ୍ଦର ଚୌବେ ‌ସାମାଜିକ ଗଣମାଧ୍ୟମ ‘ଏକ୍ସ’ରେ ଲେଖିଛନ୍ତି, ପାକିସ୍ତାନର ସେନାମୁଖ୍ୟ ଅସୀମ ମୁନିର ଅଟକ ଅଛନ୍ତି। ତାଙ୍କ ସ୍ଥାନରେ ଜେନେରାଲ ଶାମଶଦ୍‌ ମିର୍ଜାଙ୍କୁ ପାକିସ୍ତାନ ଦାୟିତ୍ବ ମିଳିପାରେ। ବର୍ତ୍ତମାନ ପରିଚାଳିତ ଏଜେଣ୍ଡାରେ ମୁନୀରଙ୍କୁ ଅଭିଯୁକ୍ତ ଦର୍ଶାଯାଇଥିବା ଜଣାପଡ଼ିଛି।  

ପହଲଗାମ ଆକ୍ରମଣ ପରଠାରୁ କିଛିଦିନ ଧରି ନିଖୋଜ ଥିବା ପାକିସ୍ତାନ ସେନା ମୁଖ୍ୟ ଅସୀମ ମୁନିର ଭାରତକୁ ଧମକ ଦେଇଥିଲେ। ତଥାପି, ଏହି ଧମକରେ ମୁନିରଙ୍କ ଭୟଭୀତତା ସ୍ପଷ୍ଟ ଭାବରେ ଜଣାପଡିଥିଲା। ସେନା ମୁଖ୍ୟ ଜେନେରାଲ ମୁନିର କହିଥିଲେ ଯେ ଯଦି ଭାରତ କୌଣସି ପ୍ରକାରେ ଆକ୍ରମଣ କରେ, ତେବେ ଏହାର ପୂର୍ଣ୍ଣ ବଳରେ ଜବାବ ଦିଆଯିବ। ମୁନିର ଗତ ଗୋଟିଏ ସପ୍ତାହ ଧରି ନିୟନ୍ତ୍ରଣ ରେଖାରେ ଭାରତୀୟ ସେନା ଗୁଳି ଚଳାଇଥିବା ମଧ୍ୟ ଅଭିଯୋଗ କରିଥିଲେ। ପହଲଗାମ ଆତଙ୍କବାଦୀ ଆକ୍ରମଣ ପରଠାରୁ ମୁନିରର ପତ୍ତା ଜଣା ନଥିଲା। ସୋସିଆଲ ମିଡିଆରେ ତାଙ୍କ ନାମରେ ‘ନିଖୋଜ’ ଟ୍ରେଣ୍ଡ ଚାଲିଥିଲା।

ସୂଚନାଯୋଗ୍ୟ, ଗୋଟିଏ ମାସ ମଧ୍ୟରେ ପାକିସ୍ତାନୀ ସେନାର ପ୍ରାୟ ୪,୫୦୦ ସୈନିକ ଏବଂ ଅଧିକାରୀ ଇସ୍ତଫା ଦେଇଛନ୍ତି। ଗଣମାଧ୍ୟମ ରିପୋର୍ଟରେ ଏହା ମଧ୍ୟ କୁହାଯାଇଛି ଯେ ଭାରତ ସହିତ କିଛି ଦିନ ପାଇଁ ଯୁଦ୍ଧ କରିବା ପାଇଁ  ପାକିସ୍ତାନ ପାଖରେ ଗୋଳାବାରୁଦ ନାହିଁ। ଏହି ସମୟରେ, ପାକିସ୍ତାନ ସରକାର ଏବଂ ସେନା ମଧ୍ୟରେ ମତଭେଦ ଥିବା ରିପୋର୍ଟ ମଧ୍ୟ ପ୍ରକାଶ ପାଇଛି। ପାକ୍ ପ୍ରଧାନମନ୍ତ୍ରୀ ଶାହବାଜ ସରିଫ ଆଇଏସଆଇ ମୁଖ୍ୟ ଅସୀମ ମାଲିକଙ୍କୁ ଜାତୀୟ ସୁରକ୍ଷା ପରାମର୍ଶଦାତା ଭାବରେ ନିଯୁକ୍ତ କରି ମୁନିରଙ୍କ ପ୍ରତିଷ୍ଠାକୁ ହ୍ରାସ କରିବାକୁ ଚେଷ୍ଟା କରିଛନ୍ତି।