‘ଭାରତୀୟ ସଭ୍ୟତାକୁ ଓଡ଼ିଶା ସମୃଦ୍ଧ କରିଛି, ବିକାଶର ଆଧାର ହୋଇପାରିଛି’

ଭୁବନେଶ୍ବର: ଭାରତୀୟ ସଭ୍ୟତାକୁ ଓଡ଼ିଶା ସମୃଦ୍ଧ କରିଛି। ଆଜି ବିକାଶର ଆଧାର ହୋଇପାରିଛି। ଭାରତର ବିକାଶରେ ଓଡ଼ିଶାର ଭୂମିକା ଅତୁଳନୀୟ। ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ଶୁକ୍ରବାର ଏହା କହିଛନ୍ତି। କେନ୍ଦ୍ର ସରକାରଙ୍କ ୧୧ ବର୍ଷ ଓ ରାଜ୍ୟ ସରକାରଙ୍କ ଏକ ବର୍ଷ ପୂର୍ତ୍ତି ଅବସରରେ ଜନତା ମଇଦାନରେ ଆୟୋଜିତ ରାଜ୍ୟସ୍ତରୀୟ ସମାବେଶରେ ପ୍ରଧାନମନ୍ତ୍ରୀ ମୋଦୀ କହିଛନ୍ତି, ମୋହନ ମାଝୀଙ୍କ ସରକାର କୋଟିକୋଟି ଭକ୍ତମାନଙ୍କର ନିବେଦନ ରଖିଛନ୍ତି। ଶ୍ରୀମନ୍ଦିରର ଚାରିଦ୍ବାର ଖୋଲିଛି। ରତ୍ନଭଣ୍ଡାର ମଧ୍ୟ ଖୋଲାଯାଇଛି। ଏହା କୋଟିକୋଟି ଭକ୍ତଙ୍କର ଆଶା ଥିଲା। ଆପଣମାନଙ୍କର ଭଲ ପାଇବା ଓ ମହାପ୍ରଭୁଙ୍କ ପ୍ରତି ଥିବା ଭକ୍ତି ଏଠାକୁ ଟାଣିଆଣିଛି। 

ଜୁନ ୨୦ ଏକ ସ୍ବତନ୍ତ୍ର ଦିନ। ରାଜ୍ୟର ବିଜେପି ସରକାର ଏକ ବର୍ଷ ସଫଳତାର ସହିତ ପୂରା କରିଛି। ଏହା କେବଳ ସରକାରଙ୍କ ନୁହେଁ। ଏହା ସୁଶାସନର ଏକ ବର୍ଷ ପୂର୍ତ୍ତି। ଜନସେବା ଓ ଜନ ବିଶ୍ବାସକୁ ସମର୍ପଣର ବର୍ଷ। 

-ନରେନ୍ଦ୍ର ମୋଦୀ, ପ୍ରଧାନମନ୍ତ୍ରୀ

ଲୋକେ କଂଗ୍ରେସର ମଡେଲ ଦେଖିଛନ୍ତି। କଂଗ୍ରେସ ମଡେଲରେ ସୁଶାସନ ନଥିଲା। ବିକାଶ ପ୍ରକଳ୍ପକୁ ଅଟକାଇବା, ଦୁର୍ନୀତିକୁ ପ୍ରଶୟ ଦେବା କଂଗ୍ରେସର ମଡେଲ ଥିଲା। ବିଗତ ଏକ ଦଶନ୍ଧିରେ ବିଜେପି ତାର ମଡେଲ ଦେଖାଇଛି। 

ଆମର ଓଡ଼ିଶା ଅନେକ ସମସ୍ୟାର ସହିତ ଲଢ଼େଇ କରିଛି। ଗରିବୀରୁ ମୁକୁଳିପାରୁ ନଥିଲା। କୃଷି ଭିତ୍ତିଭୂମି ନିମ୍ନସ୍ତରକୁ ଯାଇଥିଲା। ବିଗତ ୧ ବର୍ଷ ମଧ୍ୟରେ ବିଜେପି ସରକାର ମଜବୁତସ୍ତରରେ କାମ କରିଛି। ବିକାଶର ଡବଲ ଇଂଜିନ ଏଠାରେ ଚାଲିଛି। ଆଜି ହଜାର ହଜାର କୋଟିର ଶିଳାନ୍ୟାସ କରାଯାଇଛି। ଏହା ଡବଲ ଇଞ୍ଜିନର ଛାପ। ରାଜ୍ୟ ସରକାରରେ ମୁଖ୍ୟମନ୍ତ୍ରୀ ମୋହନ ଚରଣ ମାଝୀ ଓ ତାଙ୍କର କ୍ୟାବିନେଟର ମନ୍ତ୍ରୀଗଣଙ୍କୁ ଅଭିନନ୍ଦନ ଜଣାଉଛି। ଏହି ଟିମ୍ ବିଗତ ଏକ ବର୍ଷ ମଧ୍ୟରେ ଭଲ କାମ କରିଛି। 

ଏକ ବର୍ଷ ପୂର୍ତ୍ତି ଅବସରରେ ମୁଖ୍ୟମନ୍ତ୍ରୀ ମୋହନ ମାଝୀ କହିଛନ୍ତି, ଆପଣଙ୍କ ହାତରେ ଏହି ଦେଶ ସୁରକ୍ଷିତ ଅଛି। ଅପରେସନ ସିନ୍ଦୂର କେବଳ ଆତଙ୍କବାଦୀଙ୍କ ବିରୋଧରେ ଅପରେସନ ନୁହେଁ। ବରଂ ଏହା ହେଉଛି ନୂଆ ଭାରତର ବଳ। ଆଗରୁ ଲୋକେ କହୁଥିଲେ ମୋଦୀ ଅଛନ୍ତି, ସବୁ ସମ୍ଭବ। ଆଜି ପୂରା ଦେଶ କହୁଛି, ମୋଦୀ ଥିଲେ ଦେଶ ସୁରକ୍ଷିତ। ଆପଣଙ୍କର ନେତୃତ୍ବରେ ଦେଶ ବିକାଶ ଦିଗରେ ଅଗ୍ରସର ହେଉଛି। 

ଏକ ବର୍ଷ ମଧ୍ୟରେ ଆମେ ଅନେକ ଉପଲବ୍ଧି ହାସଲ କରିଛୁ। ମା-ଭଉଣୀ, ଚାଷୀଙ୍କ ଉନ୍ନତି ହୋଇଛି। ସବୁ ଜିଲ୍ଲାକୁ ଗସ୍ତ କରିଛି। ଓଡ଼ିଶାରେ ୧୭ ଲକ୍ଷ ଲକ୍ଷପତି ଦିଦି ସୃଷ୍ଟି ହୋଇପାରିଛନ୍ତି। ରାଜ୍ୟରେ ଶିକ୍ଷା, ସ୍ବାସ୍ଥ୍ୟ, ଗ୍ରାମାଞ୍ଚଳର ବିକାଶ ଉପରେ ସରକାର କାମ କରିଛନ୍ତି। ଓଡ଼ିଶାରେ ପୁଞ୍ଜି ନିବେଶ ଓ ରୋଜଗାରର ବାଟ ଫିଟିଛି। 

-ମୋହନ ଚରଣ ମାଝୀ, ମୁଖ୍ୟମନ୍ତ୍ରୀ

ସମାରୋହରେ ରାଜ୍ୟପାଳ ଡ. ହରିବାବୁ କମ୍ଭମପାଟି, ଉପମୁଖ୍ୟମନ୍ତ୍ରୀ କନକ ବର୍ଦ୍ଧନ ସିଂହଦେଓ, ପ୍ରଭାତୀ ପରୀଡ଼ା, ରାଜ୍ୟ ସରକାରଙ୍କ କ୍ୟାବିନେଟମନ୍ତ୍ରୀ ଗଣ, କେନ୍ଦ୍ରମନ୍ତ୍ରୀ ଧର୍ମେନ୍ଦ୍ର ପ୍ରଧାନ, ଜୁଏଲ ଓରାମ, ବିଜେପି ରାଜ୍ୟ ସଭାପତି ମନମୋହନ ସାମଲ ପ୍ରମୁଖ ଉପସ୍ଥିତ ଅଛନ୍ତି। 

Narendra Modi | CM Mohan Charan Majhi