ମେଣ୍ଢା ଚୋରି କରି ଗିରଫ ହେଲେ ୮ ଚୋର

ବାଲିଅନ୍ତା ବଜାର: ଭୁବନେଶ୍ବର ଉପକଣ୍ଠ ବାଲିଅନ୍ତା ଥାନା ପୁଲିସ ଚଢ଼ାଉ କରି ଏକ ମେଣ୍ଢା ଚୋର ଗ୍ୟାଙ୍ଗକୁ ଗିରଫ କରିବା ସହ ଘଟଣାରେ ସମ୍ପୃକ୍ତ ଥିବା ୮ ଜଣଙ୍କୁ କୋର୍ଟ ଚାଲାଣ କରିଛି। ଅଭିଯୁକ୍ତମାନେ ହେଲେ ଏସକେ ୱାଜିଦ, ଆକାଶ ଭୋଇ, ଆୟୁଷ୍ମାନ ନନ୍ଦୀ, ରାଜା କାଣ୍ଡି, ଏସକେ ରାହିଲ, ଏସକେ ସାହିଲ, ଏସକେ ଜାହିର, କେଳୁ ସା। ସେମାନଙ୍କ ଜାମିନ ନାମଞ୍ଜୁର ହେବାରୁ ତାଙ୍କୁ ବିଚାର ବିଭାଗୀୟ ହାଜତକୁ ପଠାଇ ଦିଆଯାଇଛି।

ଅଭିଯୋଗକାରୀ କରୁଣାକର ବେହେରା ଜଣେ ମେଣ୍ଢା ପାଳକ। ସେ ପରିବାପାଟପୁର ଠାରେ ତାଙ୍କର ଗୋଟିଏ ମେଣ୍ଢାଶାଳ କରିଛନ୍ତି। ଗତ ୧୫ ତାରିଖ ରାତି ୨ଟା ସମୟରେ କିଛି ଅଜଣା ଲୋକ ତାଙ୍କ ମେଣ୍ଢାଶାଳରୁ ୧୧ଟି ମେଣ୍ଢା ଚୋରି କରି ନେଇଯାଇଥିଲେ। ଏନେଇ ସେ ବାଲିଅନ୍ତା ଥାନାରେ ଏକ ଲିଖିତ ଅଭିଯୋଗ କରିଥିଲେ। ଅଭିଯୋଗ ଆଧାରରେ ପୁଲିସ ତଦନ୍ତ କରିବା ସହିତ ଏକ ବିଶେଷ ସୂତ୍ରରୁ ସୂଚନା ପାଇ କେନ୍ଦୁବିଲ ଗ୍ରାମ ରାସ୍ତା ଅଞ୍ଚଳରେ ଅଭିଯୁକ୍ତମାନେ ଥିବାର ଖବର ପାଇଥିଲା।

ମିଳିଥିବା ସୂଚନା ଆଧାରରେ ପୁଲିସ ଟିମ ଚଢାଉ କରିବା ସହ ୮ ଜଣ ଅଭିଯୁକ୍ତଙ୍କୁ କାବୁ କରିବାରେ ସକ୍ଷମ ହୋଇଥିଲା ବେଳେ ସେମାନଙ୍କ ହେପାଜାତରୁ ୨ ଟି କାର, ୧୧ଟି ମୋବାଇଲ ଫୋନ ଏବଂ ୨୩,୧୭୦ ଟଙ୍କା ଜବତ କରିଥିଲା। କାର ଭିତରେ ୫ଟି ମେଣ୍ଢା ରହିଥିଲେ। ପଚରାଉଚରା ସମୟରେ ଅଭିଯୁକ୍ତମାନେ ଚୋରି ନିମନ୍ତେ  ଦୁଇଟି କାର ବ୍ୟବହାର କରୁଥିବାର ସ୍ଵୀକାର କରିଥିଲେ।  ସେହି ଗ୍ରାମରୁ ଏହିପରି ୨୦ଟି ଛେଳି ଚୋରି କରିଥିବାର ସ୍ଵୀକାର କରିଥିଲେ।

ଅଭିଯୁକ୍ତ ଏସ୍.କେ ୱଜିଦ ଏବଂ ଏସ୍.କେ ଜାହିର ମାଷ୍ଟର ମାଇଣ୍ଡ ହୋଇଥିବା ବେଳେ ଅନ୍ୟମାନେ ଚୋରି କରିବାର କିଛିଦିନ ପୂର୍ବରୁ ରେକି କରି ଜାଗା ବିଷୟରେ ପ୍ରଥମେ ତଥ୍ୟ ସଂଗ୍ରହ କରୁଥିଲେ ଏବଂ ସେହି ହିସାବରେ ପ୍ଲାନ କରି ଉକ୍ତ କାରଗୁଡିକୁ ବ୍ୟବହାର କରି ଚୋରି କରୁଥିଲେ। ଚୋରି କରିଥିବା ମେଣ୍ଢା ବା ଅନ୍ୟ ବସ୍ତୁ ଗୁଡିକୁ ବଜାରରେ ବିକ୍ରିକରୁଥିବା ବେଳେ ମିଳୁଥିବା ଅର୍ଥରାଶିକୁ ନିଜମଧ୍ୟରେ ସମାନ ବାଣ୍ଟୁଥିଲେ ଓ ଅର୍ଥର ଅଧିକାଂଶ ଭାଗ ମଦ୍ୟପାନରେ ଖର୍ଚ୍ଚ କରୁଥିଲେ। ୮ ଜଣ ଅଭିଯୁକ୍ତଙ୍କ ମଧ୍ୟରୁ ୬ ଜଣଙ୍କ ନାମରେ ପୂର୍ବରୁ ଓଡ଼ିଶାର ବିଭିନ୍ନ ଥାନାରେ ଏକାଧିକ ଆପରାଧିକ ମାମଲା ରହିଛି।