ସ୍ୱଚ୍ଛତା ହିଁ ସେବା ଅଭିଯାନ ଜାତୀୟ ପ୍ରାଥମିକତାରେ ପରିଣତ ହୋଇଛି: କେନ୍ଦ୍ରମନ୍ତ୍ରୀ

ଭୁବନେଶ୍ବର: କେନ୍ଦ୍ର ଜଳଶକ୍ତି ମନ୍ତ୍ରୀ ସିଆର୍ ପାଟିଲ ଆଜି ଓଡ଼ିଶା ଗସ୍ତରେ ଆସି ସ୍ୱଚ୍ଛତା ହିଁ ସେବା (ଏସ୍ଏଚ୍ଏସ୍) ୨୦୨୪ ଅଭିଯାନରେ ଅଂଶଗ୍ରହଣ କରିଛନ୍ତି। ଏହି ଗସ୍ତ କାଳରେ ସେ ପରିମଳ, ସ୍ୱଚ୍ଛତା, ଓଡିଏଫ ପ୍ଲସ୍ ମଡେଲ ଘୋଷଣା ଏବଂ ଉନ୍ନତ ବର୍ଜ୍ୟବସ୍ତୁ ପରିଚାଳନା ବ୍ୟବସ୍ଥା କ୍ଷେତ୍ରରେ ରାଜ୍ୟର ପ୍ରଦର୍ଶନ ଆକଳନ ଉପରେ ଗୁରୁତ୍ୱାରୋପ କରିଥିଲେ। ଓଡ଼ିଶାର ବିଶିଷ୍ଟ ସମାଜ ସଂସ୍କାରକ ଉତ୍କଳମଣି ପଣ୍ଡିତ ଗୋପବନ୍ଧୁ ଦାସଙ୍କ ଜନ୍ମସ୍ଥାନ ସୁଆଣ୍ଡୋ ଗ୍ରାମରେ ଏକ ପେଡ୍ ମା କେ ନାମ ଅଧୀନରେ ଏସ୍ଏଚ୍ଏସ୍ ଅଭିଯାନର ଏକ ଅଂଶ ଭାବରେ ବୃକ୍ଷରୋପଣ ଅଭିଯାନରେ ଅଂଶଗ୍ରହଣ କରିଥିଲେ। ଉତ୍କଳମଣି ସ୍ମାରକୀ ସଂଗ୍ରହାଳୟ ପରିଦର୍ଶନ ପରେ ବିଦ୍ୟାଧରପୁର ଗ୍ରାମରେ ଆଲୋଚନାଚକ୍ର ଅନୁଷ୍ଠିତ ହୋଇଥିଲା, ଯେଉଁଠାରେ ସେ ବ୍ୟକ୍ତିଗତ ଘରୋଇ ଶୌଚାଳୟ (ଆଇଏଚ୍ଏଚ୍ଏଲ୍) କାର୍ଯ୍ୟକ୍ରମର ହିତାଧିକାରୀଙ୍କ ସହ ଆଲୋଚନା କରିଥିଲେ ଏବଂ ଏସବିଏମ୍ (ଜି) ଅଧୀନରେ ସୃଷ୍ଟି ହୋଇଥିବା ବିଭିନ୍ନ ପରିମଳ କାର୍ଯ୍ୟର ସମୀକ୍ଷା କରିଥିଲେ।

ବୀରରାମଚନ୍ଦ୍ରପୁର ପଞ୍ଚାୟତଠାରେ ଆୟୋଜିତ ଏହି ସମ୍ମିଳନୀରେ ଯୋଗଦେଇ କେନ୍ଦ୍ରମନ୍ତ୍ରୀ କହିଥିଲେ ଯେ, ଓଡ଼ିଶାରେ ଚାଲିଥିବା ଏସଏଚଏସ କାର୍ଯ୍ୟକଳାପରେ ଅଂଶଗ୍ରହଣ କରିବା ସାମୂହିକ କାର୍ଯ୍ୟ ଓ ସଂପୃକ୍ତିର ଶକ୍ତିକୁ ପ୍ରତିଫଳିତ କରୁଛି। ସ୍ୱଚ୍ଛ ଭାରତ ମିଶନ (ଏସବିଏମ୍) ଅଧୀନରେ ଓଡ଼ିଶାର ପ୍ରଭାବଶାଳୀ ଅଗ୍ରଗତି ସମ୍ପର୍କରେ ସେ ଆଲୋକପାତ କରିଥିଲେ, ଯାହା ଶୌଚାଳୟ ସୁବିଧା ପାଇଁ ୧୨%ରୁ ୧୦୦%କୁ ବୃଦ୍ଧି ପାଇଛି। ପ୍ରଧାନମନ୍ତ୍ରୀ ଶ୍ରୀ ନରେନ୍ଦ୍ର ମୋଦୀଙ୍କ ମାର୍ଗଦର୍ଶନରେ ଏସବିଏମ୍ ଏବଂ ୧୦ବର୍ଷ ଧରି ଜାରି ରହିଥିବା କାର୍ଯ୍ୟ ଗୋଷ୍ଠିଗୁଡ଼ିକୁ ସେମାନଙ୍କ ପରିବେଶର ମାଲିକାନା ନେବାକୁ ପ୍ରେରଣା ଦେଉଛି ବୋଲି ମନ୍ତ୍ରୀ କହିଥିଲେ।

ଶ୍ରୀ ପାଟିଲ ଉଲ୍ଲେଖ କରିଥିଲେ ଯେ ଏହି ମିସନ ଏକ ଜାତୀୟ ପ୍ରାଥମିକତାରେ ପରିଣତ ହୋଇଛି, ଯାହା ପୂର୍ବରୁ ଶୌଚାଳୟର ସୁବିଧା ନଥିବା ଅଂଚଳରେ ମହିଳାଙ୍କ ସ୍ୱାସ୍ଥ୍ୟ ଏବଂ ସମ୍ମାନର ସୁରକ୍ଷା କରୁଛି । 'ଝାଡ଼ାବାନ୍ତି ଜନିତ ମୃତ୍ୟୁକୁ ହ୍ରାସ କରିବାରେ ପରିମଳର ପ୍ରଭାବ ଏବଂ ପୁଷ୍ଟିହୀନତା ଓ ଶିଶୁ ମୃତ୍ୟୁ ହାରକୁ ଏଡ଼ାଇବା' ଉପରେ ଯଥେଷ୍ଟ ପ୍ରଭାବ ପକାଇଥିବା ଗବେଷଣାରୁ ସ୍ପଷ୍ଟ ହୋଇଛି ବୋଲି ସେ ସୂଚନା ଦେଇଛନ୍ତି। ସ୍ୱଚ୍ଛତା ହିଁ ସେବା, ଏକ ଲୋକାଭିମୁଖୀ ଅଭିଯାନ ଏବଂ 'ଏକ ପେଡ୍ ମା କେ ନାମ' ଭଳି ପଦକ୍ଷେପ ଏବଂ ଲୋକ ଓ ସମ୍ପ୍ରଦାୟର ଉତ୍ସର୍ଗୀକୃତ କାର୍ଯ୍ୟ ମାଧ୍ୟମରେ ଆମେ କେବଳ ଗତ ଦଶନ୍ଧିର ସଫଳତାକୁ ବଜାୟ ରଖୁନାହୁଁ ବରଂ ଭବିଷ୍ୟତ ପିଢ଼ି ପାଇଁ ସ୍ୱଚ୍ଛତାର ସଂସ୍କୃତି ନିର୍ମାଣ କରୁଛୁ ବୋଲି ମନ୍ତ୍ରୀ ଗୁରୁତ୍ୱାରୋପ କରିଥିଲେ।

କେନ୍ଦ୍ରମନ୍ତ୍ରୀ ଏସବିଏମ୍-ଗ୍ରାମୀଣ ଅଧୀନରେ ଓଡ଼ିଶାରେ ଚାଲିଥିବା କାର୍ଯ୍ୟ ଅଗ୍ରଗତିର ସମୀକ୍ଷା କରିଥିଲେ, ଯେଉଁଠାରେ ୬୬% ଗାଁକୁ ଓଡିଏଫ୍ ପ୍ଲସ୍ ମଡେଲ୍ ଗ୍ରାମ ଘୋଷଣା କରାଯାଇଛି ଏବଂ ୯୧% ଗ୍ରାମରେ ବର୍ଜ୍ୟଜଳ ପରିଚାଳନା ର ବ୍ୟବସ୍ଥା କରାଯାଇଛି ଏବଂ ୭୧% ଗ୍ରାମରେ କଠିନ ବର୍ଜ୍ୟବସ୍ତୁ ପରିଚାଳନାର ବ୍ୟବସ୍ଥା ରହିଛି।

ଓଡ଼ିଶାର ସମସ୍ତ ୩୧୪ଟି ବ୍ଲକରେ ବ୍ୟାପକ ଅଂଶଗ୍ରହଣ କରୁଥିବା ସ୍ୱଚ୍ଛତା ହିଁ ସେବା (ଏସ୍ଏଚ୍ଏସ୍) ୨୦୨୪ ଅଭିଯାନ ପରିପ୍ରେକ୍ଷୀରେ ଏହି ଗସ୍ତ କରାଯାଇଛି। ଏହି ଅଭିଯାନ ସେପ୍ଟେମ୍ବର ୧୭ରୁ ଅକ୍ଟୋବର ୧ ପର୍ଯ୍ୟନ୍ତ ଚାଲିବ ଏବଂ ଗାନ୍ଧୀ ଜୟନ୍ତୀରେ ସ୍ୱଚ୍ଛ ଭାରତ ମିଶନର ଦଶମ ବାର୍ଷିକୀ ପାଳନ କରାଯାଉଛି।

ସ୍ୱଚ୍ଛତା ହିଁ ସେବା ଅଭିଯାନ ଅଧୀନରେ ଓଡ଼ିଶା ଏହାର ଗ୍ରାମାଞ୍ଚଳରେ ୨୫,୩୭୬ଟି କାର୍ଯ୍ୟକ୍ରମ, ୨୦୦୩ ସ୍ୱଚ୍ଛତା ଲକ୍ଷ୍ୟ ୟୁନିଟ୍ (ସିଟିୟୁ) ଏବଂ ୩୧୪ଟି ସଫେଇମିତ୍ର ସୁରକ୍ଷା ଶିବିରର ରୂପାନ୍ତର ପାଇଁ ଯୋଜନା କରିଛି। ସେଥି ମଧ୍ୟରୁ ବର୍ତ୍ତମାନ ସୁଦ୍ଧା ୨୦.୭ ଲକ୍ଷ ଲୋକ ଅଂଶଗ୍ରହଣ କରି ୧୧,୭୯୯ଟି କାର୍ଯ୍ୟକ୍ରମ ଶେଷ କରିସାରିଲେଣି। ଏହି ସଂଖ୍ୟା ସ୍ଥାନୀୟ ଗୋଷ୍ଠିମାନଙ୍କୁ ସେମାନଙ୍କ ପରିମଳ ବ୍ୟବସ୍ଥାର ମାଲିକାନା ନେବାରେ ସାମିଲ କରିବା ଏବଂ ସ୍ୱଚ୍ଛ ଭାରତ ମିଶନ ମାଧ୍ୟମରେ ହାସଲ ହୋଇଥିବା ଲାଭକୁ ସୁନିଶ୍ଚିତ କରିବା ପାଇଁ ଚାଲିଥିବା ପ୍ରୟାସକୁ ପ୍ରତିଫଳିତ କରେ। କେନ୍ଦ୍ର ଜଳଶକ୍ତି ମନ୍ତ୍ରୀଙ୍କ ଏହି ଗସ୍ତ ଗ୍ରାମୀଣ ଭାରତରେ ସ୍ୱଚ୍ଛତାର ବାର୍ତ୍ତା ପହଞ୍ଚାଇବା ଏବଂ ସମ୍ପୂର୍ଣ୍ଣ ସ୍ୱଚ୍ଛ ଭାରତର ସ୍ୱପ୍ନକୁ ସ୍ଥାୟୀ ବାସ୍ତବତା ରେ ପରିଣତ କରିବା ପାଇଁ ସରକାରଙ୍କ ସଂକଳ୍ପର ପ୍ରମାଣ।