ସାବଧାନ!: ମସ୍ତିଷ୍କ ଖାଉଥିବା ଏମୋଇବା ନାକ ବାଟେ କରୁଛି ପ୍ରବେଶ, ଉପଚାର ପାଇଁ ଔଷଧ-ଟିକା ନାହିଁ

ନୂଆଦିଲ୍ଲୀ: କେରଳରେ 'ମାନବ ମସ୍ତିଷ୍କ ଖାଉଥିବା ଏମୋଇବା'ର ଚତୁର୍ଥ ମାମଲା ଦେଖିବାକୁ ମିଳିଛି। ଏହି ରୋଗ କୋଝିକୋଡେର ୧୪ ବର୍ଷର ବାଳକଠାରେ ନିଶ୍ଚିତ ହୋଇଛି। ବାଳକ ଜଣକ ଚିକିତ୍ସା ପାଇଁ ଏକ ଘରୋଇ ଡାକ୍ତରଖାନାରେ ଭର୍ତ୍ତି ହୋଇଛନ୍ତି। ଡାକ୍ତରଙ୍କ ଅନୁଯାୟୀ, ତାଙ୍କଠାରେ ବିରଳ ମସ୍ତିଷ୍କ ସଂକ୍ରମଣ ଏମୋବିକ୍ ମେନିଙ୍ଗୋଏନ୍ସଫାଲାଇଟିସର ଲକ୍ଷଣ ଦେଖିବାକୁ ମିଳିଛି। ଜୁଲାଇ ୧ ରେ ତାଙ୍କୁ ଚିକିତ୍ସା ପାଇଁ ଅଣାଯାଇଥିଲା। ପରେ ସଂକ୍ରମଣ ନିଶ୍ଚିତ ହୋଇଥିଲା। ସୁରକ୍ଷା ପାଇଁ ତାଙ୍କୁ ବିଦେଶୀ ଔଷଧ ଦିଆଯାଉଛି। ତାଙ୍କର ଅବସ୍ଥାରେ ସୁଧାର ଆସୁଛି। ମେ’ ମାସରୁ କେରଳରେ ଏଭଳି ସଂକ୍ରମଣର ଚାରିଟି ମାମଲା ପଞ୍ଜିକରଣ ହୋଇଛି। ସମସ୍ତ ଚାରୋଟି ମାମଲା ପିଲାମାନଙ୍କଠାରେ ଦେଖିବାକୁ ମିଳିଥିଲା, ଯେଉଁଥିପାଇଁ ୩ ଜଣଙ୍କର ମୃତ୍ୟୁ ହୋଇଛି। ଏବେ ଚତୁର୍ଥ ମାମଲା ସାମ୍ନାକୁ ଆସିଛି। ବିଶେଷଜ୍ଞଙ୍କ ଅନୁଯାୟୀ, ମୁକ୍ତ ଜୀବନ୍ତ ଅଣ-ପରଜୀବୀ ବ୍ୟାକ୍ଟେରିଆ ଏହି ସଂକ୍ରମଣ ସୃଷ୍ଟି କରିଥାନ୍ତି । ଯାହା ଦୂଷିତ ପାଣିରେ ଉତ୍ପନ୍ନ ହୋଇଥାଏ।

ଏହା ନାକ ମାଧ୍ୟମରେ ମଣିଷ ଶରୀରକୁ ପ୍ରବେଶ କରେ। ଜୁଲାଇ ୩ରେ ଏହା ଯୋଗୁ ଜଣେ ୧୪ ବର୍ଷର ବାଳକଙ୍କର ମୃତ୍ୟୁ ହୋଇଥିଲା। ମ୍ରିଦୁଲ ନାମକ ଜଣେ ବାଳକ ଗାଧୋଇବାକୁ ପୋଖରୀକୁ ଯାଇଥିଲେ। ସେଠାରେ ଥିବା ବ୍ୟାକ୍ଟେରିଆ ଯୋଗୁ ତାଙ୍କଠାରେ ସଂକ୍ରମଣ ହୋଇଥିଲା। ପରେ ତାଙ୍କର ମୃତ୍ୟୁ ହୋଇଥିଲା। କନ୍ନୁରରେ, ଜଣେ ୧୩ ବର୍ଷର ନାବାଳିକା ଜୁନ୍ ୨୫ରେ ଏହି ସଂକ୍ରମଣ ଯୋଗୁ ପ୍ରାଣ ହରାଇଥିଲେ। ୨୧ ମେ’ରେ କେରଳରେ ପ୍ରଥମ ମାମଲା ଚିହ୍ନଟ ହୋଇଥିଲା। ମାଲାପୁରମରେ ସଂକ୍ରମଣ ଯୋଗୁ ଜଣେ ୫ ବର୍ଷର ବାଳିକାଙ୍କର ମୃତ୍ୟୁ ଘଟିଛି। ଏହାପୂର୍ବରୁ ୨୦୧୭ ଏବଂ ୨୦୨୩ରେ ଏହି ସଂକ୍ରମଣ ଯୋଗୁ ଅନେକ ମୃତ୍ୟୁ ଘଟିଥିଲା। ଏହି ରୋଗ ଆଲାପୁଝା ଜିଲ୍ଲାରେ ବ୍ୟାପକ କ୍ଷତି ଘଟାଇଥିଲା। ୨୦୧୬ରେ କେରଳରେ ପ୍ରଥମ ମାମଲା ରିପୋର୍ଟ ହୋଇଥିଲା।

ସଂକ୍ରମିତ ଆକ୍ରାନ୍ତମାନଙ୍କଠାରେ ଜ୍ୱର, ମୁଣ୍ଡବିନ୍ଧା, ବାନ୍ତି ଏବଂ ବେହୋସର ଲକ୍ଷଣ ଦେଖାଯାଇଥାଏ। ଆମେରିକାର ସେଣ୍ଟର ଅଫ୍ ରୋଗ ଅନୁଯାୟୀ, ପିଏଏମ (ପ୍ରାଇମେରୀ ଏମୋବିକ୍ ମେନିଙ୍ଗୋଏନ୍ସଫାଲାଇଟିସ୍) ହେଉଛି ଏକ ପ୍ରକାର ମସ୍ତିଷ୍କ ସଂକ୍ରମଣ। ଯାହା ଏମୋଇବା ନାମକ ଏକକୋଷୀ ବିଶିଷ୍ଟ ଜୀବ କାରଣରୁ ବ୍ୟାପିଥାଏ। ଏହା ମାଟି ଏବଂ ଉଷୁମ ମଧୁର ଜଳ, ନଦୀ, ହ୍ରଦରେ ବୃଦ୍ଧି ପାଇଥାଏ। ଏହାକୁ ସରଳ ଭାଷାରେ 'ମସ୍ତିଷ୍କ ଖାଉଥିବା ଏମୋଇବା' କୁହାଯାଇଥାଏ। କାରଣ ଯେତେବେଳେ ଏହି ମଇଳା ପାଣି ନାକ ଭିତରକୁ ପ୍ରବେଶ କରେ, ଏହା ମସ୍ତିଷ୍କକୁ ସଂକ୍ରମିତ କରେ। ଏହା ମାତ୍ର ୫ ରୁ ୧୦ ଦିନ ମଧ୍ୟରେ ମୃତ୍ୟୁ ଘଟାଏ। ବର୍ତ୍ତମାନ, ଏହାକୁ ରୋକିବାରେ କୌଣସି ଆଣ୍ଟିବାୟୋଟିକ୍ ଔଷଧ ପ୍ରଭାବଶାଳୀ ନୁହେଁ।

ଏହି ରୋଗ ଏମୋଏବିକ୍ ମେନିଙ୍ଗୋଏନ୍ସଫାଲାଇଟିସ୍ (ପିଏଏମ) ଭାବରେ ଜଣାଶୁଣା, ଯାହା ନାଗଲେରିଆ ଫାଉଲେରି ନାମକ ଏକ ଏମୋଇବା ଦ୍ୱାରା ହୋଇଥାଏ। ଯେତେବେଳେ ଏହି ଏମୋଇବା ଜଳ ମାଧ୍ୟମରେ ଶରୀରରେ ପହଞ୍ଚେ, ମାତ୍ର ଚାରି ଦିନ ମଧ୍ୟରେ ଏହା ମାନବ ସ୍ନାୟୁ ପ୍ରଣାଳୀ ଯଥା ମସ୍ତିଷ୍କ ଉପରେ ଆକ୍ରମଣ ଆରମ୍ଭ କରେ।

୧୪ ଦିନ ମଧ୍ୟରେ ଏହା ମସ୍ତିଷ୍କରେ ଫୁଲା ସୃଷ୍ଟି କରେ ଯେଉଁଥିପାଇଁ ରୋଗୀ ମରିଯାଏ। ଚଳିତ ବର୍ଷ କେରଳରେ ଏହି ରୋଗ ଯୋଗୁ ଏହା ହେଉଛି ଚତୁର୍ଥ ମୃତ୍ୟୁ। ତେବେ ଏହାପୂର୍ବରୁ ଦେଶର ବିଭିନ୍ନ ଡାକ୍ତରଖାନାରେ ଏମୋଏବିକ୍ ମେନିଙ୍ଗୋଏନ୍ସଫାଲାଇଟିସ୍ ରୋଗ ହୋଇଥିବା ସୂଚନା ମିଳିଛି। କେନ୍ଦ୍ର ସରକାରଙ୍କ ଇଣ୍ଟିଗ୍ରେଟେଡ୍ ଡିଜିଜ୍ ସର୍ଭିଲାନ୍ସ ପ୍ରୋଗ୍ରାମ (ଆଇହିଏସପି) ଅନୁଯାୟୀ କେରଳରୁ ହରିୟାଣା ଏବଂ ଚଣ୍ଡିଗଡ଼ ପର୍ଯ୍ୟନ୍ତ ଏହା ଯୋଗୁ ୨୨ ଜଣଙ୍କର ମୃତ୍ୟୁ ଘଟିଛି। ଯେଉଁଥିରୁ ୨୦୨୧ପରେ ୬ ଟି ମୃତ୍ୟୁ ରେକର୍ଡ କରାଯାଇଛି।

୨୦୧୬ରେ କେରଳର ପ୍ରଥମ ମାମଲା ସାମ୍ନାକୁ ଆସିଥିଲା। ସେହି ଦିନଠାରୁ ଏଠାରେ ୮ ଜଣ ରୋଗୀଙ୍କୁ ଦେଖିବାକୁ ମିଳିଥିଲା ​​ଏବଂ ସମସ୍ତଙ୍କର ମୃତ୍ୟୁ ଘଟିଥିଲା। ନୂଆଦିଲ୍ଲୀ ସ୍ଥିତ ଇଣ୍ଡିଆନ କାଉନସିଲ ଅଫ ମେଡିକାଲ ରିସର୍ଚ୍ଚ (ଆଇସିଏମଆର) ଅନୁଯାୟୀ, ୨୦୧୯ ପର୍ଯ୍ୟନ୍ତ ଦେଶରେ ଏହି ରୋଗର ୧୭ଟି ମାମଲା ପଞ୍ଜିକରଣ ହୋଇଥିଲା, କିନ୍ତୁ କରୋନା ମହାମାରୀ ପରେ ଅନେକ ପ୍ରକାରର ସଂକ୍ରମଣରେ ବୃଦ୍ଧି ଘଟିଛି। ତେଣୁ, ବୋଧହୁଏ ଏହି ରୋଗର ହଠାତ୍ ବୃଦ୍ଧି ପଛରେ ଏହା ଏକ କାରଣ ହୋଇପାରେ। ୨୬ ମେ’ ୨୦୧୯ରେ, ହରିୟାଣାର ଜଣେ ୮ ମାସର ଶିଶୁଠାରେ ଏହି ରୋଗ ଚିହ୍ନଟ ହୋଇଥିଲା।

ଆଇସିଏମଆରର ଡାକ୍ତର ନ‌ିବେଦିତାଙ୍କ ଅନୁସାରେ ଏହାର ନିରାକରଣ ପାଇଁ କ‌ୌଣସି ଔଷଧ କିମ୍ବା ଟିକା ନାହିଁ, ତଥାପି ସାତଜଣ ରୋଗୀଙ୍କୁ ଭାରତରେ ରୋଗମୁକ୍ତ କରାଯାଇ ପାରିଛି। ଏଥିପାଇଁ ବିଭିନ୍ନ ପ୍ରକାରର ଆଣ୍ଟିବାୟୋଟିକ୍ ଦେଇ ଚିକିତ୍ସା କରାଯାଇଥାଏ, ଯେଉଁଥିପାଇଁ ରୋଗକୁ ଠିକ୍ ସମୟରେ ଚିହ୍ନଟ କରିବା ଅତ୍ୟନ୍ତ ଗୁରୁତ୍ୱପୂର୍ଣ୍ଣ ।

ମୁଣ୍ଡବିନ୍ଧା, ଜ୍ୱର, ବାନ୍ତି ହେଉଛି ଏହାର ପ୍ରାରମ୍ଭିକ ଲକ୍ଷଣ, ତା’ପରେ କଠିନ ବେକ, ଦ୍ୱନ୍ଦ୍ୱ, ବେହୋସ, ମତିଭ୍ରମ ଏବଂ ଶେଷରେ କୋମା ଅବସ୍ଥା ଦେଖାଦେଇଥାଏ। ଲକ୍ଷଣ ହେବାର ୧୮ ଦିନ ମଧ୍ୟରେ ରୋଗୀ ମରିପାରେ। ସେ ଏହା ମଧ୍ୟ କହିଛନ୍ତି ଯେ ଚିକିତ୍ସା ପରେ ମଧ୍ୟ ନାଗଲେରିଆ ଫାଉଲେରୀ ସଂକ୍ରମଣରୁ ବଞ୍ଚିବାର ସମ୍ଭାବନା କମ୍ ରହିଛି, ଯେଉଁଥିରେ ମୃତ୍ୟୁ ହାର ୯୭% ରହିଛି।

୨୦୧୯ ରେ ପ୍ରକାଶିତ ଦିଲ୍ଲୀ ଏମ୍ସର ଏକ ଅଧ୍ୟୟନରେ ମାଇକ୍ରୋବାୟୋଲୋଜି ବିଭାଗର ପ୍ରଫେସର ଡ‌ାକ୍ତର ବିଜୟ ରଞ୍ଜନ କହିଛନ୍ତି ସଂକ୍ରମଣ ବିରଳ ହେଲେ ମଧ୍ୟ ସାରା ବିଶ୍ୱରେ ୪୦୦ରୁ ଅଧିକ ମାମଲା ରେକର୍ଡ ହୋଇଛି। ୧୯୬୮ ରୁ ୨୦୧୯ ପର୍ଯ୍ୟନ୍ତ କେବଳ ଆମେରିକାରେ ୧୪୩ରୋଗୀ ଦେଖିବାକୁ ମିଳିଥିଲା, ଯେଉଁଥିରୁ ୧୩୯ ଜଣଙ୍କର ମୃତ୍ୟୁ ହୋଇଥିଲା। ୨୦୦୮ ରୁ ୨୦୧୯ ପର୍ଯ୍ୟନ୍ତ ପାକିସ୍ତାନରେ ୧୪୭ ରୋଗୀ ମିଳିଥିଲେ ​। ୟୁରୋପରେ ୨୪ ଏବଂ ଅଷ୍ଟ୍ରେଲିଆରେ ୧୯ ଟି ମାମଲା ଦେଖିବାକୁ ମିଳିଥିଲା। ଏସିଆ ମହାଦେଶରେ ପାକିସ୍ତାନ, ଭାରତ ଏବଂ ଥାଇଲ୍ୟାଣ୍ଡରେ ସର୍ବାଧିକ ସଂଖ୍ୟକ ମାମଲା ଦେଖିବାକୁ ମିଳିଛି।

୨୦୧୫ ମସିହାରେ, ପ୍ରଥମ ଥର ପାଇଁ ନୂଆଦିଲ୍ଲୀର ଅଲ ଇଣ୍ଡିଆ ଇନଷ୍ଟିଚ୍ୟୁଟ୍ ଅଫ୍ ମେଡିକାଲ ସାଇନ୍ସ (ଏମ୍ସ) ର ଡାକ୍ତରମାନେ ଆବିଷ୍କାର କରିଥିଲେ ଯେ ଉତ୍ତର ଭାରତର ମାଟିରେ ଅନେକ ପ୍ରକାରର ଏମୋଇବା ଅଛନ୍ତି, ସେମାନଙ୍କ ମଧ୍ୟରେ ନାଗେରିଆ ଫାଉଲେରି ଏମୋବିକ୍ ମେନିଙ୍ଗୋଏନ୍ସଫାଲାଇଟିସ୍ ରୋଗର କାରଣ ଅଟେ। ୨୦୧୨ ରୁ ୨୦୧୩ ମଧ୍ୟରେ ହରିୟାଣାର ରୋହତକ ଏବଂ ଝାଜ୍ଜରରେ ୧୦୭ଟି ଜଳଭଣ୍ଡାର ଯାଞ୍ଚ କରିବା ପରେ ଡାକ୍ତରମାନେ ଏହା ଆବିଷ୍କାର କରିଥିଲେ। ୧୦୭ ଜଳ ନମୁନା ମଧ୍ୟରୁ ୪୩(୪୦%) ରେ ଏମୋଇବା ମିଳିଥିଲା। ​

ଦିଲ୍ଲୀ ଏମ୍ସ ଅନୁଯାୟୀ, ପାରମ୍ପାରିକ ମାଇକ୍ରୋବାୟୋଲୋଜିକାଲ୍ ପରୀକ୍ଷଣରେ ଏହି ରୋଗ ଚିହ୍ନଟ ହୁଏ ନାହିଁ। ପିସିଆର ମାଧ୍ୟମରେ ଏହି ରୋଗ ଶୀଘ୍ର ଚିହ୍ନଟ ହୋଇପାରିଥାଏ। ଏହାକୁ ପ୍ରମାଣ କରିବାକୁ, ଦିଲ୍ଲୀ ଏମ୍ସ ଅକ୍ଟୋବର ୨୦୨୦ରେ ଦେଶର ପ୍ରଥମ ଅଧ୍ୟୟନ ପ୍ରକାଶ କରିଥିଲା ​​ଯେଉଁଥିରେ ୩୦୭ରୋଗୀଙ୍କ ପାରମ୍ପାରିକ ପରୀକ୍ଷଣରେ ଏହି ରୋଗରେ କେହି ସଂକ୍ରମିତ ହୋଇ ନ ଥିଲେ, କିନ୍ତୁ ତିନିଜଣ ରୋଗୀଙ୍କୁ ପିସିଆର ପରୀକ୍ଷଣରେ ଏହା ମିଳିଥିଲା।

ନଦୀ ଓ ପୋଖରୀ ପ୍ରତି ସାବଧାନ ରହିବା ଜରୁରୀ। ଏହିଠାରୁ ଏମୋଇବା ଶରୀରରେ ପ୍ରବେଶ କରିଥାଏ। ଦିଲ୍ଲୀର ଏମ୍ସର ବରିଷ୍ଠ ଡକ୍ଟର ଶରତ କୁମାର କହିଛନ୍ତି ଏହା ମାଟି ଦେଇ ନଦୀ କିମ୍ବା ପୋଖରୀରେ ପହଞ୍ଚେ। ସେସବୁରେ ଗାଧୋଇବା ଦ୍ୱାରା ଏହି ଏମୋଇବା ନାକ ଏବଂ ପାଟି ଦେଇ ମାନବ ଶରୀରରେ ପହଞ୍ଚେ। ଏହା ସ୍ନାୟୁ ମାଧ୍ୟମରେ ମସ୍ତିଷ୍କକୁ ଯାଇ ମସ୍ତିଷ୍କର ଟିସୁରେ ପ୍ରବଳ ଫୁଲା ସୃଷ୍ଟି କରେ ଏବଂ ତାପରେ ଏହି ଟିସୁଗୁଡ଼ିକ ନଷ୍ଟ ହେବାକୁ ଲାଗିଥାଏ। ଏହି ରୋଗ କରୋନା ପରି ଜଣେ ବ୍ୟକ୍ତିଙ୍କଠାରୁ ଅନ୍ୟ ଜଣକୁ ବ୍ୟାପି ନ ଥାଏ ।

ଡକ୍ଟର ଶରତ କହିଛନ୍ତି ଯେ ନାଗଲେରିଆ ଫାଉଲେରୀ ଏକ କୋଷ ବିଶିଷ୍ଟ ଜୀବ। ଏହା ବହୁତ ଛୋଟ ତେଣୁ ଏହାକୁ କେବଳ ମାଇକ୍ରୋସ୍କୋପ୍ ସାହାଯ୍ୟରେ ଦେଖାଯାଇ ପାରିଥାଏ। ସେ କହିଛନ୍ତି ଯେ ଯଦିଓ ମାନବ ଶରୀର ନାଗଲେରିଆ ଫାଉଲେରିରେ ସଂକ୍ରମିତ, ଏହି ଏମୋଇବା ସଂକ୍ରମଣ ଅତ୍ୟନ୍ତ ବିରଳ ଅଟେ। ଦୁର୍ବଳ ପ୍ରତିରକ୍ଷା ପ୍ରଣାଳୀ, ନାକ କିମ୍ବା ସାଇନସ୍‌ର ଦୀର୍ଘକାଳୀନ ସମସ୍ୟା, ଗରମ କିମ୍ବା ମଧୁର ଜଳର ସଂସ୍ପର୍ଶରେ ଆସିବା ଭଳି କିଛି କାରଣ ଏହାର ବିପଦକୁ ବଢ଼ାଇପାରେ ।