ଖାଇବା ପରେ ପ୍ରତି ଥର ଶିଶୁର ପାଟି ଭଲରେ ସଫା କରନ୍ତୁ

 ଶିଶୁ ଦନ୍ତକ୍ଷୟ କେବେଠାରୁ ଦେଖାଯାଏ?
ଶିଶୁ ଦନ୍ତକ୍ଷୟ ବା ‘ଅର୍‌ଲି ଚାଇଲ୍ଡହୁଡ୍‌ କ୍ୟାରିଜ୍‌’ ଶିଶୁମାନଙ୍କଠାରେ କ୍ଷୀର ଦାନ୍ତ ଉଠିବା ପରେ ଦେଖାଦେଇପାରେ। ଏହା ସାଧାରଣତଃ ୧ରୁ ୬ ବର୍ଷ ବୟସର ଶିଶୁମାନଙ୍କ ଠାରେ ଦେଖାଯାଏ। ଏହା ମୁଖ୍ୟତଃ କ୍ଷୀର ପିଉଥିବା ଶିଶୁଙ୍କଠାରେ ଅଧିକ ଦେଖାଯାଇଥାଏ।
 ଏହାର କାରଣ କ’ଣ ହୋଇପାରେ?
ଜୁସ୍, କ୍ଷୀର ଆଦି ଶର୍କରାଜାତୀୟ ତରଳ ପଦାର୍ଥ ପିଇବା ପରେ ଶିଶୁର ପାଟିକୁ ସଫା ନ କଲେ ତାହା ଦାନ୍ତରେ ବହୁତ ସମୟ ଧରି ଲାଗି ରହିଯାଏ। ଶିଶୁମାନଙ୍କ ଦାନ୍ତକୁ ନିୟମିତ ଭାବରେ ବ୍ରସ୍ ନ କଲେ ପାଟିରେ ଥିବା ବିଭିନ୍ନ ପ୍ରକାର ଜୀବାଣୁ ସକ୍ରିୟ ହୁଅନ୍ତି ଓ ଦନ୍ତ କ୍ଷୟ କରାନ୍ତି। ଏହା ଦନ୍ତକ୍ଷୟର ଅନ୍ୟତମ କାରଣ ହୋଇପାରେ।
 କେଉଁ ଶିଶୁମାନଙ୍କଠାରେ ଅଧିକ ଦନ୍ତକ୍ଷୟ ଦେଖାଯାଏ?
ଅଧିକ ପରିମାଣର ଚକୋଲେଟ୍, ଫାଷ୍ଟଫୁଡ୍, ରିଫାଇନ୍‌ଡ ଓ ପ୍ରୋସେସଡ୍ ଫୁଡ୍ ଖାଉଥିବା ଶିଶୁମାନଙ୍କଠାରେ ଦନ୍ତକ୍ଷୟ ହେବାର ଅଧିକ  ଆଶଙ୍କା ରହିଥାଏ।
 ଏହାର ଲକ୍ଷଣ କ’ଣ?
ଦାନ୍ତରେ ଧଳା ଚିହ୍ନ ହେବା। ଦାନ୍ତ ଧୀରେ ଧୀରେ ହଳଦିଆ ଓ ମାଟିଆ ରଙ୍ଗ ହୋଇଯିବା। ମାଟିଆ ଦାଗଗୁଡ଼ିକ ଗାତ ପରି ଦିଶିବା ଓ ବେଳେବେଳେ ଭାଙ୍ଗିଯିବା। ଖାଇବା ସମୟରେ ଦାନ୍ତ ଦରଜ ହେବା। ମାଢ଼ି ଓ ଗାଲ ଫୁଲିବା ଆଦି ଦନ୍ତକ୍ଷୟର ଲକ୍ଷଣ ହୋଇପାରେ।
 ଦନ୍ତକ୍ଷୟର ନିରାକରଣ ଲାଗି କି କି ଉପାୟ ରହିଛି?
ବୋତଲରୁ କ୍ଷୀର ପିଉଥିବା ଶିଶୁଙ୍କ ମାଆମାନେ ଯତ୍ନବାନ ରହନ୍ତୁ। ଶିଶୁକୁ ବୋତଲ ଯୋଗେ ମୁଖ୍ୟତଃ ରାତି ସମୟରେ ଜୁସ୍ ଆଦି ନ ଦିଅନ୍ତୁ। ସବୁ ଥର ଖାଇବା ପରେ  ଶିଶୁର ମାଢ଼ି ଓ ଦାନ୍ତକୁ  ଭଲ ଭାବେ ସଫା କରିବାକୁ ଚେଷ୍ଟା କରନ୍ତୁ। ଶିଶୁର ଦାନ୍ତକୁ ନିୟମିତ ବ୍ରସ୍‌‌େର ସଫା କରନ୍ତୁ। ଦନ୍ତକ୍ଷୟର କୌଣସି ଲକ୍ଷଣ ଦେଖା ହେଲେ ତୁରନ୍ତ ଦନ୍ତ ବିଶେଷଜ୍ଞଙ୍କ ସହ ପରାମର୍ଶ କରନ୍ତୁ।