ଅଧିକାଂଶ ହିନ୍ଦୁଙ୍କର ଘରେ ଶଙ୍ଖ ଦେଖିବାକୁ ମିଳିଥାଏ। ଏହାକୁ ଠାକୁରଙ୍କ ପାଖରେ ରଖାଯାଇଥାଏ। ଶଙ୍ଖ କେବଳ ହିନ୍ଦୁ ଧର୍ମର ପବିତ୍ର ପ୍ରତୀକ ନୁହେଁ,ବରଂ ଏହାର ଉପଯୁକ୍ତ ବ୍ୟବହାର ମଧ୍ୟ ସ୍ୱାସ୍ଥ୍ୟପ୍ରଦ । ଶଙ୍ଖ ବଜାଇବା ଯେଉଁଭଳି ସ୍ୱାସ୍ଥ୍ୟପକ୍ଷେ ଲାଭଦାୟକ ଠିକ୍ ସେହିପରି ଏଥିରେ ପାଣି ରଖି ତାହାର ଉପଯୋଗ କଲେ ବି ଅନେକ ଫାଇଦା ମିଳିଥାଏ । ଏବେ ଆସନ୍ତୁ ସେ ବିଷୟରେ ଜାଣିବା…
Sambad is now on WhatsApp
Join and get latest news updates delivered to you via WhatsApp
ରାତିସାରା ଶଙ୍ଖରେ ଜଳ ରଖି ସେଥିରୁ ତିନି ଚାମଚ ପାଣି ପ୍ରତ୍ୟହ ସକାଳେ ସେବନ କରିଲେ କୋଷ୍ଠକାଠିନ୍ୟ ଭଳି ସ୍ୱାସ୍ଥ୍ୟଗତ ସମସ୍ୟାରୁ ରକ୍ଷା ପାଇ ପାରିବେ । ଠିକ୍ ସେହିପରି ରାତିରେ ଶଙ୍ଖରେ ଜଳ ରଖି ସକାଳେ ଉଠିବାମାତ୍ରେ ସେହି ଜଳକୁ ସାଦା ପାଣିରେ ମିଶାଇ ଆଖି ଧୋଇଲେ ଚକ୍ଷରୁ ଭଲ ରହେ । ଅପରପକ୍ଷରେ ସ୍ନାନପରେ ନିଜର ତ୍ୱଚାରେ ଶଙ୍ଖକୁ ଘଷିଲେ ତ୍ୱଚାର ଔଜଲ୍ୟ ଆସିଥାଏ ।
ଖାଲି ସେତିକି ନୁହେଁ ରାତିରେ ଶଙ୍ଖରେ ଜଳ ରଖି ସକାଳେ ତ୍ୱଚାରେ ଘଷିଲେ କୌଣସି ତ୍ୱଚାଜନିତ ରୋଗ ହୋଇ ନଥାଏ ବୋଲି ମଧ୍ୟ କୁହାଯାଏ । ଶଙ୍ଖରେ କାଲସିଅମ୍ ଏବଂ ମିନେରାଲସ୍ ଥିବା ହେତୁ ଏହାର ଅନେକ ଉପକାରିତା ରହିଛି । ରାତିସାରା ଶଙ୍ଖରେ ଜଳ ରଖି ସେଥିରେ ତିନି ଚାମଚ ଗୁଲାବ ଜଳ ମିଶାଇ କେଶ ଧୋଇଲେ କେଶ ମୁଲାୟମ ଏବଂ ଘନ ହୋଇଥାଏ ବୋଲି ମଧ୍ୟ କୁହାଯାଏ । ଅପରପକ୍ଷରେ ଶଙ୍ଖ ବଜାଇବା ଦ୍ୱାରା ମସ୍ତିଷ୍କ ଏବଂ ସାରା ଶରୀରରେ ରକ୍ତ ସଞ୍ଚାର ଠିକ୍ ହୁଏ ।