ସୁସ୍ଥ ହୃତ୍‌ପିଣ୍ଡ ପାଇଁ ଶରୀରକୁ ଚଳଚଞ୍ଚଳ ରଖିବା ଲୋଡ଼ା, ଧୂମପାନଠାରୁ ଦୂରେଇ ରହିବା ଉଚିତ

ହୃଦ୍‌ରୋଗର ପ୍ରତିଷେଧ ଓ ନିରାକରଣ ସମ୍ପର୍କରେ ସଚେତନତା ସୃଷ୍ଟି ଲକ୍ଷ୍ୟରେ ପ୍ରତିବର୍ଷ ସେପ୍ଟେମ୍ବର ୨୯ ତାରିଖକୁ ବିଶ୍ବ ହୃଦୟ ଦିବସ ଭାବରେ ପାଳନ କରାଯାଉଛି। ଜେନେଭାସ୍ଥିତ ୱାର୍ଲଡ ହାର୍ଟ ଫେଡେରେସନ ପ୍ରତିବର୍ଷ ଏହି ବିଶ୍ବ ହୃଦୟ ଦିବସର ଏକ ବାର୍ତ୍ତା ଦେଇଥା’ନ୍ତି। ଚଳିତ ବର୍ଷର ବାର୍ତ୍ତା ‘ହୃଦୟକୁ ବ୍ୟବହାର କରି ହୃଦୟ ବିଷୟରେ ଜାଣ’ର ଅର୍ଥ ହେଉଛି ହୃଦ୍‌ରୋଗର ପ୍ରତିଷେଧ ଓ ନିରାକରଣ ପାଇଁ ନୂତନ ପଦ୍ଧତି ବିକଶିତ କରିବା। ଏ ଦିଗରେ ମନଯୋଗ ଦେଇ କାର୍ଯ୍ୟ କରିବା। ହୃଦ୍‌ରୋଗର ପ୍ରତିଷେଧକ ବାର୍ତ୍ତା ଏବଂ ଚିକିତ୍ସା ପାଇଁ ଡାକ୍ତରୀ ସୁବିଧା ପ୍ରତ୍ୟେକ ଲୋକଙ୍କ ପାଖରେ ଉପଲବ୍ଧ କରାଇବା। ହୃତ୍‌ପିଣ୍ଡ ଶରୀରର ସବୁଠାରୁ ଗୁରୁତ୍ବପୂର୍ଣ୍ଣ ଅଙ୍ଗ। ଜୀବନର ଆରମ୍ଭରୁ ଶେଷ ପର୍ଯ୍ୟନ୍ତ ଏହା ନିରନ୍ତର କାର୍ଯ୍ୟ କରିଥାଏ। ଏଣୁ ଏହା ବିଶେଷ ଯତ୍ନ ଆବଶ୍ୟକ କରେ। ସୁସ୍ଥ ହୃତ୍‌ପିଣ୍ଡ ପାଇଁ ଶରୀରକୁ ସର୍ବଦା ଚଳଚଞ୍ଚଳ ରଖିବା ଗୁରୁତ୍ବପୂର୍ଣ୍ଣ। କେବେ ଆଳସ୍ୟ କରିବା ଉଚିତ ନୁହେଁ ଏବଂ ଶରୀରକୁ ଚଳଚଞ୍ଚଳ ରଖିବା ପାଇଁ ପ୍ରତ୍ୟେକ ଦିନ କିଛି ନା କିଛି ଶାରୀରିକ ବ୍ୟାୟାମ କରିବା ଉଚିତ। ସୁଷମ ଆହାର ହୃତପିଣ୍ଡ ପାଇଁ ଲୋଡ଼ା। ଲୁଣ, ଚିନି, ମଇଦା, କୋଲଡ୍ରିଙ୍କ୍‌ସ, ତେଲ ଏବଂ ଘିଅର ଅନୁପାତ ଖାଦ୍ୟରେ କମ୍‌ କରି ପନିପରିବା ଏବଂ ଫଳର ପରିମାଣ ଅଧିକ କରିବା ଦ୍ବାରା ଆମର ହୃତ୍‌ପିଣ୍ଡକୁ ସୁସ୍ଥ ରଖିପାରିବା।

ମାନସିକ ଚାପ ଏବଂ ଅବସାଦ ବର୍ତ୍ତମାନ ହୃଦ୍‌ରୋଗର ଏକ ପ୍ରମୁଖ କାରଣ ହୋଇଛି। ମାନସିକ ଚାପକୁ ଦୂରେଇବା ସହିତ ମନକୁ ପ୍ରଫୁଲ୍ଲ ରଖିବା ପାଇଁ କୌଣସି ବିଷୟରେ ଅତ୍ୟଧ‌ିକ ଚିନ୍ତା କରିବା ଉଚିତ ନୁହେଁ। ପ୍ରତ୍ୟେକ ଦିନ କିଛି ସମୟ ପାଇଁ ଯୋଗ ଏବଂ ପ୍ରାଣାୟାମ କରିବା ଉଚିତ୍। ଧୂମପାନ ହୃଦ୍‌ରୋଗର ଏକ ପ୍ରମୁଖ କାରଣ। ଧୂମପାନ ଠାରୁ ସର୍ବଦା ଦୂରେଇ ରହିବା ଉଚିତ। ଡାଇବେଟିସ୍ ବା ମଧୁମେହ ହୃଦ୍‌ରୋଗର ମୁଖ୍ୟ କାରଣ ହୋଇଥାଏ। ଆମ ଦେଶରେ ପାଞ୍ଚ ଛଅ ଜଣରେ ଜଣେ ମଧୁମେହ ରୋଗରେ ପୀଡ଼ିତ। ମଧୁମେହକୁ ଅଣଦେଖା ନକରି ଏହାର ପ୍ରତିକାର କରିବା ଉଚିତ୍। ଏଡାଛଡ଼ା ବର୍ଷକୁ ଅନ୍ତତଃ ଥରେ ନିଜର ସ୍ବାସ୍ଥ୍ୟ ପରୀକ୍ଷା କରାଇନେବା ଉଚିତ। ଯେଉଁଥରେ କି ଆମର କୌଣସି ପ୍ରକାର ହୃଦ୍‌ରୋଗ ରହିଥିଲେ ଏହାକୁ ଯଥାଶୀଘ୍ର ନିରୂପଣ ଏବଂ ନିରାକରଣ କରାଯାଇ ପାରିବ। ଆଜିର ଏହି ବିଶ୍ବ ହୃଦୟ ଦିବସରେ ନିଜର ହୃତପିଣ୍ଡର ଯତ୍ନ ନେବା ପାଇଁ ଶପଥ ନେବା। ଏହି ବାର୍ତ୍ତାକୁ ଆମର ପରିବାର ଏବଂ ସମାଜରେ ସବୁଲୋକଙ୍କ ପାଖରେ ପହଞ୍ଚାଇବାକୁ ଚେଷ୍ଟା କରିବା।

-ଡା. ବିଶ୍ବଜିତ ମହାପାତ୍ର
ଏମବିବିଏସ, ଏମ୍‌ଏସ୍‌, ଏମସିଏଚ (ସିଟିଭିଏସ) କାର୍ଡିଓ ଥୋରାସିସ ଆଣ୍ଡ ଭାସ୍କୁଲାର ସର୍ଜନ,

ଆମ୍ରି ହସ୍ପିଟାଲ, ଭୁବନେଶ୍ବର
ମୋ- ୮୦୯୬୭୮୮୬୦୩