ଭୁବନେଶ୍ବର: ଗୋଟିଏ ଦେଶର ପ୍ରଗତି କ୍ଷେତ୍ରରେ ଶ୍ରମିକ ଓ କୃଷକମାନଙ୍କ ଅବଦାନ ବହୁ ଗୁରୁତ୍ବପୂର୍ଣ୍ଣ। ଶ୍ରୀବଲ୍ଲଭ ପାଣିଗ୍ରାହୀ ଶେଷ ଜୀବନ ପର୍ଯ୍ୟନ୍ତ ଚାଷୀ ଓ ଶ୍ରମିକମାନଙ୍କ ସ୍ବାର୍ଥ ଲାଗି କାର୍ଯ୍ୟ କରିଥିଲେ। ସଂସଦରେ ଓଡ଼ିଶାର ପ୍ରତିନିଧିତ୍ବ କରି ଆଞ୍ଚଳିକ ବିକାଶ ଉପରେ ଗୁରୁତ୍ବାରୋପ କରୁଥିଲେ। ଜଣେ ସ୍ଥିତିପ୍ରଜ୍ଞ ରାଜନେତା ଭାବେ ସେ ସବୁବେଳେ ମନେରହିବେ। ଦିବଂଗତ ବର୍ଷିୟାନ କଂଗ୍ରେସ ନେତା ତଥା ପୂର୍ବତନ ମନ୍ତ୍ରୀ ଶ୍ରୀବଲ୍ଲଭ ପାଣିଗ୍ରାହୀଙ୍କ ୧୦ମ ଶ୍ରାଦ୍ଧବାର୍ଷିକୀ ଅବସରରେ ଅତିଥିମାନେ ଏହା କହିଛନ୍ତି।

Advertisment

ଶ୍ରୀବଲ୍ଲଭ ଓ ସୁନନ୍ଦା ପାଣିଗ୍ରାହୀ ଫାଉଣ୍ଡେସନ୍‌ ପକ୍ଷରୁ ଜୟଦେବଭବନରେ ଆୟୋଜିତ ଏହି କାର୍ଯ୍ୟକ୍ରମରେ ପୂର୍ବତନ ପିସିସି ସଭାପତି ତଥା ଫାଉଣ୍ଡେସନ୍‌ର ଟ୍ରଷ୍ଟି ନିରଞ୍ଜନ ପଟ୍ଟନାୟକ ସଭାପତିତ୍ବ କରିଥିଲେ। ଶ୍ରୀ ପଟ୍ଟନାୟକ କହିଲେ, ଯୁବପିଢ଼ି ଶ୍ରୀ ବଲ୍ଲଭଙ୍କ ବିଷୟରେ ଜାଣିବାର ଆବଶ୍ୟକତା ରହିଛି। ରାଜସ୍ବ ମନ୍ତ୍ରୀ ଥିବା ସମୟରେ ତାଙ୍କ ଦ୍ବାରା ଜମିଜମା ସଂସ୍କାର ଓ ଗରିବ ଶ୍ରମିକଙ୍କ ପ୍ରତି ତାଙ୍କର ନିଷ୍ଠାପର ସେବା ବାରି ହୋଇଯାଏ। ଜଣେ ସଚ୍ଚା ରାଜନେତା ଭାବେ ସେ ନିଜର ପରିଚୟ ସୃ‌ଷ୍ଟି କରିପାରିଥିଲେ। ସମ୍ମାନିତ ଅତିଥି ଭାବେ ପିସିସି ସଭାପତି ଭକ୍ତଚରଣ ଦାସ ଯୋଗଦେଇ କହିଲେ, ସ୍ବର୍ଗତ ପାଣିଗ୍ରାହୀ ସର୍ବଦା ଆଞ୍ଚଳିକ ବିକାଶକୁ ଗୁରୁତ୍ବ ଦେଉଥିଲେ। ଗାନ୍ଧୀବାଦୀ ବିଚାରଧାରା, ଧୈର୍ଯ୍ୟ ତାଙ୍କର ସମ୍ବଳ ଥିଲା।

ଅନ୍ୟତମ ସମ୍ମାନିତ ଅତିଥି କଂଗ୍ରେସ ସାଂସଦ ସପ୍ତଗିରି ଶଙ୍କର ଉଲାକା କହିଲେ, ଚାଷୀ, ମଜଦୁରଙ୍କ ଅଧିକାର ପାଇଁ ସ୍ବର୍ଗତ ପାଣିଗ୍ରାହୀ ସବୁବେଳେ ଲଢ଼େଇ ଜାରି ରଖିଥିଲେ। ଯୁବ ନେତାମାନେ ତାଙ୍କ ପଦାଙ୍କ ଅନୁସରଣ କରିବା ଆବଶ୍ୟକ। ଶ୍ରମିକ ନେତା ରାମଚନ୍ଦ୍ର ଖୁଣ୍ଟିଆ କହିଲେ ଯେ ସମ୍ବଲପୁରରେ ମହାନଦୀ କୋଲଫିଲ୍‌ଡସ୍‌ ଲିମିଟେଡ୍‌(ଏମ୍‌ସିଏଲ୍‌) ଓ ସମ୍ବଲପୁର ରେଲ୍‌ୱେ ଡିଭିଜନ୍‌ ପ୍ରତିଷ୍ଠା କ୍ଷେତ୍ରରେ ସ୍ବର୍ଗତ ପାଣିଗ୍ରାହୀଙ୍କ ଅବଦାନ ଚିର ସ୍ମରଣୀୟ ହୋଇରହିବ। ଶ୍ରମିକ ନେତା ସୌଭାଗ୍ୟ ପ୍ରଧାନ, ଅକ୍ଷୟ ବିଶ୍ବାଳ ଓ ଏମ୍‌ସିଏଲ୍‌ର ପୂର୍ବତନ ନିର୍ଦ୍ଦେଶକ(ପର୍ସୋନେଲ୍‌) ଏସ୍‌ସି ପାଢ଼ୀ ନିଜର ବକ୍ତବ୍ୟରେ ସ୍ବର୍ଗତ ପାଣିଗ୍ରାହୀଙ୍କ ସ୍ମୃତିଚାରଣ କରିଥିଲେ। ଏହି ଅବସରରେ ଅତିଥିମାନେ ସ୍ମରଣିକା ଉନ୍ମୋଚନ କରିଥିଲେ। ପୁଅ ପ୍ରିୟଦର୍ଶୀ ପାଣିଗ୍ରାହୀ ଅତିଥି ପରିଚୟ ପ୍ରଦାନ କରିଥିଲେ। ନାତୁଣୀ ସାନ୍‌ଭୀ ଓ ତିସ୍ୟା ବଂଶୀ ଓ ଗିଟାର ମାଧ୍ୟମରେ ଭଜନ ପରିବେଷଣ କରିଥିଲେ। ପଦ୍ମକର ଗୁରୁ କାର୍ଯ୍ୟକ୍ରମ ସଂଯୋଜନା କରିଥିଲେ।