ଭୁବନେଶ୍ବର: ହୋଟେଲ ବୁକିଂ ନାଁରେ ନକଲି ଵେବସାଇଟ୍‌ କରି ସାଇବର୍‌ ଠକେଇ କରୁଥିବା ଏକ ଅନ୍ତଃରାଜ୍ୟ ରୢାକେଟ୍‌କୁ କ୍ରାଇମବ୍ରାଞ୍ଚ ସାଇବର୍‌ ଟିମ୍‌ ଠାବ କରିଛି। ଏନେଇ ୨ଜଣ ଲୁଟେରାଙ୍କୁ କ୍ରାଇମବ୍ରାଞ୍ଚ ଟିମ୍‌ ଓଡ଼ିଶାକୁ ଆଣିଛି। ରାଜସ୍ଥାନରୁ ଏହାକୁ ଅପରେଟ୍‌ କରି ଓଡ଼ିଶା ସମେତ ଏକାଧିକ ରାଜ୍ୟରେ ନକଲି ଵେବସାଇଟ୍‌ ଜରିଆରେ ଦୁର୍ବୃତ୍ତମାନେ ପର୍ଯ୍ୟଟକଙ୍କୁ ଲୁଟ୍‌ କରୁଥିଲେ। ପଚରାଉଚରା ପରେ ସେମାନେ ପାର୍ବଣ ସମୟରେ ୨୦ରୁ ଅଧିକ ହୋଟେଲ୍‌ର ନକଲି ଵେବସାଇଟ୍‌ ତିଆରି କରି ଲକ୍ଷଲକ୍ଷ ଟଙ୍କା ହଡ଼ପ କରିଥିବା ସ୍ବୀକାର କରିଛନ୍ତି।

Advertisment

ଆଗକୁ ପାର୍ବଣ ଆସୁଥିବାରୁ ନକଲି ହୋଟେଲ ଵେବସାଇଟ୍‌ ଉପରେ କଡ଼ା ନଜର ରଖିବକେୁ କ୍ରାଇମବ୍ରାଞ୍ଚ ଡିଜି ବିନୟତୋଷ ମିଶ୍ର ନିର୍ଦ୍ଦେଶ ଦିଆଯାଇଥିବା କହିଛନ୍ତି। ପୁରୀ ରଥଯାତ୍ରା ସମୟରେ କଟକ, ପୁରୀ, ଭୁବନେଶ୍ବର ସମେତ ବିଭିନ୍ନ ସହରର ହୋଟେଲଗୁଡ଼ିକୁ ଟାର୍ଗେଟ୍‌ ଏହି ନକଲି ଵେବସାଇଟ୍‌ ପ୍ରସ୍ତୁତ ହୋଇଥିଲା। କ୍ରାଇମବ୍ରାଞ୍ଚ ନକଲି ହୋଟେଲ ବୁକିଂ  ଵେବସାଇଟ୍‌ ସମ୍ପର୍କରେ ୪୦୦ରୁ ଅଧିକ ଅଭିଯୋଗ ପାଇଥିଲା। ନକଲି ଵେବସାଇଟ୍‌ଗୁଡ଼ିକୁ ଚିହ୍ନଟ କରିବା ସହିତ ଏହାକୁ ହଟାଇବା ପାଇଁ କ୍ରାଇମବ୍ରାଞ୍ଚ ସ୍ବତନ୍ତ୍ର ଟିମ୍ ଅନ୍‌ଲାଇନ୍‌ ଫ୍ଲାଟ୍‌ଫର୍ମରେ ନଜର ରଖିଥିଲା। ଦୁଇଟି ପର୍ଯ୍ୟାୟରେ ୪୦ରୁ ଅଧିକ ଵେବସାଇଟ୍‌କୁ ଟିମ୍‌ ଅସିଦ୍ଧ କରିଥିଲା। ୨ଅଭିଯୁକ୍ତଙ୍କୁ ପଚରାଉଚରା ପରେ ଗ୍ୟାଙ୍ଗର ଅନ୍ୟ ସହଯୋଗୀଙ୍କ ପାଖରେ ପହଞ୍ଚିବାକୁ କ୍ରାଇମ୍‌ବ୍ରାଞ୍ଚ ଯୋଜନା କରୁଛି।

ଠକାମିର ଶିକାର ପର୍ଯ୍ୟଟକମାନେ ଗନ୍ତବ୍ୟସ୍ଥଳରେ ପହଞ୍ଚିବା ପରେ ହିଁ ଠକେଇ ବିଷୟରେ ଜାଣିପାରନ୍ତି। ଠକମାନେ ଅବିକଳ ନକଲି ଵେବସାଇଟ୍ ଓ ସୋସିଆଲ ମିଡିଆ ପେଜ୍‌ ପ୍ରସ୍ତୁତ କରନ୍ତି। ଆକର୍ଷଣୀୟ ସେବା ନାଁରେ ୟୁପିଆଇ, ଵାଲେଟ୍‌ କିମ୍ବା ନେଟ୍‌ ବ୍ୟାଙ୍କିଙ୍ଗ୍‌ ମାଧ୍ୟମରେ ସମ୍ପୂର୍ଣ୍ଣ ଦେୟ ଦାବି କରି ଠକେଇ ଚାଲିଥିଲା। ଯେଉଁ ଆକାଉଣ୍ଟରେ ଟଙ୍କା ନେଣଦେଣ ହୋଇଛି ସେହି ଆକାଉଣ୍ଟଗୁଡ଼ିକ ବାହାର ରାଜ୍ୟର ବୋଲି ଜଣାପଡ଼ିଛି। ଏବେ ମଧ୍ୟ ପଶ୍ଚିମବଙ୍ଗ ଓ ଉତ୍ତରପ୍ରଦେଶ ଅଞ୍ଚଳରେ କିଛି ସାଇବର ଲୁଟେରା ସମାନ ଧରଣର ଠକେଇ କରୁଛନ୍ତି।