କ୍ୟାପିଟାଲ କ୍ରାଇମ: ଚୋର ନିକଟରୁ ୨ ବାଇକ୍‌ ଜବତ

ଭୁବନେଶ୍ବର: ବାଇକ୍‌ ଚୋରି କରୁଥିବା ଅଭିଯୋଗରେ ଆଜି ଭରତପୁର ଥାନା ପୁଲିସ ସାଲିଆସାହି ପ୍ରଧାନସାହି-୧ର ସତ୍ୟପ୍ରକାଶ ଦଳେଇ ଓରଫ୍ ପିଣ୍ଟୁ(୨୩)କୁ ଗିରଫ କରିଛି। ତା’ ନିକଟରୁ ୨ଟି ବାଇକ୍‌ ଜବତ କରାଯାଇଛି। ଗତ ୫ ତାରିଖ ଦିନ ପିଣ୍ଟୁ ଘାଟିକିଆ ସିଇଟି କଲେଜ ନିକଟରୁ ରାସ୍ତାକଡ଼ରେ ଥିବା ସୁନୀଲ୍‌ ମହନ୍ତଙ୍କ ବାଇକ୍‌ ନେଇ ଚମ୍ବଟ ମାରିଥିଲା। ଏନେଇ ସୁନୀଲ ଭରତପୁର ଥାନାରେ ଅଭିଯୋଗ କରିଥିଲେ। ପିଣ୍ଟୁ ଘରୁ ପୁଲିସ ସୁନୀଲ୍‌ଙ୍କ ବାଇକ୍‌ ସହ ଅନ୍ୟ ଗୋଟିଏ ଚୋରା ବାଇକ୍‌ ଜବତ କରିଛି।

ବିଅର ବୋତଲରେ ଆକ୍ରମଣ କରି ଯୁବକ ଗିରଫ

ବାଲିଅନ୍ତା: ବିଅର ବୋତଲରେ ପ୍ରାଣାନ୍ତକ ଆକ୍ରମଣ କରିବା ଅଭିଯୋଗରେ ଆଜି ବାଳକାଟି ଫାଣ୍ଡି ପୁଲିସ ପୁରଣପଧାନ ଗ୍ରାମର କାଳିଆ ବେହେରା(୨୨)କୁ କୋର୍ଟ ଚାଲାଣ କରିଛି। ଜାମିନ ଖାରଜ ହେବାରୁ କାଳିଆକୁ ଝାରପଡ଼ା ବିଚାର ବିଭାଗୀୟ ହାଜତକୁ ପଠାଇ ଦିଆଯାଇଛି। ପୁଲିସ ସୂଚନାନୁସାରେ ବୁଦ୍ଧିପଡ଼ାରେ ଯାତ୍ରା ପଡ଼ିଆରେ କୌଣସି କଥାକୁ ନେଇ କାଳିଆ ଓ ଜେନାସାହିର ସୋନୁ ସ୍ବାଇଁଙ୍କ ବଡ଼ ଭାଇ ମଧ୍ୟରେ ଗଣ୍ଡଗୋଳ ହୋଇଥିଲା। ଗାଁ ମୁରବି ଓ ଯାତ୍ରା କମିଟିର ସଦସ୍ୟମାନେ ବୁଝାସୁଝା କରିବା ପରେ ଗଣ୍ଡଗୋଳ ସମାଧାନ ହୋଇଯାଇଥିଲା। କିନ୍ତୁ କିଛି ସମୟ ପରେ ବୁଦ୍ଧିପଡ଼ା ଛକରେ କାଳିଆ ଏକ ବିଅର ବୋତଲରେ ସୋନୁଙ୍କ ମୁଣ୍ଡକୁ ପିଟି ତାଙ୍କୁ ରକ୍ତାକ୍ତ କରିଥିଲା। ସ୍ଥାନୀୟ ଲୋକ ସୋନୁକୁ ଉଦ୍ଧାର କରି ବାଳକାଟି ଗୋଷ୍ଠୀ ସ୍ବାସ୍ଥ୍ୟକେନ୍ଦ୍ରକୁ ପଠାଇଥିଲେ।

ବିଷ ପିଇ ମହିଳାଙ୍କ ଆତ୍ମହତ୍ୟା

ବାଲିପାଟଣା: ନରିଶୋ ପଞ୍ଚାୟତ ଖଜୁରିଆପଡ଼ା ମିଶ୍ରସାହିର ଜଣେ ମହିଳା ବିଷ ପିଇ ଆତ୍ମହତ୍ୟା କରିଛନ୍ତି। ସେ ହେଲେ ଜ୍ୟୋତିପ୍ରକାଶ ମିଶ୍ରଙ୍କ ପତ୍ନୀ ଅନସୂୟା ମିଶ୍ର (୪୫)। ଗତକାଲି ଅପରାହ୍ନରେ କୌଣସି କାରଣରୁ ଅନସୂୟା ବିଷ ପିଇ ଦେଇଥିଲେ। ପରିବାରଲୋକ ତାଙ୍କୁ ନିଆଳି ମେଡିକାଲ‌ରେ ଭର୍ତ୍ତି କରାଇଥିଲେ। ଅବସ୍ଥା ସଂକଟାପନ୍ନ ହେବାରୁ କଟକ ବଡ଼ ମେଡିକାଲକୁ ସ୍ଥାନାନ୍ତର କରାଯାଇଥିଲା। ଆଜି ଅପରାହ୍ନରେ ତାଙ୍କର ମୃତ୍ୟୁ ହୋଇଛି।