ଭୁବନେଶ୍ବର: ସମୟ ପୂର୍ବାହ୍ଣ ୧୧ଟାରୁ ମଧ୍ୟାହ୍ନ ଭିତରେ। ଘର ୟୁନିଟ୍‌-୯ରେ ଏବଂ ସହିଦନଗର ଥାନା ପଛରେ ଅନତି ଦୂରରେ। ତଥାପି ସିନ୍ଧିଚୋର କଳାକନା ବୁଲାଇଦେଲେ। ଘରେ କେହି ନଥିବା ମଉକାରେ ତାଲା ଭାଙ୍ଗି ଘରେ ପଶିଲେ ଏବଂ ଆଲ୍‌ମିରା ତାଡ଼ି ୨୦୦ ଗ୍ରାମ୍‌ ଓଜନର ସୁନାଗହଣା ନେଇଗ‌ଲେ। ସୋମବାର ଖୋଦ ରାଜଧାନୀ ଛାତିରେ ଘଟିଥିବା ଏହି ସିନ୍ଧିଚୋରିକୁ ନେଇ କମିସନରେଟ୍‌ ପୁଲିସର ପାରିବାପଣିଆ ଉପରେ ପ୍ରଶ୍ନବାଚୀ ସୃଷ୍ଟି ହୋଇଛି। ଅଭିଯୋଗ ପାଇବା ପରେ ପୁଲିସ ଚିରାଚରିତ ଢଙ୍ଗରେ ସାଇଣ୍ଟିଫିକ୍‌ ଟିମ୍‌ ନେଇ ଛାନ୍‌ଭିନ୍‌ ଚଳାଇଛି। ମାତ୍ର ସିନ୍ଧିଚୋରଙ୍କ ଟେର୍‌ ପାଇନାହିଁ।  
ସୂଚନା ମୁତାବକ ସୋମବାର ପୂର୍ବାହ୍ଣ ପ୍ରାୟ ୧୧ଟା ସମୟରେ ଜିଏସ୍‌ଟି ଅଧିକାରୀ ଭବଶ୍ରୀ ଭବେଶ ଧଳ ସପରିବାର ୟୁନିଟ୍‌-୯ସ୍ଥିତ କ୍ବାର୍ଟର୍ସରୁ ବାହାରି ମନ୍ଦିରକୁ ଯାଇଥିଲେ। ଘରର ମୁଖ୍ୟ କବାଟରେ ତାଲା ପକାଇବା ସହ ଗେଟ୍‌ରେ ମଧ୍ୟ ତାଲା ଦେଇଥିଲେ। ପାଖାପଖି ୧୨ଟା ବେଳକୁ ସେମାନେ ଘରକୁ ଫେରିଥିଲେ। କିନ୍ତୁ ଗେଟ୍‌ ଖୋଲାଥିବା ଦେଖି ବିସ୍ମିତ ହୋଇଯାଇଥିଲେ। ପରେ ଦେଖିଲେ ଯେ ଗେଟ୍‌ ତାଲା ଭଙ୍ଗା ହୋଇଛି। ସେହିଭଳି ଘର ମୁଖ୍ୟ କବାଟ ତାଲା ମଧ୍ୟ ଭଙ୍ଗା ହୋଇଥିବା ଦେଖିବାକୁ ମିଳିଥିଲା। ତେଣୁ ଘରୁ ଚୋରି ହୋଇଛି ବୋଲି ସେ ବୁଝିଯାଇଥିଲେ। ତୁରନ୍ତ ସେ ସହିଦନଗର ଥାନାକୁ ଫୋନ୍‌ କରିଥିଲେ। ପୁଲିସ ପହଞ୍ଚିବା ପରେ ସେମାନେ ଘର ଭିତରକୁ ଯାଇ ଦେଖିଲେ ଯେ ଦୁର୍ବୃତ୍ତମାନେ କଳାକନା ବୁଲାଇସାରିଛନ୍ତି। ଘର  ଭିତରେ ସବୁ ଜିନିଷ ଏପଟସେପଟ ହୋଇପଡ଼ିଥିବା ବେଳେ ଆଲ୍‌ମିରା ଖୋଲା ପଡ଼ିଥିଲା। ଆଲ୍‌ମିରାରେ ଥିବା ଗହଣା ବାକ୍ସ ସବୁ ଚଟାଣ ଉପରେ ପଡ଼ିଥିଲା। କିଛି ଟଙ୍କା ମଧ୍ୟ ଚୋରି ହୋଇଛି। ଶ୍ରୀ ଧଳଙ୍କ ଅଭିଯୋଗ ଅନୁସାରେ ପ୍ରାୟ ୨୦୦ ଗ୍ରାମ୍‌ ଓଜନର ଗହଣା ଥିଲା। ଦୁର୍ବୃତ୍ତମାନଙ୍କ ଚୋରି ତରିକାରୁ ଅନୁମାନ କରାଯାଉଛି ଯେ ଦୁର୍ବୃତ୍ତମାନେ ବହୁ ଦିନ ଧରି ଶ୍ରୀ ଧଳଙ୍କ ଘର ଉପରେ ନଜର ରଖିଥିଲେ। ପରିବାର ଲୋକେ କେତେବେଳେ କିଏ କୁଆଡ଼େ ଯାଉଛନ୍ତି, ରେକି କରୁଥିଲେ। ଘରେ କେହି ରହୁନଥିବା ମଉକାକୁ ଅପେକ୍ଷା କରିଥିଲେ। ଆଜି ପରିବାର ଲୋକେ ଏକାଠି ମନ୍ଦିରକୁ ଯାଇଥିବାରୁ ସେମାନଙ୍କୁ ସୁଯୋଗ ମିଳିଗଲା। ପୁଲିସ ସ୍ଥାନୀୟ ଅଞ୍ଚଳର ସିସିଟିଭି ଯାଞ୍ଚ କରୁଛି। ଜଣେ ବରିଷ୍ଠ ପୁଲିସ ଅଧିକାରୀଙ୍କ କହିବା କଥା, ଏଭଳି ସିନ୍ଧିଚୋରି ରାଜଧାନୀରେ ବିରଳ। ଏହା କୌଣସି ପେସାଦାର ଗ୍ୟାଙ୍ଗ୍‌ର କାମ କିମ୍ବା ଆଖପାଖ ଅଞ୍ଚଳର କୌଣସି ଠାଉକା ଗୋଷ୍ଠୀ ଏଭଳି ଦୁଃସାହସ କରିଛନ୍ତି।