ଅସ୍ଥି ବିସର୍ଜନ ଫେରନ୍ତା ଚିନ୍ତା ବଢ଼ାଇଲେଣି, ହରିଦ୍ବାରରୁ ଫେରି ବରମୁଣ୍ଡାର ୨୧ ଆକ୍ରାନ୍ତ
କୁମ୍ଭମେଳାରୁ ଫେରିବେ ୯ଜଣ
ଭୁବନେଶ୍ବର : ଆଶ୍ବିନ ମାସ କୃଷ୍ଣ ପକ୍ଷ କିମ୍ବା ଚୈତ୍ର ମାସ କୃଷ୍ଣ ପକ୍ଷରେ ପିତୃପୁରୁଷଙ୍କ ଅସ୍ଥି ବିସର୍ଜନ କଲେ ସ୍ବର୍ଗ ପ୍ରାପ୍ତି ହୁଏ। ବର୍ଷର ଏହି ଦୁଇ ପକ୍ଷରେ ଅସ୍ଥି ବିସର୍ଜନ କରି ଶ୍ରାଦ୍ଧ ଦେଲେ ଦିବଂଗତ ଆତ୍ମାକୁ ଶାନ୍ତି ମିଳେ ବୋଲି ବିଶ୍ବାସ ରହିଛି। ଏଣୁ ବହୁ ଲୋକ ଏହି ସମୟରେ ଉତ୍ତର ଭାରତର ହରିଦ୍ବାର, ଋଷିକେଶ, କାଶୀ, ଗୟା ଆଦି ଯାଇ ଗଙ୍ଗାରେ ଅସ୍ଥି ବିସର୍ଜନ କରନ୍ତି। ରାଜଧାନୀ ପାଇଁ ଏହି ଅସ୍ଥି ବିସର୍ଜନ ଫେରନ୍ତା ଏବେ ଚିନ୍ତାର ବିଷୟ ପାଲଟିଛନ୍ତି। ଉତ୍ତର ଭାରତରେ କରୋନା ଆକ୍ରାନ୍ତଙ୍କ ସଂଖ୍ୟା ନିୟନ୍ତ୍ରଣରେ ନଥିବାବେଳେ ସେଠାରୁ ଯେଉଁମାନେ ଫେରିଛନ୍ତି ଏବେ ସେଥିରୁ ଅଧିକାଂଶ କରୋନା ଆକ୍ରାନ୍ତ ହେବାରେ ଲାଗିଲେଣି।
Sambad is now on WhatsApp
Join and get latest news updates delivered to you via WhatsApp
ଗତ ସପ୍ତାହରେ ଚୈତ୍ରମାସ କୃଷ୍ଣ ପକ୍ଷ ଶେଷ ହୋଇଥିବାବେଳେ ସପ୍ତାହକ ମଧ୍ୟରେ ରାଜଧାନୀରୁ ବିହାର, ଉତ୍ତରପ୍ରଦେଶ, ଉତ୍ତରାଖଣ୍ଡ ଯାଇଥିବା ଶହଶହ ଲୋକ ଫେରିଲେଣି। ସେଠାରୁ ଫେରିବା ସମୟରେ କିଛି ଲୋକ କୋଭିଡ୍ ପରୀକ୍ଷା ରିପୋର୍ଟ ଆଣିଥିବାବେଳେ ବହୁ ଲୋକ କୋଭିଡ ରିପୋର୍ଟ ଆଣିନଥିଲେ। ତେଣୁ ୭ଦିନିଆ ସଙ୍ଗରୋଧରେ ରହିବାକୁ କୁହାଯାଇଥିଲା। ଏବେ ସଙ୍ଗରୋଧରେ ଥିବା ଏବଂ ସଙ୍ଗରୋଧ ନିୟମ ନ ମାନି ବାହାରେ ବୁଲୁଥିବା କିଛି ଲୋକ କରୋନା ଆକ୍ରାନ୍ତ ହେବାରେ ଲାଗିେଲଣି। ଯାହା ବରୁମଣ୍ଡା ଗାଁରେ ଦେଖିବାକୁ ମିଳିଛି।
ବିଶ୍ବସ୍ତ ସୂତ୍ରରୁ ମିଳିଥିବା ସୂଚନା ଅନୁଯାୟୀ, ବରମୁଣ୍ଡା ଗାଁରୁ ୩୫ଜଣ ଅସ୍ଥି ବିସର୍ଜନ ପାଇଁ ହରିଦ୍ବାର ଓ ଋଷିକେଶ ଯାଇଥିଲେ। ଏବେ ଏଥିରୁ ୨୧ଜଣରୁ ଅଧିକ କରୋନା ଆକ୍ରାନ୍ତ ହୋଇସାରିଲେଣି। ଏହାବାଦ୍ ସେମାନଙ୍କ ପରିବାର ଲୋକ ଓ ସେମାନଙ୍କ ସଂସ୍ପର୍ଶରେ ଆସିଥିବା କିଛି ଲୋକ କରୋନା ଆକ୍ରାନ୍ତ ହୋଇଛନ୍ତି। ବରମୁଣ୍ଡାରେ ଏବେ ପ୍ରତିଦିନ ପ୍ରାୟ ୧୦ରୁ ଅଧିକ କରୋନା ଆକ୍ରାନ୍ତ ଚିହ୍ନଟ ହେଉଥିବାବେଳେ ଏଥିରୁ ଅଧିକାଂଶ ଉତ୍ତରଭାରତ ଫେରନ୍ତା ଏବଂ ସେମାନଙ୍କ ସଂସ୍ପର୍ଶରେ ଆସିଥିବା ଲୋକ ବୋଲି ଜଣାପଡ଼ିଛି।
କେବଳ ବରମୁଣ୍ଡା ଗାଁ ବିଷୟରେ ଜଣାପଡ଼ିଥିଲେ ହେଁ, ରାଜଧାନୀର ସବୁଠୁ ଅଧିକ କରୋନା ଆକ୍ରାନ୍ତ ବାହାରୁଥିବା ଖଣ୍ଡଗିରି, ପୁରୁଣା ଭୁବନେଶ୍ବର, ନୂଆପଲ୍ଲୀ, ପଟିଆ ସମେତ ବିଭିନ୍ନ ଅଞ୍ଚଳରେ ଏବେ ଉତ୍ତର ଭାରତ ଫେରନ୍ତା କରୋନା ଆକ୍ରାନ୍ତ ହେଲେଣି। ଏପରିକି କିଛି ଲୋକ ଟ୍ରେନ୍ ଓ ବିମାନରେ ଆସିବା ସମୟରେ ଆର୍ଟିପିସିଆର୍ ନେଗେଟିଭ୍ ରିପୋର୍ଟ ଦେଖାଇଥିଲେ ବି ସେମାନେ ପରବର୍ତ୍ତୀ ସମୟରେ ଅସୁସ୍ଥ ହେବାରୁ କୋଭିଡ ଟେଷ୍ଟ କରିଥିଲେ। ଏଥିରୁ ସେମାନେ କରୋନା ଆକ୍ରାନ୍ତ ହୋଇଥିବା ଜଣାପଡ଼ିଛି। ରାଜ୍ୟ ସରକାର ଏବେ କୁମ୍ଭମେଳା ଫେରନ୍ତାଙ୍କୁ ଟାର୍ଗେଟ୍ କରୁଥିବାବେଳେ ମହାରାଷ୍ଟ୍ର ଓ ଉତ୍ତର ଭାରତ ଫେରନ୍ତା ଆକ୍ରାନ୍ତଙ୍କ ସଂଖ୍ୟା ବଢ଼ିବାରେ ଲାଗିଛି।
କୁମ୍ଭମେଳାରୁ ଫେରିବେ ୯ଜଣ
ଭୁବନେଶ୍ବର : ସମସ୍ତ କୁମ୍ଭମେଳା ଫେରନ୍ତାଙ୍କ ପାଇଁ ରାଜ୍ୟ ସରକାର କୋଭିଡ ଟେଷ୍ଟ ବାଧ୍ୟତାମୂଳକ କରିବା ସହ ଆର୍ଟିପିସିଆର୍ ନେଗେଟିଭ୍ ରିପୋର୍ଟ ଥିଲେ ଓଡ଼ିଶା ଆସିବାକୁ କୁହାଯାଇଛି। ଓଡ଼ିଶାରୁ ୧୬୦ଜଣ କୁମ୍ଭମେଳାକୁ ଯାଇଥିବା ନେଇ ସ୍ଥାନୀୟ ଜିଲ୍ଲା ପ୍ରଶାସନ ସୂଚନା ଦେଇଛି। ଏଥିରେ ଭୁବନେଶ୍ବରର ୯ଜଣ ଅଛନ୍ତି।
ବିଏମ୍ସିର ଜଣେ ବରିଷ୍ଠ ଅଧିକାରୀଙ୍କ ସୂଚନା ଅନୁଯାୟୀ, ହରିଦ୍ବାର ଜିଲ୍ଲା ପ୍ରଶାସନ ସୂଚନା ଅନୁଯାୟୀ ଭୁବନେଶ୍ବରର ବିଭିନ୍ନ ଅଞ୍ଚଳରୁ ୯ଜଣ ଯାତ୍ରୀ କୁମ୍ଭମେଳାରେ ସାମିଲ୍ ହୋଇଥିବା ନେଇ ନାମ ପଞ୍ଜୀକରଣ କରିଛନ୍ତି। ସେମାନଙ୍କର ଘର ଠିକଣା, ମୋବାଇଲ୍ ନମ୍ବର ବିଏମ୍ସିକୁ ମିଳିଛି। ସେମାନଙ୍କ ସହ ବିଏମ୍ସି କର୍ତ୍ତୃପକ୍ଷ ଯୋଗାଯୋଗ କରିଛନ୍ତି। କୋଭିଡ କଟକଣା ଅନୁଯାୟୀ ସେଠାରୁ ଭୁବନେଶ୍ବରକୁ ଫେରିବାକୁ କୁହାଯାଇଛି। ସେଠାରୁ ସେମାନେ ଆର୍ଟିପିସିଆର୍ ନେଗେଟିଭ୍ ରିପୋର୍ଟ ଆଣିବେ ଏବଂ ୭ଦିନ ସଙ୍ଗରୋଧରେ ରହିବେ। ସମସ୍ତେ ଟ୍ରେନ୍ରେ ଫେରିବେ ବୋଲି ଜଣାପଡ଼ିଛି।