ଭୁବନେଶ୍ବର: ପୂରା ଭୁବନେଶ୍ବରକୁ ୨୪ ଘଣ୍ଟିଆ ପାନୀୟ ଜଳଯୋଗାଣ ହେବ। ଜଳର ମାନ ଏଭଳି ରହିବ ଯେ ଲୋକମାନେ ସିଧାସଳଖ ଟ୍ୟାପ୍‌ରୁ ପାଣି ପିଇପାରିବେ। ଏହି ଲକ୍ଷ୍ୟ ନେଇ ୨୦୧୯ ମସିହାରୁ ରାଜଧାନୀରେ ଆରମ୍ଭ ହୋଇଥିଲା ‘ଡ୍ରିଙ୍କ୍‌ ଫ୍ରମ୍‌ ଟ୍ୟାପ୍‌’ ଯୋଜନା। ଭୁବନେଶ୍ବରର ଐଶାନେଶ୍ବର ବସ୍ତିରୁ ଆରମ୍ଭ ହୋଇଥିଲା ଏହି ପାଇଲଟ୍‌ ପ୍ରକଳ୍ପ। ଜଳବାହିତ ରୋଗରୁ ଲୋକଙ୍କୁ ଦୂରେଇ ରଖିବା ସହ ୨୪ଘଣ୍ଟିଆ ଜଳଯୋଗାଣ ଭଳି ମୌଳିକ ସୁବିଧା ଯୋଗାଇବା ଏହି ଯୋଜନାର ଲକ୍ଷ୍ୟ ରହିଲା। ୨୦୨୩ ଶେଷ ସୁଦ୍ଧା ରାଜଧାନୀର ପ୍ରତି ଘରକୁ ୨୪ଘଣ୍ଟିଆ ବିଶୁଦ୍ଧ ଜଳ ଯୋଗାଣ ହେବ ବୋଲି ତତ୍କାଳୀନ ବିଜେଡି ସରକାର ଘୋଷଣା କରିଥିଲେ। ‌ହେଲେ ଧାର୍ଯ୍ୟ ସମୟର ଦେଢ଼ ବର୍ଷ ପରେ ବି ଅଧାରୁ ଅଧିକ ଅଞ୍ଚଳରେ ଏବେବି ଦିନକୁ ଘଣ୍ଟାଏରୁ ଦୁଇ ଘଣ୍ଟା ଜଳ ଯୋଗାଣ ହେଉଛି।

Advertisment

ମିଳିଥିବା ସୂଚନା ମୁତାବକ, ରାଜଧାନୀରେ ପ୍ରତିଦିନ ୨୭୦ ମିଲିୟନ୍‌ ଲିଟର ଜଳର ଆବଶ୍ୟକତା ରହିଛି। ତେବେ ପଳାସୁଣି, ଘାଟିକିଆ, ଭୁଆସୁଣି, ଚନ୍ଦ୍ରଶେଖରପୁର ଆଦିରେ ସ୍ଥାପିତ ଜଳ ବିଶୋଧନାଗାରରୁ ପ୍ରତିଦିନ ଯଥାକ୍ରମେ ୮୨ ମିଲିୟନ୍‌ ଲିଟର, ୧୩୫ ମିଲିୟନ୍‌ ଲିଟର, ୨୨ ମିଲିୟନ୍‌ ଲିଟର ଓ ୭ ମିଲିୟନ୍‌ ଲିଟର ସର୍ବମୋଟ୍‌  ୨୪୬ ମିଲିୟନ୍‌ ଲିଟର ଜଳ ବିଶୋଧିତ ହୋଇ ସହରକୁ ଯୋଗାଣ ହେଉଛି। ଏହି ଜଳ କୁଆଖାଇ, ଦୟା ଓ ମହାନଦୀ (ମୁଣ୍ଡଳୀ)ରୁ ଆସୁଛି। ଏତଦ୍‌ବ୍ୟତୀତ ଅନ୍ୟାନ୍ୟ ଉତ୍ସରୁ (ବୋରୱେଲ୍‌ ଯୋଗେ) ମଧ୍ୟ ସହରକୁ  ଜଳଯୋଗାଣ ହେଉଛି। ଭୁବନେଶ୍ବରକୁ ୨୪ଘଣ୍ଟିଆ ଜଳଯୋଗାଣ ପାଇଁ ସାରା ସହରକୁ ୧୪୦ଟି ଜୋନ୍‌ରେ ବିଭକ୍ତ କରାଯାଇଥିଲା। ଏଥିମଧ୍ୟରୁ ୧୨୦ଟି ଜୋନ୍‌ରେ ପାଇପ୍‌ ବିଛାଯିବା ସହ ଜଳଯୋଗାଣ ଜାରିରହିଛି। ବର୍ତ୍ତମାନ ରାଜଧାନୀରେ ପାଖାପାଖି ୧୬୦୦ କିମି ପାଇପ ବିଛାଯାଇଥିବା ବେଳେ ଆଉ ୨୦ଟି ଜୋନ୍‌ର କାର୍ଯ୍ୟ ଜାରିରହିଛି। ୱାଟ୍‌କୋ ପକ୍ଷରୁ କୁହାଯାଇଛି ଯେ ଏହି ଯୋଜନାରେ ୟୁନିଟ୍‌-୧, ୟୁନିଟ୍‌-୬, ସହିଦନଗର, ସତ୍ୟନଗର ଭଳି କେନ୍ଦ୍ରୀୟ ଭୁବନେଶ୍ବର ଅଞ୍ଚଳ ଅର୍ଥାତ ରାଜଧାନୀର ୫୦% ବାସିନ୍ଦା ୨୪ ଘଣ୍ଟା ପାଣି ପାଉଛନ୍ତି।

ୱାଟ୍‌କୋର ନାହିଁ ଟେକ୍‌ନିକାଲ୍‌ ସପୋର୍ଟ
ରାଜଧାନୀର ଭୌଗୋଳିକ ସ୍ଥିତି ଏବେ ପାଲଟିଛି ବାହାନା

ବାସ୍ତବରେ ୱାଟ୍‌କୋ କର୍ତ୍ତୃପକ୍ଷ ଯେଉଁ ଅଞ୍ଚଳକୁ ୨୪ଘଣ୍ଟା ପାନୀୟ ଜଳ ଯୋଗାଣ କରୁଛନ୍ତି ବୋଲି କହୁଛନ୍ତି ସେସବୁ ହେଲା ରାଜଧାନୀର ଭିଆଇପି ଅଞ୍ଚଳ। ଯେଉଁଠି ମନ୍ତ୍ରୀ, ବିଧାୟକ, ଅଫିସରଙ୍କ କ୍ବାର୍ଟର୍ସ ଅଛି। ଭିଆଇପି ଅଞ୍ଚଳରେ ୨୪ଘଣ୍ଟା ନିରନ୍ତର ପାଣି ଯୋଗାଣ ହେଉଥିଲେ ହେଁ ରାଜଧାନୀର ଅନ୍ୟ ଅଞ୍ଚଳକୁ ଏକପ୍ରକାରର ଅଣଦେଖା କରିଦିଆଯାଉଛି। ଦୁଇ ବର୍ଷ ତଳେ ରାଜଧାନୀର ଯେତିକି ଅଞ୍ଚଳରେ ୨୪ଘଣ୍ଟା ପାନୀୟ ଜଳ ଯୋଗାଣ ହେଉଥିଲା ଏବେବି ପ୍ରା‌ୟତଃ ସେତିକି ଅଞ୍ଚଳରେ ହିଁ ୨୪ଘଣ୍ଟା ପାଣି ଦିଆଯାଉଛି। ଏଠାରେ ପ୍ରଶ୍ନ ଉଠୁଛି ରାଜଧାନୀବାସୀଙ୍କୁ ୨୪ଘଣ୍ଟା ପାନୀୟ ଜଳ ଯୋଗାଣ ପାଇଁ ଆବଶ୍ୟକତା ଠାରୁ ମାତ୍ର ୨୪ଏମ୍ଏଲ୍‌ଡି କମ୍‌ ପାଣି ଯୋଗାଣ ହେଉଥିବା ୱାଟ୍‌କୋ କର୍ତ୍ତୃପକ୍ଷ କହୁଥିବାବେଳେ ଅଧାରୁ ଅଧିକ ଭୁବନେଶ୍ବରକୁ କାହିଁକି ୨୪ଘଣ୍ଟା ପାଣି ଯୋଗାଣ ହୋଇପାରୁନି? ଏତେ ପାଣି ଯାଉଛି କୁଆଡ଼େ?

ଏନେଇ ୱାଟ୍‌କୋର ପରିଚାଳନା ନିର୍ଦ୍ଦେଶକ ଗୁରୁଚରଣ ଦାସ କହିଛନ୍ତି, ପୂର୍ବରୁ ରାଜଧାନୀରେ ମାତ୍ର ୩୦% ଅଞ୍ଚଳକୁ ପାଇପ୍ ଯୋଗେ ପାନୀୟ ଜଳ ଯୋଗାଣ ହେଉଥିଲା। ଡ୍ରିଙ୍କ ଫ୍ରମ୍‌ ଟ୍ୟାପ୍ ଯୋଜନା ଆରମ୍ଭ ହେବା ପରେ ସାରା ଭୁବନେଶ୍ବରରେ ପାଣି ପାଇପ ବିଛାଇବା ସହ ୯୦% ସହରବାସୀଙ୍କୁ ଆମେ ଜଳଯୋଗାଣରେ ସଫଳ ହୋଇଛୁ। ପଛରେ ଭୁବନେଶ୍ବରରେ ମିଶିଥିବା କିଛି ପଞ୍ଚାୟତ ଅଞ୍ଚଳରେ ଏବେ ପାଇପ ବିଛାଇବା କାମ ଜାରି ରହିଛି। ରାଜଧାନୀର ‌ଭୌଗୋଳିକ ସ୍ଥିତି ଯୋଗୁ ଆମକୁ ଜଳ ଯୋଗାଣରେ ସମସ୍ୟା ହେଉଛି। ହଠାତ୍ ଉଚ୍ଚା ଓ ନିଚ୍ଚା ଅଞ୍ଚଳ ଥିବାରୁ ଜଳଯୋଗାଣ ପାଇଁ ପାଣିର ଚାପ ପରିଚାଳନା କରିବା ୱାଟ୍‌କୋ ପାଇଁ ସବୁଠାରୁ ବଡ଼ ଆହ୍ବାନ ପାଲଟିଛି। ଏଥିସହ ସବୁ ରାଜଧାନୀବାସୀ ଯଦି ଟ୍ୟାପ୍‌ରୁ ପାଣି ସଂଗ୍ରହ କରନ୍ତେ, ତେବେ ପାଣିର ଠିକ୍‌ ଚାପ ପରିଚାଳନା ସମ୍ଭବ ହୋଇପାରନ୍ତା। କିନ୍ତୁ କିଏ ସମ୍ପ୍‌ ପୁଣି କିଏ ଛାତ ଉପର ଟାଙ୍କିକୁ ପମ୍ପ୍‌ ଯୋଗେ ପାଣି ଚଢ଼ାଉଥିବାରୁ ଏହା ପରିଚାଳନା ସମ୍ଭବ ହେଉନାହିଁ। ତଥାପି ଆମେ ୨୪ ଘଣ୍ଟିଆ ଜଳଯୋଗାଣ ପାଇଁ ଉଦ୍ୟମ ଜାରି ରଖିଛୁ। ପିକ୍‌ ଆୱାର୍‌ ଓ ନନ୍‌-ପିକ୍‌ ଆୱାର ଅନୁଯାୟୀ ଆମେ ସାରା ସହରକୁ ପାଣି ଯୋଗାଉଛୁ। ଏଥିସହ ୱାଟ୍‌କୋ ପାଖରେ ଯଥେଷ୍ଟ ବୈଷୟିକ ଜ୍ଞାନକୌଶଳ ସମ୍ପନ୍ନ ମାନବସମ୍ବଳ ନଥିବାରୁ ସାରା ସହରରେ ଏତେ ବଡ଼ ପ୍ରକଳ୍ପକୁ କାର୍ଯ୍ୟକାରୀ କରିବା କଷ୍ଟକର ହେଉଛି।