ବାଲିଅନ୍ତା : ଦୁଇଘଣ୍ଟା ଭିତରେ ୪ ଦୁର୍ଘଟଣା; ଜଣେ ମୃତ, ୩ ଆହତ
ବାଲିଅନ୍ତା/ଧଉଳି : ଆଜି ରାତି ୮ଟାରୁ ୧୦ଟା ମଧ୍ୟରେ ବାଲିଅନ୍ତା ଥାନା, ଉତରା ଫାଣ୍ଡି ଓ ଧଉଳି ଅଞ୍ଚଳରେ ଘଟିଥିବା ୪ଟି ଦୁର୍ଘଟଣାରେ ଜଣକର ମୃତ୍ୟୁ ଘଟିଥିବା ବେଳେ ଅନ୍ୟ ୩ ଜଣ ଗୁରୁତର ଆହତ ହୋଇଛନ୍ତି । ରିପୋର୍ଟ ଲେଖା ହେବା ବେଳକୁ ମୃତାହତଙ୍କ ସଂପୂର୍ଣ୍ଣ ପରିଚୟ ଓ ଠିକଣା ମିଳିପାରି ନାହିଁ।
Sambad is now on WhatsApp
Join and get latest news updates delivered to you via WhatsApp
ଉତରା ଫାଣ୍ଡି ଅଧୀନ କୃପାଜଳ ଇଜିନିୟରିଂ କଲେଜ ନିକଟରେ ଜଣେ ସାଇକେଲ ଆରୋହୀ ରାସ୍ତାପାର ହେଉଥିବା ବେଳେ ତାଙ୍କ ଉପରେ ଏକ ମାଲବାହୀ ଟ୍ରକ ଚଢ଼ିଯାଇଥିଲା । ଫଳରେ ସାଇକେଲ ଆରୋହୀଙ୍କ ଘଟଣାସ୍ଥଳରେ ହିଁ ମୃତ୍ୟୁ ହୋଇଯାଇଥିଲା। ଖବର ପାଇ ଉତରା ଫାଣ୍ଡି ପୁଲିସ ଦୁର୍ଘଟଣାସ୍ଥଳରେ ପହଞ୍ଚି ମୃତଦେହ ବ୍ୟବଚ୍ଛେଦ ଲାଗି କ୍ୟାପିଟାଲ ହସ୍ପିଟାଲକୁ ପଠାଇଥିଲା। ସେହିପରି ହଂସପାଳ – ଅଭୟମୁଖୀ ମୁଖ୍ୟ ରାସ୍ତାର ରାମଚନ୍ଦ୍ରପୁର କାଜ ନିକଟରେ ଏକ ଦ୍ରୁତଗାମୀ ଟ୍ରାକ୍ଟର ଏକ ସ୍କୁଟିକୁ ଧକ୍କା ଦେବାରୁ ସ୍କୁଟି ଚାଳକ ଗୁରୁତର ଆହତ ହୋଇଛନ୍ତି । ଆହତ ଜଣକ ଜଣେ ଯୁବକ ଏବଂ ତାଙ୍କର ବୟସ ୪୦ ବର୍ଷ ମଧ୍ୟରେ ହେବ ବୋଲି ଅନୁମାନ କରାଯାଉଛି । ଏଥିସହିତ ବେଣ୍ଟପୁର – ବାଲିପାଟଣା ଗ୍ରାମ ଉନ୍ନୟନ ରାସ୍ତାର ଜଗନ୍ନାଥପୁର ସାଇ ମନ୍ଦିର ରାସ୍ତା ନିକଟରେ ଦ୍ରୁତବେଗରେ ଆସୁଥିବା ଜଣେ ବାଇକ ଆରୋହୀ ଭାରସାମ୍ୟ ହରାଇ ଏକ ଷଣ୍ଢ ଦେହରେ ପିଟି ହୋଇଯିବାରୁ ସେ ଛିଟିକିପଡ଼ି ଗୁରୁତର ଆହାତ ହୋଇଛନ୍ତି । ଆହାତ ବ୍ୟକ୍ତିଙ୍କ ଘର ବଡ଼ଗଡ଼ ଥାନା ଅଞ୍ଚଳରେ ଏବଂ ତାଙ୍କର ନାମ ସୁଗ୍ରୀବ ସାହୁ ବୋଲି ସୂଚନା ମିଳିଛି ।
ଅନୁରୂପ ଭାବେ ରାତି ୧୦ଟା ସମୟରେ ଧଉଳି ଛକ ଗଡ଼ା ନିକଟରେ ଏକ ମାଲବାହୀ ପିକଅପ୍ ଭ୍ୟାନ ଏକ କାରକୁ ଧକ୍କା ଦେବାରୁ କାର ଚାଳକ ଗୁରୁତର ଆହାତ ହୋଇଛନ୍ତି । ଆହାତ ଚାଳକ ହେଲେ ଧଉଳି ଥାନା ଅଧୀନ ଗୋପୀନାଥପାଟଣା ଗ୍ରାମର ବୁଲୁ ମହାନ୍ତି ( ୩୫) ବୋଲି ଜଣେ ସ୍ଥାନୀୟ ଲୋକ ସୂଚନା ଦେଇଛନ୍ତି । ସ୍ଥାନୀୟ ଲୋକ ଆହତମାନଙ୍କୁ ଉଦ୍ଧାର କରି ୧୦୮ ଆମ୍ବୁଲାନ୍ସ ଡକାଇ କ୍ୟାପିଟାଲ ହସ୍ପିଟାଲକୁ ପଠାଇଥିଲେ । ପୁଲିସ ଘଟଣାସ୍ଥଳରେ ପହଞ୍ଚି ଦୁର୍ଘଟଣାଗ୍ରସ୍ତ ଗାଡ଼ି ଜବତ କରିଛି ।