ଭୁବନେଶ୍ୱର:  ରାଜ୍ୟରେ ଏସ୍‌ସିଏସ୍‌ଟି ବର୍ଗର ନିର୍ଯାତିତମାନଙ୍କୁ ତ୍ୱରିତ ନ୍ୟାୟ ପ୍ରଦାନ ନିମନ୍ତେ ଯଥେଷ୍ଟ ସଂଖ୍ୟକ ସ୍ୱତନ୍ତ୍ର ନ୍ୟାୟାଳୟ ନାହିଁ। ଆମ୍ବେଦକର ଲୋହିଆ ବିଚାରମଞ୍ଚ ପକ୍ଷରୁ ମୁଖ୍ୟମନ୍ତ୍ରୀଙ୍କୁ ଏହି ପ୍ରସଙ୍ଗରେ ଦୃଷ୍ଟି ଆକର୍ଷଣ କରାଯାଇଛି। ଉଚ୍ଚ ନ୍ୟାୟାଳୟ ଦୀର୍ଘ ୬ ବର୍ଷ ପୂର୍ବରୁ  ୪ଟି ସ୍ବତନ୍ତ୍ର କୋର୍ଟ ଅନୁମୋଦନ କରିଛନ୍ତି। ଆଜି ପର୍ଯ୍ୟନ୍ତ ଏହାକୁ କାର୍ଯ୍ୟକାରୀ କରାଯାଇ ନାହିଁ।  
ଏ ସମ୍ପର୍କରେ ଓଡିଶା ମାନବ ଅଧିକାର କମିସନଙ୍କ ନିକଟରେ ବିଚାରମଞ୍ଚ ପକ୍ଷରୁ ଆବେଦନ ଶୁଣାଣୀ ସମୟରେ ତଥ୍ୟ ପ୍ରଦାନ କରିଛନ୍ତି। ଢେଙ୍କାନାଳ, ଗଞ୍ଜାମ, ଭଦ୍ରକବରଗଡ଼ ୪ଟି ଜିଲ୍ଲା ସଦର ମହକୁମାଠାରେ ଏସସିଏସଟି ନିର୍ଯ୍ୟାତିତଙ୍କୁ ନ୍ୟାୟ ପ୍ରଦାନ ପାଇଁ ସ୍ୱତନ୍ତ୍ର କୋର୍ଟ ସ୍ଥାପନ କରିବାକୁ ୨୦୧୮ ଅକ୍ଟୋବରରେ ଓଡିଶା ହାଇକୋର୍ଟ ଅନୁମୋଦନ କରିଛନ୍ତି। ଏହି ସ୍ବତନ୍ତ୍ର କୋର୍ଟ ସ୍ଥାପନରେ ବିଳମ୍ବ ହେତୁ ନିର୍ଯ୍ୟାତିତମାନେ ତୁରନ୍ତ ନ୍ୟାୟ ପାଇବାରୁ ବଞ୍ଚିତ ହେଉଛନ୍ତି ବୋଲି ବିଚାରମଞ୍ଚର ସଭାପତି ସଂଗ୍ରାମ ମଲିକ ଉଦ୍‌ବେଗ ପ୍ରକାଶ କରିଛନ୍ତି। ରାଜ୍ୟର ପ୍ରତି ଜିଲ୍ଲାରେ ଏପରି କୋର୍ଟ ସ୍ଥାପନ ଜରୁରି ବୋଲି  ଶ୍ରୀ ମଲିକ ମୁଖ୍ୟମନ୍ତ୍ରୀଙ୍କ ଦୃଷ୍ଟି ଆକର୍ଷଣ କରି କହିଛନ୍ତି ଏସସିଏସଟି ବର୍ଗଙ୍କ ଉପରେ ଆକ୍ରମଣ ଓ ନିର୍ଯ୍ୟାତନା  ଘଟଣା ବଢିଚାଲିଛି। ଏନସିଆରବି ରିପୋର୍ଟ ଅନୁଯାୟୀ ୨୦୧୮ ମସିହାରେ ରାଜ୍ୟରେ ଏସସିଏସଟି ନିର୍ଯ୍ୟାତନା ନିବାରଣ ଆଇନରେ ୨,୩୩୫ ମାମଲା ପଞ୍ଜିକୃତ ହୋଇଛି। ଗତ ୫ ବର୍ଷ ମଧ୍ୟରେ ଏହା ବୃଦ୍ଧି ପାଇ ୨୦୨୨ ମସିହାରେ ୩୬୭୫ରେ ପହଞ୍ଚିଛି। ଏହିସବୁ ମାମଲାରେ ତ୍ୱରିତ ନ୍ୟାୟ ପାଇଁ ୨ ମାସ ମଧ୍ୟରେ ତଦନ୍ତ ଓ ଆଉ ୨ ମାସ ମଧ୍ୟରେ ବିଚାର ପ୍ରକ୍ରିୟା ଶେଷ କରିବା ଆଇନରେ ବ୍ୟବସ୍ଥା ରହିଛି। ୨୦୨୨ ମସିହାରେ ୨୫,୬୬୪ଟି ବିଚାରାଧୀନ ମାମଲା ବିଭିନ୍ନ ସ୍ୱତନ୍ତ୍ର ନ୍ୟାୟାଳୟରେ ପଡିରହିଥିଲା। ୨୦୧୭-୨୦୨୨ ମଧ୍ୟରେ ୬ ବର୍ଷରେ  ବର୍ଷକୁ ହାରାହାରି ୨୫୨୭ଟି ମାମଲାରେ ଚାର୍ଜସିଟ ଦାଖଲ ହୋଇଛି। ମାତ୍ର ୨୦୭ ମାମଲାରେ ବିଚାର ଶେଷ ହୋଇଛି। ଫଳରେ ୯୮.୪ % ମାମଲା ବିଚାରଧିନ ରହିଛି। ରାଜ୍ୟରେ ମାତ୍ର ୩ଟି ଅନନ୍ୟ ସ୍ୱତନ୍ତ୍ର ନ୍ୟାୟାଳୟ ଓ ୯୨ଟି ପ୍ରାଧୀକୃତ ସ୍ୱତନ୍ତ୍ର ନ୍ୟାୟାଳୟ ଏସସିଏସଟି ନିର୍ଯ୍ୟାତନା ନିବାରଣ ଆଇନ ଅନ୍ତର୍ଗତ ମାମଲାଗୁଡ଼ିକୁ ବିଚାର କରୁଛି ବୋଲି  ଶ୍ରୀ ମଲିକ କହିଛନ୍ତି।