ଖଣ୍ଡଗିରି: ବିଜୁ ପଟ୍ଟନାୟକ ଅନ୍ତର୍ଜାତୀୟ ବିମାନବନ୍ଦର ସମ୍ପ୍ରସାରଣ ପାଇଁ ସ୍ଥାନୀୟ ଗଣ୍ଡମୁଣ୍ଡା ବସ୍ତିରେ ମଙ୍ଗଳବାର ୪୭ଟି ଘର ଭଙ୍ଗା ଯାଇଛି। ବିଡିଏ ଓ ବିଏମ୍ସି ମିଳିତ ଭାବେ କରିଥିବା ଏହି ଉଚ୍ଛେଦ ଯୋଗୁଁ ପ୍ରାୟ ୩୦ ହଜାର ବର୍ଗଫୁଟ୍ ଜମି ଖାଲି ହୋଇଛି। ପୂର୍ବରୁ ବସ୍ତିବାସିନ୍ଦାମାନଙ୍କୁ ନୋଟିସ୍ କରାଯାଇଥିଲା ଓ ବିଏମ୍ସି ପକ୍ଷରୁ ସହାୟତା ଦିଆଯିବ ବୋଲି ପ୍ରତିଶ୍ରୁତି ଦିଆଯାଇଥିବାରୁ ଏହି ଉଚ୍ଛେଦ ବେଳେ କୌଣସି ପ୍ରକାର ଗଣ୍ଡଗୋଳ ଉପୁଜିନଥିଲା। ତଥାପି ଗଣ୍ଡଗୋଳ ଆଶଙ୍କାରେ ଜୋନ୍-୩ ଏସିପି ୧ ପ୍ଲାଟୁନ୍ ପୁଲିସ ବଳ ଓ ୧ ସେକ୍ସନ ମହିଳା ପୁଲିସ କର୍ମଚାରୀଙ୍କ ସହ ଘଟଣାସ୍ଥଳରେ ଉପସ୍ଥିତ ଥିଲେ। ବିଡିଏ ପକ୍ଷରୁ ଅଧିକାରୀ ପ୍ରମୋଦ କୁମାର ପାତ୍ର, ଶୁଭ୍ରାଂଶୁ ଶେଖର ମହାନ୍ତିଙ୍କ ସହ ବିଏମ୍ସିର ଅଧିକାରୀ ଓ ପୁଲିସ ଏସିପି ପ୍ରାଣବନ୍ଧୁ ରାଉତ ପ୍ରମୁଖ ଉପସ୍ଥିତ ଥିଲେ। ଅପରପକ୍ଷେ ଜମି ଅଧିଗ୍ରହଣରେ ଘର ହରାଇଥିବା କାରଣରୁ କ୍ଷତିପୂରଣ ପାଇ ସାରିଥିବା କିଛି ବ୍ୟକ୍ତି ଘର ଖାଲି କରିନଥିଲେ। ଆଜି ସେଭଳି କିଛି ବଡ଼ବଡ଼ କୋଠା ଘରକୁ ମଧ୍ୟ ଭାଙ୍ଗି ଦିଆଯାଇଛି।