ଜବରଦଖଲ ଉଚ୍ଛେଦ: ବର୍ଷାରେ କଲବଲ ହେଲେ ୫ ପରିବାର
ଭୁବନେଶ୍ବର: କୁଆଖାଇ ବ୍ରିଜ୍ ତଳେ ମଞ୍ଚେଶ୍ବର ରାସ୍ତା ପାର୍ଶ୍ବରୁ ନଦୀବନ୍ଧରେ ହାଇଟେକ୍ କଲେଜ ରୋଡ୍ ପର୍ଯ୍ୟନ୍ତ ପୂର୍ତ୍ତ ବିଭାଗ ପକ୍ଷରୁ ନିର୍ମାଣ ହେବାକୁ ଥିବା ରାସ୍ତା ପାଇଁ ଆଜି ଜବରଦଖଲ ଉଚ୍ଛେଦ କରାଯାଇଥିଲା। ଗତକାଲିଠାରୁ ଏନେଇ ବସ୍ତିଲୋକଙ୍କୁ ସୂଚନା ଦିଆଯାଇଥିଲେ ବି ଲୋକେ ପ୍ରସ୍ତୁତ ହେବାକୁ ସମୟ ନପାଇ ବଡ଼ ହଇରାଣ ହୋଇଥିଲେ। ୫ ପରିବାରର ଘର ଭଙ୍ଗା ସରିଥିବା ବେଳେ ପ୍ରବଳ ବର୍ଷା ହେବାରୁ ସେମାନେ ବଡ଼ କଲବଲ ହୋଇଥିଲେ। ପିଲାଛୁଆମାନେ ବର୍ଷାରେ ଭିଜିଭିଜି ବଡ଼ ଦୟନୀୟ ଅବସ୍ଥାରେ ରହିଥିଲେ।
Sambad is now on WhatsApp
Join and get latest news updates delivered to you via WhatsApp
ଘରୁ ଜିନିଷପତ୍ର ବାହାର କରି ଦେଇଥିଲେ ବି ବହୁ ଜିନିଷ ବର୍ଷାରେ ଓଦା ହୋଇ ନଷ୍ଟହୋଇଥିଲା। ତେବେ ପ୍ରବଳ ବର୍ଷା ଯୋଗୁଁ ଉଚ୍ଛେଦ କାର୍ଯ୍ୟ ଅଧାରେ ବନ୍ଦ ରହିଥିଲା। ଆସନ୍ତା ୨୩ ତାରିଖରେ ସମ୍ପୂର୍ଣ୍ଣ ଉଚ୍ଛେଦ କରାଯିବ ବୋଲି ବିଡିଏ ପକ୍ଷରୁ ସୂଚନା ଦିଆଯାଇଛି। ଆଜି ୩୦ଟି ଆଜ୍ବେଷ୍ଟସ୍ ଘର ଓ ୩ଟି ଦୋକାନ ଘର ଭଙ୍ଗାଯାଇଥିଲା। ଆଇନ ଶୃଙ୍ଖଳାକୁ ଦୃଷ୍ଟିରେ ରଖି ଏକ ପ୍ଲାଟୁନ ରିଜର୍ଭ ପୁଲିସ ଫୋର୍ସ ଏବଂ ଗୋଟିଏ ସେକ୍ସନ ମହିଳା ଫୋର୍ସ ମୁତୟନ କରାଯାଇଲା। ବିଡିଏ ଅଧିକାରୀ ପ୍ରମୋଦ ପାତ୍ର, ଶୁଭ୍ରାଂଶୁ ଶେଖର ମହାନ୍ତି, ମଞ୍ଚେଶ୍ବର ଥାନା ପୁଲିସ ଓ ପୂର୍ତ୍ତ ବିଭାଗ କନିଷ୍ଠ ଯନ୍ତ୍ରୀ ସମ୍ବିତ ମହାନ୍ତି ପ୍ରମୁଖ ଉପସ୍ଥିତ ରହି ଉଚ୍ଛେଦ କାର୍ଯ୍ୟ ତଦାରଖ କରିଥିଲେ।