ଭୁବନେଶ୍ବର: ବିବାହ ଉତ୍ସବ ପାଇଁ ଆବଶ୍ୟକ ଭିତ୍ତିଭୂମି ନ ଥିବା ଏବଂ ବିଏମ୍ସି ପକ୍ଷରୁ କରୋନା ମୁକାବିଲା ପାଇଁ ଜାରି ହୋଇଥିବା ଏସ୍ଓପି (ନିୟମାବଳୀ) ମାନୁ ନ ଥିବାରୁ ଆଜି ବିଭିନ୍ନ ସ୍ଥାନରେ କେତେକ ଅନୁଷ୍ଠାନକୁ ସିଲ୍ କରାଯାଇଛି। ଏଥିରେ ଗୋଟିଏ ମନ୍ଦିରର ବିବାହ ମଣ୍ଡପ ସମେତ ୫ଟି ହୋଟେଲକୁ ସିଲ୍ କରାଯାଇଛି। ବିଏମ୍ସି ଅତିରିକ୍ତ କମିସନର ଅବନିକାନ୍ତ ପଟ୍ଟନାୟକଙ୍କ ନେତୃତ୍ବରେ ଆଜି ଉତ୍ତର ଜୋନ୍ରେ ଦୁଇଟି ଏବଂ ଦକ୍ଷିଣ-ପୂର୍ବ ଜୋନ୍ରେ ୪ଟି ପ୍ରତିଷ୍ଠାନକୁ ବିଏମ୍ସି ଓ ବିଡିଏର ଏନଫୋର୍ସମେଣ୍ଟ ଟିମ୍ ସିଲ୍ କରିଛି।
Sambad is now on WhatsApp
Join and get latest news updates delivered to you via WhatsApp
ବିଏମ୍ସି ପକ୍ଷରୁ କୁହାଯାଇଛି ଯେ, ବିଜେବି ନଗରରେ ଥିବା ରାଧାକୃଷ୍ଣ ମନ୍ଦିରରେ ବିବାହ ଉତ୍ସବ ହେଉଥିଲେ ହେଁ ଏଠାରେ ଅଗ୍ନି ନିରାପତ୍ତା ସାର୍ଟିଫିକେଟ୍, କଠିନ ବର୍ଜ୍ୟବସ୍ତୁ ପରିଚାଳନା ବ୍ୟବସ୍ଥା ଓ ପାର୍କି ସୁବିଧା ନଥିଲା। ତେଣୁ ଏହାର ରୋଷ ଘର ଏବଂ କାର୍ଯ୍ୟକ୍ରମ ଆୟୋଜନ ଅଞ୍ଚଳକୁ ସିଲ୍ କରାଯାଇଛି। ସେହିପରି ଅଶୋକ ନଗରରେ ଥିବା ଦିଲ୍ଲୀପ ଗେଷ୍ଟ ହାଉସ୍ର ଟ୍ରେଡ୍ ଲାଇସେନ୍ସ ନ ଥିବା ବେଳେ ହୋଲଡିଂ ଟିକସ ଦେଉ ନ ଥିଲା। ଅସ୍ବାସ୍ଥ୍ୟକର ପରିବେଶ ସହ ଆଗନ୍ତୁକଙ୍କ ପରିଚୟପତ୍ର ରଖାଯାଉ ନ ଥିଲା। ବିଏମ୍ସିର ନିୟମାବଳି ମାନୁ ନ ଥିବାରୁ ଏହାକୁ ବି ସିଲ୍ କରାଯାଇଛି। ବ୍ରହ୍ମେଶ୍ବର ପାଟଣାରେ ଥିବା ଏକ ଓୟୋ ହୋଟେଲ ସମେତ ଅଶୋକ ନଗରରେ ଥିବା କେୟାର ଗେଷ୍ଟ ହାଉସ୍କୁ ବି ସିଲ୍ କରାଯାଇଛି। କେୟାର ଗେଷ୍ଟ ହାଉସ୍ର ଟ୍ରେଡ୍ ଲାଇସେନ୍ସ ନ ଥିଲା କି ହୋଲଡିଂ ଟିକସ ଦିଆଯାଉ ନ ଥିଲା, ଅଗ୍ନି ନିରାପତ୍ତା ସାର୍ଟିଫିକେଟ୍ ନ ଥିଲା। ଏହାସହ ଅସ୍ବାସ୍ଥ୍ୟକର ପରିବେଶ ଥିବା ଏବଂ ବିଏମ୍ସି ନିୟମାବଳି ପାଳନ ହେଉ ନ ଥିବା ଏନଫୋର୍ସମେଣ୍ଟ ଟିମ୍ ଦେଖିବାକୁ ପାଇଥିଲା। ତେଣୁ ଏହାକୁ ସିଲ୍ କରାଯାଇଛି। ସେହିପରି ବିଏମ୍ସିର ଉତ୍ତର ଜୋନ୍ର ଦୁଇଟି ହୋଟେଲକୁ ସିଲ୍ କରାଯାଇଛି।