୬୭ତମ ଜାତୀୟ ଫିଲ୍ମ ପୁରସ୍କାର: କଙ୍ଗନା ଶ୍ରେଷ୍ଠ ଅଭିନେତ୍ରୀ, ମନୋଜ ବାଜପେୟୀ ଓ ଧନୁଷ୍ ଶ୍ରେଷ୍ଠ ଅଭିନେତା
‘ଛିଛୋରେ’ ଶ୍ରେଷ୍ଠ ହିନ୍ଦୀ ଫିଲ୍ମ ‘ଶଲା ବୁଢ଼ାର ବଦଲା’ ଓ ‘କାଲିର ଅତୀତ’ ଶ୍ରେଷ୍ଠ ଓଡ଼ିଆ ଫିଲ୍ମ
ନୂଆଦିଲ୍ଲୀ: ଆଜି ନୂଆଦିଲ୍ଲୀ ସ୍ଥିତ ନାସନାଲ୍ ମିଡିଆ ସେଣ୍ଟର ଠାରେ ୬୭ ତମ ଜାତୀୟ ଫିଲ୍ମ ପୁରସ୍କାର ଘୋଷିତ ହୋଇଛି। ଏଥିରେ ୨୦୧୯ ମସିହା ପାଇଁ ବିଜେତା ହୋଇଥିବା ବିଭିନ୍ନ ଚଳଚ୍ଚିତ୍ର ଓ କଳାକାରଙ୍କ ନାମ ଘୋଷଣା କରାଯାଇଛି। କେନ୍ଦ୍ର ସୂଚନା ଓ ପ୍ରସାରଣ ମନ୍ତ୍ରଣାଳୟ ଅଧୀନ ଫିଲ୍ମ ଫେଷ୍ଟିଭାଲ୍ସ ନିର୍ଦ୍ଦେଶାଳୟ ଦ୍ବାରା ଏହି ପୁରସ୍କାର ସାଧାରଣତଃ ପ୍ରତିବର୍ଷ ମେ ୩ ତାରିଖରେ ଘୋଷିତ ହୋଇ ଆସୁଥିବା ବେଳେ ଗତବର୍ଷର ବିଜେତାଙ୍କ ନାମ ମହାମାରୀ କୋଭିଡ୍ ସକାଶେ ପାଖାପାଖି ବର୍ଷେ ଘୁଞ୍ଚାଇବା ପରେ ଆଜି ପ୍ରକାଶିତ ହୋଇଛି। ଏଥର ଏହି ପୁରସ୍କାର ପାଇଁ ଫିଚର ଫିଲ୍ମ ବର୍ଗରେ ୪୬୧ଟି ଓ ଅଣଫିଚର ଫିଲ୍ମ ବର୍ଗରେ ୨୨୦ଟି ଚଳଚ୍ଚିତ୍ର ସାମିଲ ହୋଇଥିବା ବେଳେ ଶ୍ରେଷ୍ଠ ଚଳଚ୍ଚିତ୍ର ସଂପନ୍ନ ରାଜ୍ୟ ପାଇଁ ୧୩ଟି ଆବେଦନ ଗୃହୀତ ହୋଇଥିଲା।
Sambad is now on WhatsApp
Join and get latest news updates delivered to you via WhatsApp
ପୁରସ୍କାର ପାଇବାକୁ ଯୋଗ୍ୟ ବିବେଚିତ ହୋଇଥିବା ନାମଗୁଡ଼ିକ ମଧ୍ୟରେ ଶ୍ରେଷ୍ଠ ଅଭିନେତ୍ରୀ ଭାବେ ଦୁଇଟି ଫିଲ୍ମ ପଙ୍ଗା ଓ ମଣିକର୍ଣ୍ଣିକାର ନାୟିକା କଙ୍ଗନା ରାଣାୱତ ଏବଂ ଶ୍ରେଷ୍ଠ ଅଭିନେତା ଭାବେ ମିଳିତ ଭାବେ ହିନ୍ଦୀ ଫିଲ୍ମ ଭୋଁସଲେର ନାୟକ ମନୋଜ ବାଜପେୟୀ ଓ ତାମିଲ୍ ଚଳଚ୍ଚିତ୍ର ଅସୁରନ୍ର ନାୟକ ଧନୁଷ ରହିଛନ୍ତି। ସେହିପରି ଶ୍ରେଷ୍ଠ ପାର୍ଶ୍ବ ଅଭିନେତ୍ରୀ ଭାବେ ହିନ୍ଦୀ ଚଳଚ୍ଚିତ୍ର ଦି ତାସକେଣ୍ଟ୍ ଫାଇଲ୍ସର ନାୟିକା ପଲ୍ଲବୀ ଯୋଶୀ ଓ ଶ୍ରେଷ୍ଠ ପାର୍ଶ୍ବ ଅଭିନେତା ଭାବେ ତାମିଲ ଫିଲ୍ମ ସୁପର ଡିଲକ୍ସର ନାୟକ ବିଜୟ ସେତୁପତିଙ୍କ ନାମ ଘୋଷିତ ହୋଇଛି। ସେହିପରି ମାଲାୟାଲାମ୍ ଚଳଚ୍ଚିତ୍ର ମରକ୍କାର: ଲାୟନ୍ ଅଫ୍ ଦି ଆରବିଆନ୍ ସି କୁ ଶ୍ରେଷ୍ଠ ଫିଚର ଫିଲ୍ମର ମାନ୍ୟତା ମିଳିଥିବା ବେଳେ ଶ୍ରେଷ୍ଠ ନିର୍ଦ୍ଦେଶନା ପାଇଁ ହିନ୍ଦୀ ଚଳଚ୍ଚିତ୍ର ବହତ୍ତର ହୁରେଁ ର ନିର୍ଦ୍ଦେଶକ ସଞ୍ଜୟ ପୁରନ୍ ସିଂହ ମନୋନୀତ ହୋଇଛନ୍ତି। ଅପରପକ୍ଷେ, ଶ୍ରେଷ୍ଠ ଚଳଚ୍ଚିତ୍ର ସଂପନ୍ନ ରାଜ୍ୟ ଭାବେ ସିକିମ୍କୁ ବଛାଯାଇଛି। ଏଥି ସହିତ ବିଭିନ୍ନ ଭାଷାର ଶ୍ରେଷ୍ଠ ଚଳଚ୍ଚିତ୍ରଗୁଡ଼ିକ ମଧ୍ୟରେ ଛିଛୋରେ(ହିନ୍ଦୀ), ଶଲା ବୁଢ଼ାର ବଦଲା ଓ କାଲିର ଅତୀତ (ଓଡ଼ିଆ), ଗୁମନାମୀ (ବଙ୍ଗଳା), ରୋନୁଵା-ହୁ ନେଭର ସରେଣ୍ଡର (ଅହମିୟା), ଜର୍ସି (ତେଲଗୁ), କଲ୍ଲା ନୋତ୍ତମ୍(ମାଲାୟାଲାମ୍), ଅସୁରନ୍ (ତାମିଲ୍), ଭୁଲାନ୍ ଥେ ମାଜେ(ଛତିଶଗଡ଼ୀ), ବାରଦୋ (ମରାଠୀ), ଆକ୍ଷି (କନ୍ନଡ଼), କାଜରୋ (କୋଙ୍କଣୀ), ଛୋରିୟାଁ ଛୋରୋଁ ସେ କାମ୍ ନେହିଁ ହୋତି (ହରିଆଣୀ) ଏବଂ ରବ୍ ଦା ରେଡିଓ ୨ (ପଞ୍ଜାବୀ) ଆଦି ରହିଛି।