ଭୁବନେଶ୍ବରରେ ଜମି ଦଲାଲ ସକ୍ରିୟ, ୭ ଅଭିଯୁକ୍ତ ଗିରଫ

ଭୁବନେଶ୍ବର: ରାଜଧାନୀରେ ଜମି ଦଲାଲ୍‌ ଗ୍ୟାଙ୍ଗ ସକ୍ରିୟ ଅଛନ୍ତି। ଏହି ଗ୍ୟାଙ୍ଗର ୭ ଜଣଙ୍କୁ କମିସନରେଟ ପୁଲିସ ଗିରଫ କରିଛି। ଗିରଫ ଅଭିଯୁକ୍ତମାନେ ହେଲେ ନକୁଳ ମହାକୁଡ, ଆଶିଷ ଜେନା, ଦୀପକ କୁମାର ଦାସ, ଲକ୍ଷ୍ମୀକାନ୍ତ ଦାସ, ରାଜେଶ କୁମାର ପାତ୍ର, ପ୍ରଦୀପ କୁମାର ବଳିଆର ସିଂହ ଓ ଆଶିଷ କୁମାର ରାୟ। ଅଭିଯୁକ୍ତମାନଙ୍କର ଘର ଭୁବନେଶ୍ବର ଓ ପୁରୀ ଜିଲ୍ଲାର ବିଭିନ୍ନ ଅଞ୍ଚଳରେ।

ନୟାପଲ୍ଲୀ ପୁଲିସ କହିଛି ଅଭିଯୁକ୍ତମାନେ ଲୋକଙ୍କୁ ଡରେଇ ଧମକେଇ ମାଡ଼ ମାରି ଜାଗା ପଜେସନ ନେଉଥିଲେ। ବିବାଦୀୟ ଜମି ଉପରେ ଏମାନଙ୍କ ଅଧିକ ନଜର ରହିଥାଏ। ପଜେସନ୍ ପାଇଁ ଜେସିବି ଲଗେଇ ଘର ଓ ଦୋକାନ ଭାଙ୍ଗିଥାନ୍ତି। ନୟାପଲ୍ଲୀ ଥାନାରେ ଅଭିଯୋଗ ପରେ ପୁଲିସ ଚନ୍ଦକା ଥାନା ଅନ୍ତର୍ଗତ ମଳିପଡ଼ାର ନକୁଳ ମହାକୁଡ, ନିଳାଦ୍ରୀ ବିହାରର ଆଶିଷ ଜେନା, ବରମୁଣ୍ଡାର ଦୀପକ କୁମାର ଦାସ, ସାଇନ୍ସ ପାର୍କ ବସ୍ତିର ଲକ୍ଷ୍ମୀକାନ୍ତ ଦାସ, ପିପିଲିର ରାଜେଶ କୁମାର ପାତ୍ର, ଡେଲାଙ୍ଗର ପ୍ରଦୀପ କୁମାର ବଳିଆର ସିଂହ ଓ ଅନ୍ଧାରୁଆର ଆଶିଷ କୁମାର ରାୟଙ୍କୁ ଗିରଫ କରିଛି। ଅଭିଯୁକ୍ତମାନଙ୍କ ନାଁରେ ପୂର୍ବରୁ ମଧ୍ୟ ମାମଲା ରହିଛି।

ଡିସିପି ପ୍ରୀତିକ ସିଂ କହିଛନ୍ତି, ବିବାଦୀୟ ଜମିକୁ ଅକ୍ତିଆର କରିବା ସହ ଜମି ପୋଜେସନ୍ ଦେବା ନାମରେ ରାଜଧାନୀରେ ସକ୍ରିୟ ହେଉଛି ୩ ରୁ ୪ଟି ଗ୍ୟାଙ୍ଗ। ନୟାପଲ୍ଲୀ ଥାନା ଅଧୀନରେ ଏହି ଗ୍ୟାଙ୍ଗର ସହଯୋଗ ନେଇ ଦୁଇଟି ଦୋକାନ ଘର ଭାଙ୍ଗିବା ମହଙ୍ଗା ପଡ଼ିଛି। ଗ୍ୟାଙ୍ଗରେ ଥିବା ୭ ଜଣ ବାଉନସରଙ୍କୁ ପୁଲିସ ଗିରଫ କରି କୋର୍ଟ ଚାଲାଣ କରିଛି। ସାର୍ଟ ଖୋଲି ଖାଲି ପାଦରେ ଚଲାଇ ଚଲାଇ ହାତରେ ଦଉଡି ବାନ୍ଧି କୋର୍ଟ ଚାଲାଣ କରାଯାଇଛି। ବଡ଼ କଥା ହେଲା ଭୟରେ ଲୋକେ ଏମାନଙ୍କ ବିରୁଦ୍ଧରେ ଥାନାରେ ଏତଲା କରୁନାହାନ୍ତି। ବିବାଦୀୟ ଜାଗାରେ ଦୋକାନ କରିଥିବା ସୁବାସ ଅଗ୍ରୱାଲ ନାମକ ଜଣେ ବ୍ୟବସାୟୀ ଏବଂ ପ୍ରଦୀପ ସାମଲ ନାମକ ଅନ୍ୟ ଜଣେ ବ୍ୟବସାୟୀଙ୍କ ଦୋକାନକୁ ଭାଙ୍ଗି ଦିଆଯାଇଥିଲା। ଏହାସହ ସେଠାରେ କିଛି ସାମଗ୍ରୀ ମଧ୍ୟ ଲୁଟ୍ କରିନିଆ ଯାଇଥିଲା।

ଏହି ଗ୍ୟାଙ୍ଗର ମୁଖ୍ୟ ନକୁଳ ମହାକୁଡ ନାମରେ ଏକାଧିକ ମାମଲା ରହିଛି, ଏପରିକି ତ ନାମରେ ଏନ୍‌ଏସ୍‌ଏ ମଧ୍ୟ ଲାଗିଥିଲା। ପୁଲିସ କହିବା ଅନୁସାରେ ନୟାପଲ୍ଲୀ ଥାନା ନିକଟରେ ଏହି ଜମିର ମାଲିକ ଦୁଇ ଭାଇ ଥିଲେ। ଜମିର କିଛି ଭାଗ ଅନ୍ୟ ଜଣେ ବ୍ୟକ୍ତିକୁ ବିକ୍ରି କରାଯାଇଥିଲା। ତେବେ ଜମି କିଣିଥିବା ଲୋକ, ଜମିକୁ ଅକ୍ତିଆରକୁ ନେଇପାରୁନଥିଲା। ସେହି ଜମି ଉପରେ ଦୁଇଟି ଦୋକାନ ଘର ଥିଲା, ଜମିକୁ ନିଜ ଅକ୍ତିଆରକୁ ନେବା ଲାଗି ଜମି କିଣିଥିବା ବ୍ୟକ୍ତି ଏହି ବିବାଦୀୟ ଜମିକୁ ନିଜ ଅକ୍ତିଆରକୁ ଆଣିବା ପାଇଁ ଏହି ଗ୍ୟାଙ୍ଗର ସହଯୋଗ ନେଇଥିଲା ଏବଂ ଏହି ଗ୍ୟାଙ୍ଗ ଜେସିବି ଲଗାଇ ଦୁଇଟି ଦୋକାନ ଘର ଭାଙ୍ଗି ଥିଲା। ତେବେ ପୁଲିସ ଏନେଇ ମାମଲା ରୁଜୁ କରିବା ପରେ ଏହି ଗ୍ୟାଙ୍ଗର ୭ ଜଣକୁ ଗିରଫ କରି କୋର୍ଟ ଚାଲାଣ କରିଛି ବୋଲି ଡିସିପି ଗଣମାଧ୍ୟମକୁ ସୂଚନା ଦେଇଛନ୍ତି।

ସମ୍ବନ୍ଧିତ ଖବର